1 Paul leh Silas cu Amfipolis leh Appollonia an palpah hnukah, Judahpawl ih sinakok omnak Thesalonika khua an pha. 2 Paul cu a daankeel mangin sinakok ah a lutih, Sabbath ni thum sung cu mipi rum Lai Thianghlim sung in thu an altia. 3 Messiah caah cun a intuar thok leh mithi lakin a thawhŽhan a Žul thok ti simfiang hngai in a lansakih, “Hihi Messiah, nanmah hemih ka simphuanmi pa Jesuh a ii,” tiah a ti hngai. 4 Mi hrekkhat cu leemngah an ii ih, punpiatia Grik-mipawl tlungpi leh hruaitu numi tlungpi mangin Paul leh Silas hemah an kom. 5 Ihmansela Judahpawl ni an nahsuah, culeh dawr hmun ih misualpawl ih bonnak in mibuur an suahsak, culeh khuapi cu buaicincen an vua. Mipi khawmtia hmaiih suahpi an dawt ruangah Jason ih inn cu an sim. 6 Paul leh Silas an hmuh khawh lo tikah Jason leh zumtu hrekkhat cu thungaitupawl ih hmaiah suahpi in, “Vulei a lulet tu hile hi hinangah khaw an pha ih, 7 Jason ni khual a do hngai. Jesuh timi Siangpahrang pace pakhat a om e tiin, Khumpi ih thuthan dokalh tlong in thil an ti,” tiah an au ciamco. 8 Mipi leh khua upale cu ahi an zak tikah an thin a buai, 9 culeh Jason leh mipacele hemin tlantiaknak tangka an lat hnukah an thlah.

10 Acui zan rori ah zumtule ni Paul leh Silas cu Berea khua ah an thlah; an phat tikah Judah sinakok ah an tat. 11 Hi Judahpawl hi Thesalonika khua sungih mipawl vanin thupon kho an i deuh, icatile an thusimmi cu thinthote in an cola ih, an simmi mang a i taktak maw ti tiah dingah nicangin Lai Thianghlim an relih an cekfel. 12 Curuangah dinhmun sang ih om Grik numipawl leh pamipawl telin mi tlungpi ni an zum. 13 Thesalonika khua ih ommi Judahpawl ni Bera khua ah khaw Paul ni Pathian thu a sim ti an tiah tikah, mipi buaisak ding leh tokhrolh dingin acunang ah an tat ve. 14 Cutikah zumtule ni Paul cu tikap ah an kuat mianmi, ihmansela Silas leh Timote cu Berea ah an taangta. 15 Paul a thlah tupawl ni Athens khua tiang an phatpi; a rang kho tawkin Silas leh Timote ni a dung in dawi dingih thu a cah hngai hnukah amah cu an mata.

16 Paul ni Athens khua in a hngah hngai lio ah khua cu mepa in a khat ti a hmuh tikah a thin a har ngaite. 17 Curuangah Judahpawl leh punpiatiapawl rum sinakok ah iseh, zapi tuahtiaknak ah acunang ih a tat tupawl rum iseh, nicang in thu an altia. 18 Epikurian leh Stoik mitingle hrekkhat khaw amah rum thu an altia. A hrekkhat ni, “Hi tlokbuat hi ni itu sim a daw a he?” an ti. Mipace ni, “Ram pace khuazingpawl thuhla simtu a i mang a ti,” tiah an ti. (Acucu Jesuh leh thawhŽhannak thuhla a sim ruangah a ii.) 19 Curuangah Areopagas timi tlangbo parah pitain, “Hi na phatpimi zirhnak thar hi itu a ik tiah kho na hu im? 20 Phuncedeuh in kan za, curuangah a tican itu a ik tiah daw ung ee,” tiah an dil. 21 Athens khuamipawl leh acunang ih omtu khuatluangmi an zate in an caan cu thu thar simnak leh ngainak simlo itu ca hman ah an hmang lo. 22 Cutikah Paul cu Areopagas tlangbo hmala ah dingin, “Athens khuamipawl hngai, a lam kip in itluk biaknakmi nan i lawmlam ti cu ka tiah. 23 Icatile khua sung ka vah thah ih, nan biaknak thilpawl ralringte in ka zohhliah ah, an lakih pakawh pakhat ah, ‘Tiah lomi Pathian Hemah,’ tiih lai tarmi ka hmu. Curuangah tiahlopiih nan biakmi cu a ii nan hemih ka simphuan cu. 24 Vulei leh a sungih ommi izongza a vuatu Pathian, van leh vulei ih Bawipa cu minung kut ih sakmi a thiangmi hmunpawl ah a om lo. 25 Cuhleiah amah rori ni mi zate hemah nunnak, thaw leh thil hmawhhmawh a piak hngai ruangah itumaw Žul sela mang minung kut ih Žuan piak Žulmi khaw a i lo. 26 Hringsartu pakhat khat hemin vulei punpuluk luah dingah miphun hmawhhmawh a vua hngai, cun an om thok caan leh an omnak thok hmunpawl ih ramripawl khaw a zem hngai. 27 Acucu, amah cu kanmah pakhat vek hemin a hla lo nain – amah hrawlin an dapih an hmuh ngahnak dingah a ii. 28 Icatile nan biazaingantu hrekkhat hman ih, ‘Icatile keimi khaw a citlaangpawl kan i ve’ tiah an ti mangin; ‘Amah sungah kan nung, kan tekcaang ih khua kan sa.’ 29 Pathian ih citlaangpawl kan ik ruangah Pathian iknak cu sui, iklole ngun, iklole lung, tipawl hmangin minungpawl ih zuksuai thiamnak leh mitthlam cuansaknak in vuakmi mangih kan ruah awk a i lo. 30 Minungpawl ih thutiah lonak caanpawl khi Pathian ni hmuhsaktia lo hmansela, atu ahcun hmuncang ih mi hmawhhmawh sualrim dingah thu a pia hngai. 31 Icatile a siahmi minung pakhat thawngin vulei hi dingfelnak in thu a Žhen thok nii, ni khat cu a teek cia rom, culeh ahihi a i teuti thok ti mizate hemih lansaknak ah acu pa cu mithi lakin a thawhsak leh,” tiah a ti. 32 Mithi thawhŽhannak thu an zak tikah a hrek ni an nihsan; ihmansela mipace ni cu, “Hi thu na sim tan ngaiŽhan ung la,” tiah an ti. 33 Acu fang ah Paul ni a mata hngai. 34 Ihmansela mi hrekkhat ni amah hemah telin zumtu an cang, cu sungah Areopagas ih thureltu Khonsil sungtel Dionisias leh Damaris timi nu, cun mipace khaw an tel.