1 Areng i leu ly kai teng y tym. 2 Mymy ly “Nang khumicho awi, kreip keung ly dengkeaung keung hawi ati takhra naira awm mo? Kreip angjyn changpi ly daichi theung i dengkeaung changpichi hawi teaung naira y hawi nai sai atawm ai? 3 Nang ly kreip angjyn changpi hawi ati amjy sa thai mo? Vawnsai ha harei bang ai nai huni kreip angjyn changpi ai vawnra y teaung thai a? 4 Kreip keung ly mai sa ai naini hawi khyh; kadeaung mang amtawi iy laileaung ly maidym lawm veng nai khala, nang ly huni kreip keung ai sai saireira y teaung thai a? 5 Huni ly mai y patawi y nai khala py, atira py teaung ai nai ngo y. Mai y patawi iy maidym lawm vui nai khala py, teaung ai nai ngo y ra nai ne,” napi.

6 Sa thai naira angym nai Areng my leu pei nai ly “Kreip keung ai daichi i nai la iy mai y tei nai kamta, kai ly Jerusalem mary i khumichi ai pahawi iy, 7 kapajeng ai. Nichi ly mai i nai tleaung u i py vai, mai harei my kang vui ai. Huni khumichi pajeng naira avum nai khala, kai ly Areng ne, nanai nangchi pany u ai. 8 Nichi ly kai i tlang tleaung y ka-ym by y nai deaungkho y, kai ly nichi i pri y khumi angso savai tlang hai ai,” napi. Hini ly sa thai naira angym nai Aeng i thui nai leu ne.