14
1 Israela cheng lu sa nai phyreichi ly kai teng jeu iy, kai i mo y ateh u.
2 Huna nai khala Areng i leu ly kai teng y ang thui pi nai ne.
3 Mymy ly “Nang khumicho awi, hini khumichi ly mynchira y paleung apei u nai y, huni mynchi my nichi ai tamang hai bo. Nichi ly kai teng i leu pathang nai nga u ai nai athang khai u a?
4 “Sa thai naira angym nai kai Areng my nichi teng y ati mana leu pei mo, nanai thui pi. Mymy ly Israela cheng ngiereichi myn chiu ai nai paleung apei u nai deaungkho y, huni mynchi my nichi ai tamang hai bo i, amo teng y ahihawi iy leu deng bo. Huni khumi teng y kai, Areng my leu pathang ai. Huni pathang nai leu ly huni khumi i chiu nai mynchi i vui ne.
5 Huni mynchi ly Israela chengchi ai kai hawi akhan hai bo. Na i py nichi ly kai i pathang pi nai deaungkho y, kai i tlang tleaung y ka-ym awm u ali teang ai.
6 “Huna nai y Israela chengchi teng y thui pi; sa thai naira angym nai kai, Areng my leu pei nai ly uikheih u. Amso ngai hawi nai nangchi i sa naichi ai nyn va vui ly mynchi py khai su.
7 “Israela cheng, ti y baly Israela pri y awm nai cheng takhra khumichi ly kai ai khai su iy amo teng y leu deng ai nai chei nai khala, kai, Areng my nichi ai pathang pi ai!
8 Kai ly nichi ai ka-awi kasa ai. Nichi ai amtiu naira hawi kangji pei nai lawm ai nai kai ly teang ai. Kai i khumi kamkawm theung i nai patheu vui ai. Huna i naini kai ly Areng ne, nanai nangchi pany u ai.
9 “Amo ly parawi naira avum iy teng y nai amo leu katheu baly, huni amo ai kai, Areng my parawi nai ne. Kai i kiu pheu naimy ni ai tiu iy Israela cheng theung i nai patheu vui ai.
10 Huni amo hawi ni teng y leu deng nai khumichi raurei, pajeng naira avum ai.
11 Israela chengchi ly kai ai khai su nai y, mymychi kypkyp kamngora anum y ai nai hina nai kasa ai. Nichi ly kai i khumichi lawn ai i, kai py nichi i Tameuh lawm ai,” napi. Hini ly sa thai naira awm nai Areng i thui nai leu ne.
12 Areng i leu ly kai teng y tym.
13 Mymy ly “Nang khumicho awi, pri harei ly kamngo sa iy kai i tlang tleaung y ka-ym by y lawh baly, kai ly kiu pheu iy huni pri y teicha teinei avaw hai ai. Tahum takang theu hai ai i, khumichi hawi tawnbawichi raurei katamyh ai.
14 Huni pri y Nova, Daniela hawi Joba nichi leaung thomrei awm u lawh teu i py, nichi i hawi naira my nichi ai naini atleu iy takhra khumichi ai ly atleu pajau ai ny y,” napi. Hini ly sa thai naira awm nai Areng i thui nai leu ne.
15 “Ti y baly kaimy khumichi ai tamyh ai nai mawi kasichi pato ai; huni pri y khumi angso savai tlang iy aki aleaung thai y na pa-rei, mawi kasichi deaungkho y khri pa-rei ka-jeira awm ai.
16 Huna nai khala kai, Areng ly Tameuh kangheng ne nai deaungkho y, huni pri y huni khumi leaung thomreichi awm lawh teu i py, mymychi i cho chanauchi ai atleu u pajau ai ny y; mymychi ai naini atleu u pajau ai khyh. Huni pri py khumi angso savai tlang ai.
17 “Ti y baly kaimy huni pri y tavai atiu hai ai i, khumi hawi tawnbawichi raurei tamyh pawn ai nai taphra thai nai haichi pato nai khala y,
18 sa thai naira angym nai kai, Areng ly sa khyp nai deaungkho y, huni khumi leaung thomreichi ly huni pri y awm lawh teu i py, nichi ly mymychi i cho chanauchi ai malawn py atleu u pajau ai ny y; mymychi ai naini atleu u pajau ai khyh.
19 “Kai ly huni pri y no kanghawi tym hai iy kado theu naira my khumi neangneangchi hawi, tawnbawi neangneangchi ai dei hai baly,
20 sa thai naira angym nai kai, Areng ly sa khyp nai Tameuh kangheng ne nai deaungkho y, Nova, Daniela hawi Joba nichi leaung thomrei ly huni pri y awm teu i py, nichi ly mymychi i cho chanauchi ai malawn py atleu u pajau ai ny y; mymychi i hawi naira my naini mychi ai atleu u pajau ai,” napi.
21 Ref 14.21: Amt 6:8. Sa thai naira angym nai Areng my leu pei nai ly “Kai ly khumi hawi tawnbawichi tamyh ai nai tavai takai, tahum takang, mawi kasichi hawi no kanghawi napi nai, hawi y keh nai pajeng naira amjy palyhrei, Jerusalem mary y tym hai ai.
22 Huni pajeng naira i law tleaung nai cho chanau awm iy nichi ly nangchi teng y ang tym u nai khala, nichi i amhi amtlau nai khen iy Jerusalem mary y kaimy pajeng nai ngiereichi py, teng nanai hawihai pany ai;
23 nang ly nichi i amhi amtlau nai saichi niu nai khala, kai ly ati mo ra py so atyhtyh y leang, nanai hawihai pany ai,” napi. Hini ly sa thai naira angym nai Areng i thui nai leu ne.