33
(Ezek 3:16-21)
1 Areng i leu ly kai teng y tym.
2 Mymy ly “Nang khumicho awi, kai ly pri harei y tavai ka-jeira tym hai nai khala, huni pri y ati mana naichi tym mo, nanai nang i khumichi teng y thui pi. Khumi mipuichi ly mymychi theung i leaungrei ai tamcheaung y vawi takhra u bo.
3 Ni ly paleung ka-e jeu tapai nai niu baly, khumi bawibawichi ai pany hai ai nai baw eng pi ai nai tla.
4 Na i py khumi leaungrei ly huni pany hai nai katyn thai iy dawndan y naimy awm lawh baly, paleung ka-e ly jeu iy ni ai tleh vui baly, ni i dei nai ly my i kamngo ne i, ni i thi ly mymy i lu tleaung y tym bo.
5 Ni i dei nai ly mymy i tamang nai molam ne i, ni i thi ly my i lu tleaung y tym nai tla. Ati mana nai mo na baly ni ly pany hai nai ai dawndan y nai deaungkho y ne. Ni ly dawn patyp lawh i khyly, ni ly deira i nai tleaung ai.
6 Na i py tamcheaung ly paleung ka-e ang jeu nai niu iy pany hai nai baw eng y naimy awm lawh baly, paleung ka-e ang jeu iy leaung leaungrei tleh naira avum baly huni khumi ly mymy i kamngo y dei teu i py, huna nai dei nai khumi i molam ly tamcheaung i phu ne ai.
7 “Nang khumicho awi, vai kai ly nang ai Israela chengchi i vui tamcheaung y kang khai ai. Nang ly kai i pany hai naichi ai nichi teng y thui pi ai nai tla.
8 Kaimy khumi hawi y nai leaungrei ai dei ai nai tla, nanai thui baly, nang ly huni khumi dei y ai nai ni i sa nai sai takhra vui ai nai pany hai pi ai nai tla. Pany hai pi y lawh baly, ni ly kamngo sa nai khumi ne i dei ai. Huna nai khala kai ly huni dei nai khumi i thi molam y, nang i phu ne ai.
9 Nang ly khumi hawi y nai ai parip teu i py, ni ly kamngo sa veangveang iy kamngo deaungkho y dei lawh baly, nang ly deira i nai tleaung ai,” napi.
10 Areng i leu ly kai teng y tym. Mymy ly “Nang khumicho awi, Israela chengchi teng y thui pi ai nai ly: nangchi my, ‘Achi ly amychi i kamngochi, amychi i tamang nai hawi myn kaji pho naimy awm u bo. Achi ly atho bai naimy awm u bo. Ati mana nai achi heng u pajau ai mo?’
11 Sa thai naira angym nai kai Areng ly Tameuh kangheng ne nai deaungkho y, kaimy kang thui pi nai ly ami mo leaungrei kamngo sa iy dei nai niu ai nai ngai y. Huni khumi kamngo sa nai anawn iy heng nai naini kaniu ai nai ngai. Nangchi Israela chengchi awi, nangchi i sa thym nai kamngochi anawn u jau; ati mana nai y dei ai nai ngai u lawh mo?
12 “Nang khumicho awi, khumi kahawi kamngo sa nai khala, mymy i hawi sa naichi my ni ai atleu pajau ai ny y, nanai ly Israela chengchi teng y thui pi. Khumi hawi y nai ly mymy i hawi y sa naichi anawn vui lawh baly, ni ly kamngo pajeng naira avum ai ny y. Khumi kahawi ly kamngo sa nai khala, ni ly hengra nga ai ny y.
13 Kai ly khumi kahawi ai heng hai ai, nanai adeu teu i py, ni ly my i kahawi sa nai ai a-ym cheng naimy kamngo sa tamang lawh baly, kai ly ni i atiti kahawi sa nai ai py, pany pi ai ny y. Ni ly mymy i kamngo molam y dei ai nai ne.
14 Kai ly khumi hawi y nai ai dei ai nai tla, napi nai deaungkho y ni ly mymy i kamngo sa tamang naichi anawn iy, kateng kataw kahawi sa lawh baly,
15 leu kabeaung y ka-peaung talam nai vawnsai, um paviu nai vawnsaichi pei ali teang i, kamngo sa nai anawn vui iy heng nai reitachi tangai lawh baly, ni ly dei y naimy heng ai.
