13
Tamen naira
1 Kai ly khumi i leu y hawi kani pri i amtaw thau naichi i leu y leu thui iy py, tamen naira by y pui baly, kai ly kheupaja pakhau nai katyn mo, sa-ra thip nai katyn mo kalawn bo.
2 Naibaly kai ly leu thui thai ai naira awm iy, leu kathiu bawibawi hawi pany naira bawibawi pany bebe iy, mawi asyh vui pajau ai nai pa-rei ym naira kangym awm iy py, kai ly tamen naira by y pui baly kai ly ati sai py ny y leang.Ref 13.2: Mt 17.20, 21.21; Mk 11.23
3 Naibaly khumi kamawnchi ai pacho ai nai kai i yhmtheaung bawibawi pei iy, kai i tlang ai py kang ai nai ka-pei iy py, kai ly tamen naira by y pui baly kai i vui ati sai py kamran by y leang.
4 Tamen naira ly kham py kham pajau,neaung py hawi; tamen naira ly paleung py ano y; tamen naira ly palo py apalo y, am-e py am-e y,
5 amhi amtlau nai sai py apu y nai by y, amy i vui py hau y, kado theu ai nai py ngai y,
6 kamngo mang y py dawn y; hawi y naira y py kawn y, leu meitang y naini kawn hai;
7 ati cheaungkhangra y kham tanga, ati cheaungkhangra y ym, ati cheaungkhangra y athang khai, ati cheaungkhangra y kham pajau tanga reng.
8 Tamen naira ly mana khala y py anawn y; na i py leu thui nairachi ly awm iy py anawn hai ai, leu athai y naichi ly awm iy py anawn ai, pany naira ly awm iy py anawn hai ai.
9 Achi ly angym y naimy pany i, achi ly angym y naimy leu thui nai ne.
10 Na i py angym naira ang tym nai khala y ly angym y naira ai ly anawn hai ai.
11 Kai ly deaungdi khala y ly deaungdi i leu kamta katheu i, deaungdi i pany nai kamta kapany iy, deaungdi i dawn nai kamta kadawn; vai ly khumi kacheang nai bo y ly deaungdi i sa nai sai ly ka-nawn bo.
12 Vai ly achi ly dengkhang apui y niu vuivai nai ne, na i py hunai khala y ly moatha ai; vai ly angym y nai kapany, na i py hunai khala y ly kai ai ang pany angym nai kamta kai py kapany angym ai.
13 Hunaibaly hini thomrei, ym naira hawi, athang khai naira hawi, tamen naira py awm jojo ai; naibaly hinichi theung y len keh nai ly tamen naira ne.