5
Uikheih hai ai nai palau nai
1 Aw Israela khumichi awi, nangchi ai veu pavum ai nai, kai i thui nai hini vo khulym tangai u.
2 Anglo lengmyn Israela ly
mana khala py ang thau teang pajau y na pa-rei atlym!
Khaileaung salo y, mymy tlairei atlym bo;
ni ai pathau ai nai ami py by y.
3 Sa thai naira angym nai Areng my, “Israela mary harei i dengdairei, tavaimi leaung sangrei tavai amsa teu i py, leaung chungvairei naini ali teang ai. Khumi leaung chungvairei pato nai mary ly leaung horei naini avum teang ai.
4 Areng my, “Israela khumichi awi, kai teng y ali u teang jau; naibaly nangchi heng u ai.
5 Beraseba mary mang y chei iy chiu u moh. Bethela mary mang y kai ai hau u moh. Bethela mary ly ati sai py ny y nai lawm ai. Kilakala mary mang y py chei u moh. Huni mary i khumichi ly pri takhra mang y paryh pawn nai avum takengkei ai.
6 Areng teng y chei u; hunaibaly nangchi heng u ai. Huna ny y baly mymy ly Israela khumichi i tlang tleaung y, mai kamta ang tym ai. Mai ly Bethela mary i khumichi kang be iy, huni mai ai ami py pathym pajau ai ny y.
7 Khumichi i nga ai avo naichi ai athorei my paka iy, leu meitang taphra nai khumichi awi, nangchi ly taham kasi avum takengkei ai!” napi.
8 Areng ly ka-si taukichi ai sa. Ref 5:8 Job 9:9, 38:31
Mymy ly ka-si niprawn hawi eupui eulo ka-jeaung ka-si ai py sa nai ne.
Mymy ly kaveng ai kangvang lawm hai iy,
kanithun ai py vum lawm hai bo.
Mymy ly pangli tui bawibawichi ai palau iy,
khaileaung salo y leih nai ne.
Mymy i amyn ly Areng ne.
9 Mymy ly atho awm nai khumichi hawi nichi i amtangrachi taphra pawn bo.
10 Tara jeungchira y teng y nai ai thui tamawn iy, leu meitang katheu nai khumichi ai naini, nangchi ly niu ngai u y lawh.
11 Nangchi ly khumi kamawnchi ai ana iy, nichi i chohpui chomaw ai lawm u bo. Hunai deaungkho y nangmychi sa nai yhm hlau kahawichira y, nangchi ly awm ai nai ngo u y. Nangmychi ui nai apu parai nai kreip akho i, kreip hang py nei ai nai ngo u y.
12 Nangchi ly mana tanrei kamngo sa tamang iy, nangchi i kamngo ly mana tanrei jei ai hawi na mo, nanai kai pany. Nangchi ly khumi kahawichi ai ana iy, un tangka cha u. Khumi kamawnchi ai kateng chih y naimy, nichi ai tara jeung i dengdairei patheu u nai ne.
13 Hina tanrei hawi y nai deung y, khumi kahawi i leu amkyn vui nai ly lyh ai nai by y.
14 Nangchi ly tlang heng ai nai molam y hawi y naichi khai su iy, kahawi naini hau ly so u. Hunaibaly nangchi thui nai kamta, kani pri tavailuchi i Areng Tameuh ly nangchi hawi vanrei awm takengkei ai.
15 Hawi y nai ai niu ngai moh ly hawi naira ai ly paleung apei ba. Tara jeungchira y leu meitang awm ai nai akry u. Kani pri tavailuchi i Areng ly hini khumichi theung i heng rai nai khumi phyreichi ai, pahen tan pahen lym ai.
16 Hunai deaungkho y ati cheaungkhang sa thai nai Areng my, “Mary theung i lamchira y paleung si ai hawi nai vo raawi, seng meingtymchira y tangam nai raawi thai ai. Vo khulym kawp naichi hawi vanrei jeu iy, vo ai nai li sa keungchi ai palau ai.
17 Kreip akhochi dengdairei vo raawichi thai ai. Kai ly nangchi ai pajeng ai nai kang jeu nai deaungkho y, hina nai tym ai,” nanai Areng my leu pei nai ne.
18 Areng i neng kani ajeng nai khumi i vui ly khri pa-rei ka-jei hawi parai na ly! Huni neng kani ly nangchi ai ati kahawi ang sa pi thai ai mo? Kangvang by y naimy kaveng khiu nai neng kani naini tym ai.
19 Huni kani ly nangchi i vui khrangsi ai jei i, angpreng nai khala, tavym hawi avum lawh nai khumi kamta lawm ai. Ti y baly yhm y tym nai khala angpang y amkhaw i, pavui my patiu lawh nai khumi kamta lawn ai.
20 Areng i neng kani ly kangvang ngo y naimy, kaveng tym nai neng kani lawn ai. Angvang phang nanai kangvang pipi by y naimy, khri pa-rei veng nanai neng kani lawm ai.
21 Areng my, “Nangchi i reita pawichi ai kaniu ngai y. Huni pawichi ai khrikhri pa-rei kapaso. Ref 5:21-22 Is 1:11-14
22 Nangchi i leng patlum nai kapathyp, teicha teinei talam naichi ai kai aly ngai y. Veung hawi nai tawnbawichi hawi apathyp nai py, kai aly ngai y.
23 Tyn tukulu nai khulym raawi py anawn u; nangchi i taro beu nai katynchi py, kai ly thai ai nai ngai y.
24 Adyh adawi naira ly micheaung tui kamta, hawi naira ly tui kang vai y nai tavo kamta leaung na sy.
25 “Aw Israela chengchi awi, nangchi ly daichi ka-vym meingtym y saneng vui palyhrei amki u nai thym khala, kai teng y kapathyprachi talam y naimy awm u nai ne. Ref 5:25-27 Amtaw 7:42-43
26 Na i py vai, nangchi ly nangmychi my sa iy chiu u nai Sakkuth samrang tameuh hawi Khi-um ka-si tameuh mynchi ai, vaimy syn u ai nai tla ai.
27 Kai ly nangchi ai Damaska mary vai mang y, langheng y kang hawi vui ai,” nanai kani pri tavai luchi i Areng Tameuh my leu pei nai ne.