16 Ni i sa tamang nai kamngochi py kaimy pahen pi ai. Kataw kateng sa nai molam y ni ly heng ai.
17 “Na i py nang i chengchi my, Areng ly kahawi so pi y, nanai thui u lawh ly! Nichi naini kahawi so u y nai ne.
18 Khumi kahawi ly kateng sa nai anawn iy hawi y naira sa nai khala, huni hawi y nai molam y ni ly dei ai.
19 Khumi hawi y nai ly kamngo sa nai khai su iy kateng kataw sa lawh baly hengra nga ai.
20 Na i py nangchi Israela chengchi awi, nangchi my kai i sa nai ly teng y, nanai thui u bo. Kai ly nangchi i sa nai molam y nangchi ai tara chih ai,” napi.
21 Ref 33.21: 2 Areng 25:3-10; Jer 39:2-8; 52:4-14. Achi pri palara avum nai saneng holai nyhrei saneng, lo horei, lo si kani pangrei kani y, Jerusalem mary i dengdairei tleaung nai khumi leaungrei ly ang jeu iy kai teng y paleung ka-e i kiu y Jerusalem mary tym vui nai satang ang thui pi bo.
22 Huni khumi tym y rai nai dym tengsa neng y, Areng i sa thai naira ly kai ai ang khiu nai ne. Khawn khutawi huni khumi ang tym nai neng khala, Areng my leu katheu thai ai nai kai ai ang pei ali teang bo. Hunai deaungkho y kai ly leu katheu y nai awm y naimy, leu katheu pajau nai ne.
23 Areng i leu ly kai teng y tym.
24 Mymy ly “Nang khumicho awi, Israela pri i phra seaungkhrang nai marychira y awm nai khumichi my, ‘Abraham ly khumi leaungrei ne teu i py, hini pri verei y amtym nai ne. Vai, achi ly vuikanai nawi naichi ne iy hini pri y achi amtym ai nai nga bo,’ nanai thui u.
25 “Sa thai naira angym nai kai, Areng my nichi teng y leu pei nai ly: nangchi ly mawi hawi vanrei thi py cha u. Mynchi chiu iy khumi ai py padei u. Na i py hini pri ai nangchi amtym bo, nanai ati mana nai dawn u lawh mo?
26 Nangchi ly nangmychi i haisau ai a-ym u nai ne. Nangchi i atiti sa naichi py paso ai nai hawi parai. Khumi luteng py ami i aju chanau taphra u. Na i py hini pri ai nangchi amtym u bo, nanai ati mana nai nangchi dawn u lawh mo?
27 “Kai ly Tameuh kangheng ne tatang; hunai y phra seaungkhrang nai marychira y awm nai khumichi ly tleh naira avum u ai, nanai sa thai naira angym nai kai, Areng i pany hai nai leu nichi teng y thui pi. Daichi avangchira y awm nai khumichi ly daichi mawichi i teicha lawm ai. Mawichi hawi tapiuchira y aheu nai khumichi ly no-na y dei u ai.
28 Kai ly huni pri y khumi angso savai tlang nai meingtym lawm hai ai. Khumi mipuichi amlyhra lawm nai sa thai naira py tama vui ai. Amimi py aki aleaung thai y na pa-rei, Israela mawichi ly khumeung khuram lawm ai.
29 Kai ly khumichi ai kamngochi molam y pajeng iy, nichi i pri ai py khumi angso savai tlang nai meingtym lawm hai nai khala, kai ly Areng ne, nanai nichi pany u ai,” napi.
30 Areng my, “Nang khumicho awi, nang i chengchi ly mary apaichi sahawi y py, nangmychi yhm katheu pa-khochira py avum u nai khala, nang i satang thui u nai ne. Nichi my, ‘Areng ly ati leu pei mo, nanai vai achi chei iy tangai u sina,’ nanai mymychi tengtawi arum u bo.
31 Hunai deaungkho y kai i khumichi ly nangmy thai hai ai awm nai leu tangai ai nai, nang i mo y ang tym u bo. Na i py nichi ly nang i thui nai kamta so u y. Leu khulym kahawi katheu u teu i py, atakaw nai paleung awm nai kamta sa u.
32 Nichi i vui y nang ly tavawi leungngai khulymchi thui pi, beu pi, paleung pahawi pi nai khumi naini lawm bo. Nichi ly nang i thui nai leu ngiereichi thai u teu i py tangai u y.
33 Na i py nang i thui nai ngiereichi ly teng khyp ai i angym nai khala, nichi theung y amo leaungrei tym bo, nanai nichi pany u ai,” napi.