4
1 Atho di nai khumichi hawi khumi kamawnchi ai ana iy, my i juvochi teng y kaichi nei ai nai rah jeu hai, nanai leu pei iy teicha kahawi cha ai nga nai Basan si nuchi kamta, veu hawi nai Samari neampachychi awi, hini leu tangai u.
2 Salo keh Areng ly chai parai nai deaungkho y, hina nai vaineng adeu bo. Areng my, “Nichi ly nangchi ai sakawi hawi athorei my ryh nai kanichi tym ai. Nangchi bawibawi ly sakawira man nai ngo kamta lawm u ai.
3 Nangchi ai kasa keh nai mary apai kaphra pa-kho mang y ang ryh iy, angam mang y aphi ai,” napi.
Israelachi i amtiu nai sai phra nai
4 Sa thai naira angym nai Areng my leu pei nai ly “Aw Israela khumichi awi, Bethela i kachai meingtym mang y chei iy, kamngo so u! Kilakala mary mang y chei iy khri pa-rei kamngo so u! Apathyp ai nai tawnbawichi khawn tleirei syn u. Kani thomrei y kanirei, nangchi i ko nai horei y harei syn u.
5 Tameuh ai kawn nai leu thui nai tako talam u. Alyly naimy talam nai py nang Israela chengchi my thai hai iy amlyh u. Huna nai sa ai nai nangchi ngai, nanai leu pei nai ne.
6 “Kai ly nangchi i mary tleirei y takang theu hai i py, nangchi ly kai teng y jeu u teang y.
7 Nangchi i amti amjangchi i vui kanitui ngai keh nai neng khala y, kai ly kani khang hai vui bo. Mary hareira y naini kani nai hai iy, vai mary hareira y ly kani nai hai y nai keung ly kai ne. Li hareira y kani nai hai iy, vai li hareira y ly jengha nai ne.
8 Tui takang nai deaungkho y phyrei mary i khumichi ly tengpang sahawi i mary mang y tui hau nai akawm parai teu i py, nei ai nai tui ka-lawn pa-rei ngo u y. Na i py nangchi ly kai teng y jeu y naimy awm u nai ne.
9 “Kai ly ali kabi aho hai iy nangchi i amti amjangchi jei hai rawm bo. Nangchi i thaidu keung, olive keung, kreip akho hawi li hlauchi ly akhutamachi my taphra nai avum bo. Na i py nangchi ly kai teng y jeu y naimy awm u nai ne.
10 “Kaimy Aikupta pri y tym hai nai kamtang ly nangchi teng y py tym hai bo. Nangchi i thawndeang deaungdichi ai, tavai keung y kaimy padei nai ne. Nangchi i keaungngochi py la pi veng. Nangchi i tavai taichira y, nangmychi mang i khumi tlaiveu kamui ly nangmychi teng y amseaung hai bo. Na i py nangchi ly kai teng y jeu y naimy awm u nai ne.
11 “Kai ly Sodom hawi Komora mary ai taphra nai kamta, nangchi theung i khumi phyreichi ai py taphra vui bo. Dei kamthum khumichi py, mai theung i ajiu teang nai thengbeang hawi atawm nai ne. Na i py nangchi ly kai teng y jeu y naimy awm u bo,” nanai Areng my thui. Ref 4.11: AA 19:24
12 “Hunai deaungkho y, aw Israela khumichi awi, kai ly nangchi ai kang pajeng ai nai tla ai. Hunai kamta pajeng ai nai deaungkho y, kai i tara chih naira avum ai nai angvei u rym!” napi.
13 Mawichi ai sa iy ali aho hai nai
keung ly Tameuh ne.
Mymy ly my i dawn naichi ai khumichi teng y pany hai bo;
mymy ly kanithun ai vum mang y angpeang hai bo.
Mymy ly kani khaileaung i asang keh nai mang aleaung nai ne.
Mymy i nang parai nai amyn ly ati cheaungkhang sa thai nai Areng Tameuh ne.