14
Phailo i amtheaung nairachi pany hai bi nai
1 Tamen naira ai ly hui u veangveang ly; ne mang ly phailo mang i atiti sa thai nairachi pei nai ai py khri pa-rei ngai u; na i py nangchi ly leu thui thai ai naira ai ipsaly khri pa-rei ngai u ba.
2 Leu athai y nai thui nai keung ly khumi teng y thui nai ny y i, Tameuh teng y thui nai teu; ati mana nai mo nabaly mymy i leu thui nai ly ami py pany thai y; na i py mymy ly phailo y ly leu kathiu thui nai ne.
3 Leu thui nai keung naini khumichi teng y khaw hai nai leu hawi, pachei nai leu hawi, awm hai nem nai leu py thui reng.
4 Leu athai y nai thui nai keung ly amy leaungrei ai akhaw hai nai teu, leu thui nai keung naini palau takhra kamkawm ai khaw hai nai ne.
5 Naibaly nangchi bawibawi ly leu athai y nai thui ai nai kang ngai hai, na i py nangchi ly leu thui ai nai ipsaly kang ngai hai ra nai ne; palau takhra kamkawm ly khaw hai naira nga thai ai nai, thui pi pachai nai ny y baly leu thui nai keung ly leu athai y nai thui nai keung tleaung y tahm asang keh.
6 Naibaly vai ly amjo amnauchi awi, kai ly leu athai y nai thui iy nangchi teng y kang jeu iy khyly, amteng hai naira mang y mo, pany naira mang y mo, leu thui naira mang y mo, patiu naira mang y mo, nangchi teng y kang thui pi y baly kai ly nangchi ai ati amran hai ai mo?
7 Atiti hengra by y nai tyn thai naichi py, byhlyh mo, taro mo ly, sailang kamny tyn y baly atiti eng mo, nanai mana pany thai ai mo?
8 Baw ly sailang amny y naimy tyn baly tavai atiu ai nai ami angvei ai mo?
9 Hunai kamta teang nangchi py palai y pany rai y nai leu thui u y bay, ati leu thui nai mo, nanai mana pany thai ai mo? Nangchi ly ali y thui atyhtyh nai kamta atawm ai chy bo.
10 Khaileaung pri y leu takhra takhra neangneang awm ngaw khyh, naibaly awm nai sai by y nai ly ha py by y leang.
11 Hunaibaly kai ly leu awm nai sai pany thai y baly, thui pi nai keung i mo y cheng takhra khumi kalawn ai, naibaly thui pi nai keung py kai i mo y cheng takhra khumi lawn teang ai.
12 Hunaibaly nangchi py phailo mang i atiti sa thai nairachi pei nai ai khri pa-rei ngai u nai deaungkho y, palau takhra kamkawm ai khaw hai ai nai kawp pa-rei sa ai nai hau u.
13 Hunai deaungkho y leu athai y nai thui pi nai keung ly, thui pi pachai thai ai nai chiu so sy.
14 Ati mana nai mo nabaly leu athai y nai chiu kasa baly, kai i phailo my ly chiu sa, na i py kai i pany thai naira ly kamran awm lawh y leang.
15 Tumbaly mana kasa ai mo? Phailo y chiu kasa ai i, pany thai naira y py chiu kasa teang ai; phailo y khulym kathui ai i, pany thai naira y py khulym kathui teang ai.
16 Ti y baly phailo y nang ly amtheaung hai baly, neangneang pany y naichi i awm naira y awm nai khumi my ly nang i kawn nai leu thui naira y ly leu thai y pui baly, mana Amen napi thai ai mo?
17 Nang i kawn nai leu thui nai ly hawi parai veng, na i py khumi takhra ai ly khaw hai naira ngo hai lawh y leang.
18 Kai ly nangchi bawibawi tleaung y leu athai y nai kathui nawi keh nai deaungkho y Tameuh teng y kawn nai leu kathui;
19 na i py palau takhra kamkawmchi i achu naira y ly leu athai y nai meaungkateaungrei thui nai tleaung y ly, khumi takhrachi ai kapatiu thai ai nai, kaimy i pany thai naira y leu sai pangrei chy thui ai nai kangai keh.
