1 “Kei cu sabit ruang ngaingai ka ii, culeh ka Pa cu sabit duum ngeitu a ii. 2 A vuang lomi a tlang cangte a sat hngai. Avuangmi tlang cang vuang hlehhlo dingah a hleuh in a thian hngai. 3 Nangmi cu nan hemih ka simmi thu thawngin thiansak nan i rom. 4 Nan sungih ka hmun mangin ka sungah hmun uh. Sabit tlang ni a ruang a peh lo ahcun amahte in a vuan khawh lo mangin nangmi khaw kamah sungih nan hmun lo ahcun nan vuang kho ve thok lo. 5 Kei cu sabit ruang ka ii, nangmi cu a tlangpawl nan ii. Kamah sungih a hmun tu leh an sungih ka hmun mipawl cu tampi an vuang, icatile kamah tello ngai in cu ituhman nan ti zo lo. 6 Kamah sungih a hmun lo tupoh cu satbit tlang mangin zam mianmi a ii ih a vuai; acumang sabit tlangpawl cu an khawmih mei ah an paih, culeh a kaang hngai. 7 Kamah sungih nan hmun leh ka thupawl nan sungih a hmun ahcun, nan dawtmi poh dil uh la, vuak piak nan i thok. 8 Ka Pa cu vuang tampi nan vuan leh ka kaizul nan can hi sunparsak a iknak a ii. 9 Pa ih ma dawt mangin ka tan daw hngai ve; ka dawtnak sungah hmun kau uh. 10 Ka Pa ih thupiakpawl ka zulh leh a dawtnak sungih ka hmun mangin, ka thupiakpawl nan zulh ahcun ka dawtnak sungah nan hmun kau thok. 11 Ka lungawinak nan sungah omin, cun nan lungawinak kimhlang dingah hi thilpawl hi nan hemah ka ang hngai. 12 “Ka thupiak cu, Ka tan dawt hngai manghin pakhat leh pakhat daw tia uh, ti hi a ii. 13 Mah ih rualpipawl ca-ih mah ih nunnak liam vanin a hnemsawnmi dawtnak cu ahuhman ni an ngei lo. 14 Thu ka tan piak hngai mi nan vuak ahcun nangmi cu ka rualpi nan ii. 15 Sal tiah ka tan ko hngai ti lo, icatile sal ni cu a bawipa itu a vua ti a tiah lo. Rualpi tiah ka tan ko hngai vel, icatile ka Pa hemin ka zakmi izongza ka tan tiahsak hngai rom. 16 Nangmi ni ama rilta hngai lo, kei ni ka tan rilta hngai. Culeh, ka min in nan dilmi poh Pa ni a tan piak hngai nak dingah hla a nguh mi vuangvuang dingin ka tan tirh hngai. 17 Hi thupiakpawl ka tan piak hngai nak cu pakhat leh pakhat nan dawttiak nak dingah a ii.

18 “Vulei mipawl ni an tan huat ahcun, an tan huat hlanah ama hua hngai rom ti tiah uh. 19 Vulei mi i uh la cu vulei mipawl ni anmah ih mi mangin tan daw hngen tur uh. Hi vulei hin ka tan ril hngai romih, vulei mi nan ik lo ruangah vulei mi ni an tan hua. 20 ‘Salpawl cu an bawipa vanin an hnemsawn lo’ tiah nan hemih ka timi thu khi cingkeng uh. Ama hrem hngai ahcun an tan hrem kau thok; ka thu an zulh ahcun nan thu khaw an zul ve kau thok. 21 A inain hi thil hmawhhmawh hi kamah ruangah nan parah an vua thok; icatile a ma thlahtu an tiah lo. 22 Kei pha in an hemah thu simta hlah ningla cu, sualnak an ngei thok lo; a inain atu cu an sualnak caah phehrelnak an ngei lo. 23 Ama hua tupoh ni cu ka Pa an hua ve. 24 Huhman ih vuak lo mi thil an lakah vua ta hlah ning la cu sual ngei loin hngen i tur uh. A inain atu cu an hmuromih kamah leh ka Pa kan pahnih an man hua. 25 Ahihi an daan sungih, “A thu omlopi in ama hua hngai,” tiih nganmi thu kimngah dingah a ii! 26 “Pa hemin nan hemih ka thlah thok mi Khunsatu, Pa hemin a pha mi thutak Thlarau, a phat tikah, amah ni kamah can-ah ka thuhla sim leh lei. 27 Nangmi khaw a pek in kamah rum nan om ruangah ka thuhla nan sim ve thok.