DANIELA
I AMO LEU
Hini cha-iura y phy nyhrei kamtleh nai ne: (1) Angchei y ly Tameuh ai ym iy mymy i Reita leu pei nai ai tangai nai molam y, paleung ka-echi ai eaung nai Daniela hawi, pri pala naira avum nai khumi phyreichi i satang ne. Huni leaungsaichi ly Babulon hawi Pasia empara prichi deung y tym naichi ne. (2) Pa-nyh ly Daniela i avaw avawrei niu nai, paleung mei y niu nai satangchi ne. Huni paleung mei hawi niu nai satangchira y empara pri phyreichi i awm nai sai hawi phra nai saichi ai py, ana pumpi nai samrang deung tlum ai nai satang hawi, Tameuh i khumichi eaung naira nga ai nai satangchi py, ka-ma-rachi hawi patei pi nai ne.
1
Daniela hawi ni i ahawichi
Samrang Nebukhadnezar i yhm y awm nai Israela cheng thawndeang ka-cheangchi
1 Juda samrang Jojakim my peang nai pa-thom saneng y, Babulon samrang Nebukhadnezar ly Jerusalem mary ai tiu i, katanmeuh bo.Ref 1:1 2 Areng 24:1; 2 Neng 36:5-7
2 Areng ly Nebukhadnezar teng y samrang Jojakim ai patiu ai nai hawi, Achura yhm i yhmtheaung ateaung phyrei ai, la pi pawn ai nai pei. Nebukhadnezar ly langheng hawi naichi ai, Babulon pri y awm nai my i tameuh yhm mang y hawi iy, la pi vui nai yhmtheaung ateaungchi ai, my i tameuh ai chiu nai yhm i vawn khai nai meingtymra y khai bo.Ref 1:2-4 2 Areng 20:17-18, 24:10-16; 2 Neng 36:10; Is 39:7-8
3 Samrang ly my i tli chum nai Asapenaza teng y, langheng hawi nai Israela cheng theung y mangti mangcheng hawi tahm awm nai yhm dengtheungchi theung i,
4 mo-cha hawi nai, tau cheng nai, ami tleaungtha cheng nai, kiu kheu tabai y nai, kawp nai sai rai y nai, huna nai leaungsaichi hawi angym iy, samrang i yhm y kalop sa pajau ai nai, thawndeang kacheng phyreichi ai vawi takhra ai nai leu pei bo. Nichi ai Babulon cheng leu phain kawp, tajiu kawp ai nai Asapenaza my patiu pi ai nai leu pei nai ne.
5 Samrang ly cha nei kahawi hawi, kreip hang kani tleirei cha nei hai ai nai py leu pei nai ne. Huna nai saneng thom ryrei patiu pi chum baly, nichi ai samrang i mo y tym hai ai nai tla.
6 Huna nai vawi takhra naichi theung y Daniela, ananiah, Misaela hawi Azariahchi abawi u. Nichi bawibawi ly Juda cheng theaungchi ne.
7 Miteaung keh my ly Daniela ai Beltesazar, ananiah ai Sadraka, Misaela ai Meshaka, Azariah ai Abedaneko, nanai amyn kangtha pathi bo.
8 Daniela ly samrang i cha nei kahawi hawi, kreip hangchi cha nei nai dengdairei, amymy ai reita leaungsai molam y, chai hai y nai so y ai, nanai mymy i paleung y dawn bo. Hunai deaungkho y Asapenaza teng y kasabawmra hnei nai ne.
9 Tameuh my py Daniela i tlang tleaung y, kapahen paleung awm iy tamen ai nai Asapenaza i paleung ai amtlau hai bo.
10 Na i py Asapenaza ly samrang ai jei nai deaungkho y, Daniela teng y, “Samrang ly nangchi cha nei ai nai teicha teineichi pasym pi yb veng bo. Huna nai y nangchi ly takhra thawndeang ka-cheangchi kamta, tleungtlang atho by y lawh baly kai ai ang padei ai,” napi.
11 Hunaibaly Daniela ly mymy hawi ahawi leaung thomreichi ai kry ai nai Asapenaza my kalop pei nai khumi teng y chei iy,
12 “Kaichi cha nei ai nai antheng seaungngam hawi tui phai pei ly kani horei khen cham ba.
13 Naibaly kaichi hawi samrang i cha nei kahawichi cha nei nai thawndeangchi hawi tei pata cham iy, nangchi i niu nai kaichi i mo-cha molam y, kaichi ai ati mana pacho panei ai avo mo, nanai adawn ba,” napi.
14 Kry nai keung ly huna nai kamta, nichi ai kani horei cham ai nai aly bo.
15 Neng tym nai khala y nichi ly samrang i cha nei kahawi cha nei nai khumichi tleaung y, tleungtlang atho awm nai niu.
16 Naibaly kry nai keung ly huni kani dengdairei, samrang i cha nei kahawi jeng y, antheng seaungngam pacho khyh nai ne.
17 Tameuh ly huni thawndeang kacheng leaung palyhreichi ai, cha hawi cheng naira cheaungkhangchi kawp ai nai pei bo. Huni bo y Daniela teng y paleung mei y niu nai satang hawi amangchi thui pachai kawp nai, sa thai naira py pei pi nai ne.
18 Samrang my neng pei nai saneng thomrei neng khei nai khala y, Asapenaza ly thawndeang kacheng bawibawichi ai, samrang Nebukhadnezar teng y tha bo.
19 Samrang ly huni khumi bawibawichi hawi leu adeng ahui nai khala y, Daniela, ananiah, Mishaela hawi Azariahchi ly takhra khumichi tleaung y tau cheng nanai niu. Hunai deaungkho y nichi ly samrang teng y kalop sa ai nai nga u bo.
20 Samrang ly mani leu deng nai py ne sy, mani rai nai py ne sy, huni khumi leaung palyhreichi ly pri verei y awm nai leung kakawpchi, atam kakawpchi tleaung y phy horei pany kawp nai niu.
21 Daniela ly Babulon pri ai Pasia empara samrang Kuru my tiu iy, peang vui nai deung tym pa-rei, samrang i yhm y awm nai ne.