20 Amjo amnauchi awi, paleung y ly deaungdi kamta awm u reng moh; ne mang ly kamngora y ly deaungdi chymplei nai kamta awm u ly, na i py paleung y ly khumi ka-cheang lawn u.
21 Reita cha-iu y ly, “Kai ly leu takhra khumichi i saho y hawi, cheng takhrachi i labeaung y py hini khumichi teng y leu kathui ai; huna i py nichi ly kai ai tangai pi lawh y ai, nanai Areng my napi,” nanai tajiu nai ne.Ref 14.21: Is 28.11–12
22 Hunai deaungkho y leu athai y naichi ly ym naichi i vui ka-ma-ra ny y leang, ym y naichi i vui teu; leu thui nai naini ym y naichi i vui ka-ma-ra ny y leang, ym naichi i vui teu.
23 Hunai deaungkho y palau takhra kamkawm bawibawichi ly achu iy, leu athai y nai thui u bebe khyly, neangneang pany y naichi mo, ym y naichi mo kun u khyly, nichi my ly pathu ang tapi y ai a?
24 Na i py nangchi bawibawi leu thui u khyly, ym y nai khumi mo, neangneang pany y nai khumi mo kun i khyly, bawibawichi my ni ai pasum ai, bawibawichi my ni ai padeng ai, ni i dawn paviu naichi ly amteng hai ai;
25 hunaibaly ni ly ambeu iy Tameuh ai chiu ai i, Tameuh ly nangchi theung y awm tatang, nanai thui ai.
Chiu sa achu nai
26 Amjo amnauchi awi, tumbaly mana sa ai mo? Nangchi ly achu u nai khala y ly leaung leaungrei ly palo nai khulym mo, leu patiu nai mo, amteng hai nai leu mo, leu athai y nai mo, thui pi pachai nai leu mo awm u bawibawi veng.
27 Ati cheaungkhang ly khaw hai ai nai sa nai ne sy. Ami py leu athai y nai thui baly leaung nyhrei mo, nawi keh nai leaung thomrei mo thui u sy, naibaly ka-thui thui thli thui thli sy;
28 naibaly khumi leaungrei my thui pi pachai sy; na i py thui pi pachai nai keung by y baly palau takhra kamkawmchi i achu naira y ly katheu y naimy awm sy ly, amymy teng y hawi Tameuh teng y py thui sy.
29 Naibaly leu thui nai keungchi py leaung nyhrei mo, leaung thomrei mo thui u sy ly, khumi takhrachi ly hawi hai palai dawn u pasym sy.
30 Na i py ahawi y ateh nai khumi takhra teng y amteng hai nai leu awm baly angchei i khumi ly katheu moh sy.
31 Khumi bawibawichi amtiu u thai ai nai hawi, khumi bawibawichi paleung awmnem naira nga thai ai nai py, nangchi bawibawi ly leaung leaungrei leu thui pajau.
32 Leu thui nai keungchi i phailo ly leu thui nai keungchi i ngaingai awm nai ne;
33 ati mana nai mo nabaly Tameuh ly khrukhra nai Tameuh ny y leang, aly nai Tameuh ne lawh veng; khumi kachaichi i achura yhm bawibawi y hunai kamta ne teang.
34 Neampachychi ly palau takhra kamkawmchi i achu naira y ly leu katheu u moh sy; nichi ai ly leu thui ai pei nai ny y leang; Reita cha-iu y thui nai kamta ly leu phai patawm u sy.
35 Naibaly nichi ly ati py amtiu ai nai ngai u baly, yhm mang y mymychi i juvochi teng y deng u sy; palau takhra kamkawmchi i achu naira y neampachy leu thui nai ly angji ngailai veng.
36 Mana! Tameuh i leu ly nangmychi teng i theu nai a? Ti y baly nangmychi teng y harei tym nai khyh a?
37 Ami py leu thui nai keung y mo, phailo mang y asa nai keung y mo apalawn baly, nangchi teng y kai i leu tajiu nai ly Areng my leu ang pei nai ne, nanai pany sy.
38 Na i py ami py pany y baly, pany y naimy awm palai sy.
39 Hunaibaly amjo amnauchi awi, leu thui ai nai ly khri pa-rei ngai u, naibaly leu athai y nai thui nai py kam u moh;
40 na i py ati cheaungkhangra y apu parai nai hawi, hawihai palai ka-thui sa nai ne sy.