32
1 Achi pri palara avum nai saneng holai nyhrei saneng, lo holai nyhrei, lo si kani harei kani y, Areng i leu ly kai teng y tym.
2 Mymy ly “Nang khumicho awi, Aikupta samrang teng y hawihai palai pany hai ai nai ly: nang ly khumi cheng cheaungkhangchi tlang tleaung y khrangsi kamta sa teu i py, tavo theung y tui taby iy panu hai nai satam hawi atawm keh. Nang i kheu hawi tavo tui panuta hai ai nai lilu piu bo.
3 Khumi cheng cheaungkhangchi awm achu nai khala, kai ly nang ai paleupy hawi mym iy patiu nai kacheng y ryh hai ai.
4 Naibaly kacheng y takhyh hai iy angdym mang y ryh ai. Khaileaung pri y awm nai tavochi hawi daichi mawichi i teicha lawm ai.
5 Nang i veaung nai veu ly mawichi, leaunghawichira y kawi na ai.
6 Khaileaung y nang i thi hawi suinie hai ai. Huni thi ly mawi saleung y khrairei sui ai. Tavo micheaungchi py nang i thi kawi na ai.
7 Ref 32.7: Is 13:10; Mt 24:29; Mk 13:24,25; Lk 21:25; Amt 6:12,13; 8:12. Nang ai kang tamyh nai neng khala, kai ly kani khusang khiu vui iy ka-si taukichi tama hai ai. Kanito py khupanym my deng hai vui ai. Lo py kangvang pei ai ny y.
8 Kai ly kani mang i kangvang ngiereichi ai veng hai iy, nang i pri y kaveng tym hai ai. Hini ly sa thai naira angym nai kai, Areng i pei nai leu ne.
9 Nang ly mana khala py thai vai y nai prichi mang y, nang i phra nai satang kaimy ahei hai nai khala, khumi cheng cheaungkhangchi ly paleung phra naira tym u ai.
10 Kaimy nang ai kang sa nai molam y khumi neangneangchi ly kaso theu nai mynkym u ai. Kai ly haisau lilei nai khala samrangchi ly jei nai kaso theu u ai. Nang atlym nai kani y nichi bawibawi py, mymychi i hengra molam y paleung mawn u ai i, kaso theu u ai,” napi.
11 Sa thai naira angym nai Areng my Aikupta samrang teng y, “Nang ly Babulon samrang i haisau hawi avum ai.
12 Kai ly pahyp y nai khumi chengchi i tavaimichi ai haisau pa hai iy, nang i khumi bawibawichi ai tleh hai ai. Nang i khumi bawibawichi hawi, nang i amlyh hai nai atitichi ly taphra naira avum ai.
13 Kai ly nang i tawnbawichi ai, nichi i tui nei nai tui sampum tleirei y katleh ai. Tui panu hai ai nai khumi hawi tawnbawichi awm bi ai ny y.
14 Kai ly nang i tuichi pachem hai iy nang i tavochi py olive asitui kamta amchyh y naimy leaung hai ai. Hini ly sa thai naira angym nai kai, Areng i pei nai leu ne,” napi.
15 Aikupta pri y khumi angso savai tlang nai meingtym lawm hai ai i, yhmtheaung katuichi hawi, huni pri y awm nai khumi bawibawichi ai tamyh pawn nai khala, kai ly Areng ne, nanai nichi pany u ai.
16 Hina nai kaimy hawihai palai thui pi kheng nai leuchi ly vo sai lawm ai. Neampachychi ly Aikupta pri hawi huni pri khumi bawibawichi i vui vo hai iy, huni vo sai hawi vo hai ai. Hini ly sa thai naira angym nai kai, Areng i pei nai leu ne,” napi.
17 Achi pri palara avum nai saneng holai nyhrei saneng, angchei i lo, lo si kani holai pangrei kani y, Areng i leu ly kai teng y tym.
18 Mymy ly “Nang khumicho awi, Aikupta pri khumi neangneangchi i vui y vo tangam hai ba. Nichi ai sa thai naira awm nai cheng takhra khumichi i chaniu anglochi hawi vanrei tavau pri y pato ba.
19 Nichi teng y thui pi ai nai ly:
nangchi ly khumi takhrachi tleaung y khri pa-rei apu, nanai adawn u nai sai a?
Nangchi ly dei naichi i tavau pri y ang vum iy
lengkhym takip y nai khumichi hawi vanrei aseaung u.
