10
(Mar 3:13-19a; Luk 6:12-16)
1 Cuhnukah Jesuh ni a kaizulle hleihnih a hemah ko hngai in thlarau thianglo Žhawl dingah, cun tiahhrin zongza leh dam lonak zongza damsak dingah, huham a pia hngai.
2 Hipawl hi tirhthlahle hleihnih ih minpawl cu an ii: peitlengah Piter tiin khaw tiahmi Simon, cun a naupa Andru; Zebedi ih tiapa Jeim leh a naupa Johan;
3 Filip leh Bartholomeo; Thomas leh siahkhuan Matthai; Alfias ih tiapa Jeim, cun Thadias;
4 Kanaan-mi Simon, cun Jesuh a leirawitu Judas Iskariot an ii.
(Mar 6:6b-13; Luk 9:1-6)
5 Hile hleihnih hi Jesuh ni a tangla ih thucah rum a thlah hngai: “Zentail-mipawl lak khawnang hman ah tat hlah uh, cun Samaria-mipawl ih khua ah khaw lut hlah uh,
6 tuhma Israelpawl hem zong ah tat uh.
7 Nan tah thah ah, ‘Vancung Uknak cu bansam ah a pha rom,’ tiah simthan uh.
8 Mitiak damsak uh, mithi thawhsak uh, miphar thiansak uh, khawsiapawl Žhawl uh. Atlawi-in nan co; atlawi-in pia ve uh.
9 Nan khuallam caah nan dip sungah sui ih vuakmi, daar ih vuakmi, ngun ih vuakmi itumang sumpai khaw iseh,
10 caw diilnak dip iseh, angki zun hnih iseh, kedaap iseh, teileng iseh, kentia hlah uh; icatile Žuantule cu caw awk ding ngah phu an ii.
11 Khuapi iseh, khuate iseh, nan luh ah, khualtlun inn tlak hmuin hrawl uh la, acunangah nan pawhŽhan tiang caam uh.
12 Cui inn sung nan luh ah thluasuah pia uh.
13 A inn cu a tlakmi a ik ahcun, nan daihnak cu a parah tlung seh; a inain a tlaaklopi a ik ahcun nan daihnak cu nanmah hemah kirŽhan seh.
14 Ahu ni maw khual an tan tlunsak lo, iklole nan aan an tan ngaih lo ahcun, cui inn iklole cui khua nan mattak tikah nan ke ih vutning cu thingta uh.
15 Thungai in ka tan sim hngai, thuŽhen ni ahcun cui khua vanin cu Sodom le Gomorrah khuale caah an tuar zualdoideuh leh lei.
(Mar 13:9-13; Luk 21:12-17)
16 “Zohhman uh, saserual lakih tuu thlah mangin ka tan thlah hngai; curuangah rul mangin ting uh la, thunu mangin nunnem uh.
17 Mipawl ni thurel upale hemah tan apin, an sinakokpawl ah an tan thawi thok ruangah ralring uh;
18 culeh kamah ruangah uktupawl leh siangpahrangpawl hmala ah, anmahpawl leh Zentail-mipawl hemih ama dinpitu dinhmun in an tan sualdawk thok.
19 Cutiih an tan ap tikah, khawti in nan aan thok leh itu nan sim thok thu ah dontia hlah uh; icatile nan sim dingmi cu acui caan ah sim nan i thok;
20 a awn-ang tu cu nanmah iloin nan Pa ih Thlarau ni nanmah thawngin a awn-ang thok.
21 Unau ni unau, cun pa ni tia, thi dingin an leirawi tia thok, tiale ni nulepapawl ralsanin thihnak tiang ah an phatpi thok;
22 culeh kamah ruangah mi zate ih huat nan i thok. A inain a net tiang a in tu cu run a i thok.
23 Khua pakhat ah an tan hrem ahcun, khua pace ah zuang uh; icatile thungai in ka tan sim hngai, Mi Tiapa a phat hlanah Israel khua zate nan hlawh man thok lo.
24 “Kaizul cu amah zirhtu cunglaah a i lo, cun sal khaw a bawipa cunglaah a om lo.
25 Kaizul caah amah zirhtu mang ik, cun sal ni a bawipa mang ik cu a za kau. Inn ngeitu bawi cu Beelzebul tiah an kawh ahcun, a innsang ih mipawl cu min sia in i tluk an ko hlehhlo thok!
(Luk 12:2-7)
26 “Curuangah mipawl cu Žih hlah uh; icatile atu ih khummi hmawhhmawh hon i lei khawh, atu ih thuhmi hmawhhmawh phuan a i leh thok.
27 Khuamaw lakih ka tan sim hngaimi hi khuatle ah sim uh; cun hiohio ih nan zakmi cu inn zim par in ho uh.
28 Ruangpun cu a that zo nain nunkhua a that zo lo tu cu Žih hlah uh; acu vanin cu ruangpun leh nunkhua an pahnih in hremhmun ah a that zo tu hrul sawn uh.
29 Caate luhnih sa cu deem khat in zorh an i lo maw? A inain pakhat hman nan Pa ih thu telloin khur parah an tla lo.
30 Culeh nan lu parih sampawl hman siar remro an ii.
31 Curuangah hrul hlah uh; nangmi cu caate tlungpi vanin man nan ngei sawn.
(Luk 12:8-9)
32 “Curuangah mi hnganah a ma Žan tupoh cu vancung ah ka Pa hnganah ka Žan ve thok;
33 a inain mi hnganih a ma pheh tupoh cu vancung ah ka Pa hnganah ka pheh ve thok.
(Luk 12:51-53; 14:26-27)
34 “Vulei ah remdaihnak keng dingah a pha tiah ma ruat hlah uh; remdaihnak keng dingah iloin, ralreen tu keng dingah ka pha.
35 Icatile mi pakhat cu
a pa ralsansak dingah,
tianu cu a nu ralsansak dingah,
cun vah-nu cu a nii ralsansak
dingah ka pha;
36 culeh, mi pakhat ih ral cu
amah ih innsungmi leello
a i thok.
37 Kei vanin a nu maw a pa maw a daw sawn tupoh cu kei rum a tlaaktia lo; cun kei vanin a tianu maw a tiapa maw a daw sawn tupoh cu kei rum a tlaaktia lo;
38 culeh a thinglamtah puttia in a ma zul lo tupoh cu kei rum a tlaaktia lo.
39 An nunnak hualhum a dawtu cu an nunnak an sung thokih; kamah ca-ih nunnak sung hlawh tupawl cu an nunnak an ngah thok.
(Mar 9:41)
40 “An tan cosang tupoh ni a ma cosang hngai ih, a ma cosang tupoh ni a ma thlahtu an cosang.
41 Profet pakhat cu profet a ik ruangih a cosang tupoh ni profet ih ngahvo a co thok; midingfel pakhat cu midingfel a ik ruangih a cosang tupoh ni midingfel ih ngahvo a co thok;
42 culeh hi ka kaizulle lakih mi tenautleng le pakhat hi kaizul ik ruangih tidai keeu khat te hman a tul tupoh cu – thungai in ka tan sim hngai, hipawl hi huhman an ngahvo an sung thok lo,” tiah a ti hngai.