1 Sanhedrin upale cu Paul ni dangkau zoh hngain, “Ulenau hngai, nihinni tiang hi Pathian hmaiah lungthiangte in ka nungcang,” tiah a ti. 2 Cutikah Tlangbawi Saang Ananias ni Paul hrialih a ding tupawl cu a kaa beeng dingin thu a pia hngai. 3 Acu fang ah Paul ni, “Nang si raang hnulhmi kham, Pathian ni tan beeng leh lei. Acunangah cu Daan mangih thu ma Žhen piak dingah na to le hemaw tiah, ma beeng dingih thu na piak hngai thawngin Daan na buar kovawh,” tiah a ti. 4 A hrial ih ding tupawl ni, “Pathian ih Tlangbawi Saang maw na hmuhsit ngam?” tiah an ti. 5 Culeh Paul ni, “Ulenau hngai, Tlangbawi Saang a ik ka tiahthiam lo pi; icatile, ‘Nan miphun hruaitu cu a Žhat lonak nan ang thok lo,’ tiah ngan a i pan,” Ref 23:5 Suah(Ex)22:28 tiah a ti. 6 Mihrekkhat Sadusile an ii ih apacepawl Farisi-le an ii ti Paul ni a hmuhngah tikah Sanhedrin hmaiah, “Ulenau hngai, kei hi Farisi-le ih tiapa, Farisi pakhat ka ii. Mithi thawhŽhan ruahsan ruangah hinangah hlekhlai ka tuak hi!” tiah a au. 7 Acucu a simngah tikah Farisipawl leh Sadusipawl lalak ah Žhentiaknak a suakih, zapi khawmtia cu an Žhentia. 8 (Sadusile ni thawhŽhannak iseh, vanmi iseh, thlarau iseh, a om lo tiah an ti; Farisi-le ni zong cu an phun thum hin a om tiah an pon.) 9 Cutikah aukhuannak pipa a suak; culeh Farisi-le sungin Daanzirhtu hrekkhat hang dingin, “Hi pa hi a sualnak ituhman kan hmu lo. Thlarau pakhat, iklole vanmi pakhat ni a hemah thu a sim ii sela teh?” tiah an al. 10 An Žhentiak cu kutthlaktiak tiang a can tikah ralbawipa ni Paul an thlehbauh ding phangin, ralkaple cu hramhramin Paul hruaiih ralkap omnak inn ah luhpi dingin thu a pia hngai. 11 Acui zan ah Bawipa cu Paul hrialah dingin, “RalŽha in om kau! Icatile Jerusalem ah ka thuhla na sim tak mangin, Rom ah khaw ka thuhla na sim thok henakhawh,” tiah a ti.

12 A zingla maw cu Judahpawl phiarhrualtia in, Paul an thahngah hlan cu caw aw lo leh ti ding lo dingah siatsirin thu an khaamtia. 13 Cui phiarhrualnak ah a telve tu cu mi sawmli luan an ii. 14 Tlangbawipawl leh Sanhedrin hemah tatin, “Paul kan thahngah hlansung cu caw tep lo dingah siatsirin thu kan khaamtia. 15 Curuangah nangmi leh Sanhedrin ni ralbawipa cu a thuhla Žhadeuh in hliakhlai kan dawt ruangah tiin thucah in Paul cu hinangah hruaita uh. Culeh keimi ni a phat hlanah that dingin kan tiaritia,” tiah an ti. 16 An bawh thup thu cu Paul ih tarnu ih tia ni a za hngai ralkap inn ah luhnak a ngah ih Paul a sim. 17 Paul ni ralkapzabawi pakhat a ko ih, “Hi tlangval hi ralbawipa hemah pita, icatile thusim awk itumaw a ngei,” tiah a ti. 18 Curuangah a pita, ralbawipa hemah tahpi in, “Thawngtla pa Paul ni hi tlangval hi na hemih phatpi a ma torh, itumaw tan sim awk a ngei,” tiah a ti. 19 Ralbawipa ni a kut in a tlaiih a bul in thliarin, “Ma tiahsak awk na ngeihmi cu itu ii maw?” tiah a dil. 20 Tlangvalpa ni, “Judahpawl ni Paul hi a thuhla Žhadeuh ih hliakhlai thok mangin zingla ah Sanhedrin hemih suahpi dingah tan dil dingin thu an ciingtia rom. 21 A inain tan leemngah hlah uh se law, icatile minung sawmli luan ni amah cu an bawhthup la. Amah an thah ngah hlansung cu aw lo leh ding lo dingah siatsirin thu an khaamtia. Atu hi an tiaritia ih namah ih lungkimpinak an hngak kau,” tiah a ti. 22 Curuangah ralbawipa ni tlangvalpa cu, “Hi thu ama zaksak hi ahuhman sim hlah law maw,” tiah thupiain a tlun sak.

23 Cutikah ralkapzabawi pahnih ko hngai in, “Nihin zan nazi pakua ah ralkap za hnih, saicitiami sawm sarih, tei-ralkap za hnih rum Sisaria ah tat dingin tiari uh. 24 Paul ih cittiak ding sai khaw pia uh, cun Mangki Felix hemah himte in phatpi uh,” tiah a ti hngai. 25 Acu simnak ah laikuat pakhat a ngan: 26 “Klaudias Lisias ni Upatmi Mangki Felix hemah, biaksonnak ka tan kuat. 27 Hi pa hi Judahpawl ni an ponih an that samte, ihmansela Rom miphun iknak a ngeih ka tiah ngah tikah thawngkiltu rum pha in kan suah. 28 Itu thu ah sual an puh ti tiah ka dawt ruangah an Sanhedrin hemah ka suahpi. 29 Anmah Daan rum pehtlaitia in an puhmawh, a inain thihnak iklole thawngthlak a tlakmi sualpuhnak a i lo ti ka tiah ngah. 30 Amah an phiarhrual thu ama zaksak hngai tikah na hemah ka thlah lohli, amah sualpuhtule khaw amah an puhnakpawl na hmaiih sim dingah thu ka pia hngai.” 31 Curuangah thupiak an ik mangin ralkaple ni Paul cu pitain zan ah Antipatris an tahpi. 32 A zingla ah saicitiale an tahpi sakih anmah cu ralkap omnak inn ah an kirŽhan. 33 A thlah tupawl cu Sisaria an phat tikah laikuat cu Mangki bawipa piain Paul khaw a hmaiah an phatpi. 34 Laikuat a rel tikah Paul cu khawnang peng in a ik thu a dil, culeh Silisia peng in a ik a tiah ngah tikah, 35 “Atan puhmawh tupawl an phat tikah na thu cu kamah ni ngai in rel leh lang,” tiah a ti. Cuhnukah Paul cu Herod ih sakmi thurelnak khaan ah a kiltu rum sia dingin thu a pia hngai.