9
Jerusalem mary ai pajeng naira avum nai
1 Naibaly Tameuh my, “Jerusalem mary ai pajeng ai nai khumichi awi, jeu u; nangmychi hawi vanrei tavai ateaungchi py syn u,” nanai tao pajeng parai nai raawi hawi leu pei nai kai ly thai bo.
2 Huna nai khala tavai ateaung syn u kryh nai khumi leaung tariureichi ly Achura yhm tosyh ngan mang i katheu pa-kho mang ang theu u nai ne. Nichi hawi vanrei kanih mai ka-syn amthyp iy cha tajiurachi syn nai khumi leaungrei py abawi; nichi bawibawi ly kheupaja maicham sahawi y angdo u.
3 Huna nai khala y Israela chengchi my chiu nai Tameuh i nang parai nai kangvang ly mymy i awm nai kherubenchi mang my angteang kalau iy, Achura yhm y kun nai pa-kho mang y asyh vui bo. Areng ly kanih mai ka-syn amthyp iy cha tajiura syn nai khumi ai palau i,
4 Ref 9.4: Amt 7:3; 9:4; 14:1. “Nang ly Jerusalem mary verei amki iy khumichi vai, sa u nai amso ngai nairachi molam y, vo tangam nai khumi ngiereichi i lu kati y ka-ma-ra so,” napi.
5 Naibaly Tameuh my takhra khumichi teng y, “Huni khumi nithun abang iy mary verei y tleh u; ami ai py kangheng khai moh, ami ai py pahen moh.
6 Miteaungchi, thawndeang anglochi, deaungdi amhmchi hawi deaungdichi ai padei u. Na i py lu kati y ka-ma-ra awm nai khumichi ai ly nam moh. Kai i Achura yhm dengdairei amteaung iy so ba,” nanai leu pei nai kathai. Hunai deaungkho y huni khumichi ly Achura yhm theung y angdo u nai Israela cheng luchi ai tleh manme nai ne.
7 Tameuh my, “Achura yhm y amso ngai nai so u; apai ly-umchira y khumi kadeichi hawi kawi hai u; kalop so u amteaung jau!,” napi. Hunai deaungkho y huni khumichi ly mary theung y awm nai khumichi ai tleh amteaung bo.
8 Huna nai nichi my tleh u nai thym khala kai ly kaimy tlairei kaawm jo nai ne. Kai ly khaileaung y tabiu iy ambeu naimy, “Aw sa thai naira awm nai Areng, nang ly Israela pri y awm rai nai khumi ngiereichi ai padei hai ai nai pa-rei, Jerusalem mary y kado theu hai na bo a?,” nanai aeu naimy katakeng bo.
9 Tameuh my, “Israela hawi Juda mipuichi i kamngochi ly khri pa-rei len parai na; nichi ly pri theung i meingtym tleirei y khumi ai padei naichi hawi Jerusalem mary verei y kamngo kawi hai nai y, ‘Areng ly achi pri ai khai su bo, Areng ly achi ai niu ngai y leang bo,’ nanai thui u nai ne.
10 Na i py kai ly nichi ai kapahen ai ny y, kangheng patleaung ai ny y. Huni khumichi my khumi takhra ai sa nai kamta nichi ai kaimy kasa ai,” napi.
11 Naibaly kanih mai ka-syn amthyp iy cha tajiura syn nai khumi my, “Kai ly nang i leu pei nai kamta kasa chum bo,” nanai Areng teng y amti pi nai ne.