20 Aikupta khumichi ly tavai keung y dei nai khumichi hawi vanrei dei u ai. Aikupta khumi bawibawichi ai tamyh pawn ai nai haisau ly khai yb bo.
21 Khrikhri pa-rei ham nai soraichi my, Aikupta pri i khumichi hawi nichi mang y asa hai nai khumichi ai tavau pri mang dengdairei lamchung ai. Nichi my, ‘Tavai keung y dei u nai lengkhym takip y nai khumichi ly hini meingtym y kathiu iy i u bo!,’ nanai aeu u.
22 “Asuria ly mymy i tavaimichi i tapreaungchi my katanmeuh nai, huni meingtym y awm. Nichi bawibawi ly tavai keung y dei naichi ne.
23 Nichi i tapreaungchi ly tavau pri i thiu keh naira y awm. Asuria i tavaimi bawibawichi ly tavai keung y dei u iy, nichi i tapreaungchi ly Asuria i lengseaung takeu nai angawm ai katanmeuh nai ne. Na i py vaichi khala y nichi ly heng nai khumichi ai kaso theu hai nai khumichi ne.
24 “Elam ly mymy i tavaimichi i tapreaung my katanmeuh nai, huni meingtym y awm. Nichi bawibawi ly tavai keung y dei naichi ne i, lengkhym takip y naimy tavau pri y ang vum kathiu nai khumichi ne. Heng nai thym khala nichi ly khumi takhrachi ai jei hyn na pa-rei sa u teu i py, vai ly tavau pri y ang vum kathiu naichi hawi vanrei, tahm by y naimy dei u bo.
25 Elam ly tavai keung y dei nai khumichi hawi vanrei aseaung naimy awm. Na i py tengpang sahawi y tavaimichi i tapreaung awm. Nichi bawibawi py lengkhym takip y nai khumichi hawi tavai keung y dei u naichi ne. Nichi ly heng nai thym khala khumi takhrachi ai jei hyn na pa-rei sa u teu i py, vai ly tavai keung y dei nai khumichi i khym taham avum naimy, tavau pri y ang vum kathiu naichi hawi vanrei tahm by y naimy dei u bo.
26 “Mesheka hawi Tubal nini ly myni i tavaimi tapreaungchi my katanmeuh nai, huni meingtym y awm. Nichi bawibawi ly lengkhym takip y naimy tavai keung y dei u iy, tavau pri y ang vum kathiu u nai ne. Na i py nichi ly vaichi khala heng nai khumichi ai jei hyn hai nai khumichi ne.
27 Nichi ai ly tavai ateaung kangym amthyp naimy tavau pri y ang vum kathiu nai, jangni i sorai kalenchi kamta mymychi i haisauchi ai luchi anui y py, khopuichi ai paleungchi tleaung y py khai iy, tahm khai naimy pavum ai nai ngo y. Nichi ly lengkhym takip y naimy dei chum nai tavaimichi hawi vanrei aseaung u bo. Hini tavaimichi ly vaichi khala, heng nai khumichi ai jei hyn na pa-rei sa thai naira awm nai khumichi ne.
28 Aikupta khumichi ly tavai keung y dei nai lengkhym takip y nai khumichi hawi vanrei, sum naira avum nai ly hina nai kamta ne.
29 “Edom py my i samrangchi, samrang i chapochi hawi vanrei huni meingtym y awm. Nichi ly sa thai naira awm nai tavaimichi ne teu i py, vai ly tavai keung y dei nai lengkhym takip y nai khumichi hawi vanrei tavau pri y aseaung u bo.
30 “Tosyh mang i samrang i chapochi hawi Sidon mary i khumichi py huni meingtym y awm; vaichi khala mymychi i sa thai naira hawi khumi takhrachi ai jei hyn na pa-rei sa u teu i py, vai ly tavai keung y dei nai khumichi hawi vanrei tahm by y naimy dei iy, lengkhym takip y nai khumichi hawi vanrei tavau pri y ang vum i, tahm by y bo.
31 “Aikupta samrang hawi mymy i tavaimichi ly tavai keung y dei nai huni khumi bawibawichi ai niu nai khala, amymychi ai paleung apahawi pajau ai,” nanai sa thai naira angym nai Areng my leu pei nai ne.
32 “Aikupta samrang ly heng nai khumichi ai jei hyn na pa-rei sa bo. Na i py ni hawi ni i tavaimi bawibawichi ly tamyh naira avum u bo. Tavai keung y dei nai lengkhym takip y nai khumi bawibawichi hawi vanrei a-up nai avum ai.” Hini ly sa thai naira angym nai Areng i pei nai leu ne.