48
1-7 Huni khaileaung meingtym tosyh ngan mang khujyh ly Mrethe pangli dengdai nisi ngan mang Hethalon mary Hamath mawi aleaung lam hawi Enon mary, hu i dengdairei Damaska pri hawi Hamath pri khujyh ryrei ne. Cheng theaung ha harei y nisi khujyh dengdai nidym Mrethe pangli ryrei khu ka-peang ha harei, tosyh dengdai tokalawi khrairei anui mang i kamta nga akyhkyh ai nai tla.
Dan
Asha
Naphtali
Manaseh
Ephraim
Ruben
Juda
8 Juda pri khujyh ka-so nidym khujyh sala y, khai patyp nai khaileaung meingtym harei awm ai nai tla. Huni khaileaung meingtym kakau ly mail tajarei awm iy, jeng kasau ly Israela chengchi teng y vui pi nai khaileaung meingtym i jeang kasau tanrei awm ai nai tla. Achura yhm ly huni khaileaung meingtymra y awm ai nai tla.
9 Areng i vui khai takhra pi nai khaileaung meingtym ly jeng kasau mail tajarei, ka kakau mail tariurei awm ai nai tla.
10 Huni meingtym kachaira y pathyp pi nai keungchi i vui meingtym phy pi ai nai tla. Huni phy pi nai meingtym ly nisi mang ka-so nidym mang y mail tajarei awm iy, tosyh mang ka-so tokalawi mang y mail thomrei awm ai nai tla. Hini khaileaung meingtym i umtang y ly Areng i Achura yhm awm ai nai tla.
11 Hini meingtym kachai ly Zadok i kangpreang pathyp pi nai keungchi i vui lawm ai nai tla. Nichi ly kai i kalopra ka-ym awm parai naimy sa u nai ne. Takhra Israela chengchi lam tamang u nai khala nichi ly Levi khumichi kamta lam tamang u y.
12 Hunai deaungkho y nichi ly Levi khumichi hawi ka-bira awm nai khai takhra nai meingtym nga u ai. Huni meingtym ly chai keh nai meingtym lawm ai.
13 Levi khumichi py pathyp pi nai keungchi i khaileaung meingtym tokalawi mang y awm nai khai patyp nai khaileaung meingtym nga u ai. Nichi i meingtym py nisi mang ka-so nidym mang y jeang kasau mail tajarei, ka ly tosyh mang ka-so tokalawi mang y mail thomrei kau ai nai tla.
14 Areng teng y talam nai khaileaung meingtym ly bawibawi tleaung y hawi keh nai ne i, huni khaileaung seichyrei ai py jo ai nai, ti y baly katheung ai nai, khumi takhra leaungrei i amyn y angam hai ai nai avo y. Huni khaileaung ly kachai ne iy, Areng my peang nai khaileaung ne.
15 Jeng kasau mail tajarei, ka mail nyhrei vi kau nai takhra khaileaung ly khaileaung kachai ny y; khumi humchi teaung ai nai khaileaung ne. Nichi ly huni meingtymra awm iy huni khaileaung teaung u ai. Huni khaileaung umtang y mary sa ai nai tla.
16 Huni mary ly jeng ka ka-meaung awm i, makengrei y miu sangpalyh pa-ngo chungvai pangrei awm ai nai tla.
17 Mary i nidym nisi, tosyh tokalawi ka-ki ly ka kakau miu chungvai nyh pa-thom vui pangrei khaileaung kakau ha harei awm bawi ai nai tla.
18 Mary sa chum baly meingtym kachai i tokalawi ngan mang y abi nai khaileaung meingtym ly nisi mang y jeng kasau mail thomrei, ka kakau mail nyhrei vi awm nai khaileaung hawi, nidym mang y jeng kasau mail thomrei, ka kakau mail nyhrei vi awm nai khaileaungchi ly mary theung y awm nai khumichi i vui lawm ai nai tla.
19 Huni maryra awm nai ami py ne sy, mani cheng py ne sy, huni khaileaungra y li hlau sa u pajau nai ne.
20 Hunai deaungkho y khai patyp nai umtang i khaileaung verei ly jeng ka am-eaung iy, makengrei y mail tajarei awm ai. Huni khaileaungra y mary sa ai nai tla.
21-22 Achura yhm, pathyp pi nai keungchi, Levi khumichi hawi mary i vui khai takhra nai khaileaung i nisi hawi nidym ngan mang y awm rai nai khaileaung ly peang thym nai samrang my amtym ai nai ne. Huni khaileaung ly nisi mang y nisi khujyh ryrei, nidym mang y Mrethe pangli ryrei tym iy, hini khaileaung tosyh mang y awm nai Judachi i khu hawi, tokalawi mang y awm nai Benjaminchi i khujyh sala y awm nai ne.
23-27 Hini khai patyp nai khaileaung i tokalawi mang y awm nai takhra nupaichi ly nisi khujyh ka-so nidym mang i Mrithe pangli ryrei, khaileaung meingtym ha harei y tosyh mang dengdai tokalawi mang khrairei, anui mang i kamta ka-thui nga u akyhkyh ai nai tla.
Benjamin
Simeon
Isakhar
Zebulon
Kad
28 Kad nupai teng y pei nai khaileaung i nidym tokalawi taki mang i khujyh ly Tamar mary i ka-so Kadesa tuikho ryrei ne i, hu i dengdai nidym tosyh taki mang y awm nai Aikupta khujyh parui iy, Mrethe pangli ryrei ne.
29 Sa thai naira angym nai Areng my, “Hina nai thui pi nai kamta Israela nupaichi amtym hai ai nai khaileaung meingtymchi phy pi nai leaungsai ne,” napi.
30-34 Ref 48:30-34 Amt 21:12,13. Jerusalem mary theung y kun ai nai katheu pa-khochi ly holai nyhrei awm. Mary apai makeng makengrei ly miu sang palyh pa-ngo chungvai pangrei sau i, katheu pa-kho thomrei awm bawibawi. Huni katheu pa-khochi ai Israela nupaichi i amyn pathi bo. Tosyh mang i mary apai pa-khochi ai ly Ruben katheu pa-kho, Juda katheu pa-kho, Levi katheu pa-kho nanai py, nisi mang i mary apai pa-khochi ai ly Josepha katheu pa-kho. Benjamin katheu pa-kho, Dan katheu pa-kho nanai py, tokalawi mang i mary apai pa-khochi ai ly Simeon katheu pa-kho, Isakhar katheu pa-kho, Zebulon katheu pa-kho nanai py, nidym mang i mary apai katheu pa-khochi ai ly Kad katheu pa-kho, Asha katheu pa-kho, Naphtali katheu pa-kho nanai py amyn pathi nai ne.
35 Mary ai tapang meuh nai mary apai makeng palyhrei i jeng kasau bawibawi ly miu meaungkateaung atlo sang tajarei awm. Huni mary ai vai i dengdairei “Areng ly hi y awm!” nanai thui u ai.