10
1 Ref 10.1: Eza 1:26; Amt 4:2. Kai ly heng nai amjychi lu salo i takhuru nai amjy ai khen nai khala, nila lengseaung hawi sa nai areng atehra hawi atawm nai kaniu.
2 Ref 10.2: Amt 8:5. Tameuh my kanih mai ka-syn amthyp nai khumi teng y, “Huni heng nai amjychi i anui y awm nai ka-ri amlira kheuchi sala y chei ly huni heng nai amjychi sala i mai-aichi kiu hawi phawn iy mary salo y hei ba,” napi.
Huni khumi ly kai i mei ka-niu y my chei bo.
3 Huni khumi kun nai khala y heng nai amjychi ly Achura yhm tokalawi ngan mang y angdo u. Achura yhm apai theung y py khupanym my kawi na.
4 Areng i nang parai nai kangvang ly huni heng nai amjychi salo y angteang kalau iy, Achura yhm y kun nai pa-kho mang y asyh vui bo. Naibaly Achura yhm ly khupanym my kawi na i, apai ly Areng i nang parai naira hawi angvang phang nai ne.
5 Heng nai amjychi i pakhi aho nai katyn ly apai angam mang y khrairei thai na bo. Huni katyn ly ati cheaungkhang sa thai nai Tameuh i leu pei nai raawi hawi atawm.
6 Areng my kanih mai ka-syn amthyp nai khumi teng y, heng nai amjychi i anui y awm nai ka-ri amlira kheuchi sala i mai-ai phyrei la ai nai leu pei nai khala, huni khumi ly kun iy amlira kheu harei sahawi y angdo.
7 Heng nai amjy harei ly kiu jaha iy heng nai amjychi sala i mai-ai akhui khala, kanih mai ka-syn amthyp nai khumi i kiupadawira y khai pi. Huni khumi py mai-aichi la iy theu jo nai ne.
8 Heng nai amjychi i pakhichi anui y khumi i kiu hawi atawm nai kiu harei awm akyhkyh nai py kaniu.
9-10 Ref 10:9-13 Eza 1:15-21. Huni heng nai amjychi sahawi y ka-ri amlira kheu awm akyhkyh nai ai py, kai ly kaniu bo. Huni amlira kheuchi ly vang kateng lengseaungchi kamta kangvang sadi na. Hunichi ly katheang kalen atawm riri iy amlira kheu tleirei y takhra amlira kheu harei my taki kataw, kah khangpa nai ne.
11 Huni heng nai amjychi asyh naira y, nichi ly ami y naimy, nichi i mo tha naira mani meingtym mang y py ne sy, chei u thai. Nichi ly mymychi my ami ai nai ngai y naimy, mymychi ngai naira mang y vanrei chei thai nai ne.
12 Ref 10:12 Amt 4:8. Nichi i tlum tlangchi, nithun anamchi, kiuchi, pakhichi hawi amlira kheuchi ly meichi kawi na.
13 Huni amlira kheuchi ai, “Tengkaleng ka-ri kheuchi,” nanai amyn pathi nai kai ly thai bo.
14 Ref 10:14 Eza 1:10; Amt 4:7. Huni heng nai amjy harei y meimai palyhrei awm i, angchei i meimai ly si katai i meimai, pa-nyh i meimai ly khumi i meimai, pa-thom i meimai ly khrangsi i meimai, palyh i meimai ly ahmtlau i meimai ne.
15 Nichi ly ali theung y akheang thai. (Huni heng nai amjychi ly Kheba tavo sahawi y kai i niu nai heng nai amjychi ne teang.)
16 Heng nai amjychi asyh nai khala nichi sahawi i amlira kheuchi py asyh teang. Nichi akheang ai nai pakhi kadai nai tleirei, amlira kheuchi py angteang kalau teang.
17 Huni heng nai amjychi anawn nai khala, amlira kheuchi py anawn teang. Heng nai amjychi akheang nai khala, amlira kheuchi py abang teang. Ati mana nai mo na baly huni heng nai amjychi i phailo my, amlira kheuchi ai peang nai deaungkho y ne.
18 Naibaly Areng i nang parai nai kangvang ly Achura yhm y kun nai pa-kho mang theu iy, heng nai amjychi salo y asyh vui nai ne.
19 Nichi ly mymychi i pakhichi kadai iy kai i mei ka-niu y my, khaileaung i nai salo mang y akheang kalau. Huna nai khala amlira kheuchi py abawi rau. Heng nai amjychi ly Achura yhm nisi mang i katheu pa-khora y anawn u bo. Israela chengchi i Tameuh i nang parai nai kangvang py nichi i tlang tleaung y awm nai ne.
20 Hini heng nai amjychi ly Kheba tavo sahawi y, vaichi khala Israela chengchi i Tameuh anui y kai i niu nai heng amjychi ne, nanai kapany bo.
21 Nichi ha hareichi teng y meimai palyhrei, pakhi palyhrei hawi, huni pakhichi anui y khumi i kiu hawi atawm nai kiu ha harei awm bawibawi.
22 Nichi i meimaichi ly Kheba tavo sahawi y kai i niu nai meimaichi hawi atawm khyp. Huni heng nai amjy bawibawichi py mo kataw mang y asyh thai nai ne.