3
1 Yerusalem gaw dingnye hkrum nga sai, shi gaw awu asin rai nna gumle gumlau re ai hte dai mare masha ni hpe nan adip arip hkan galaw nga ai.
2 Dai mare gaw dai Madu a nsen n madat ai hte matsun maroi ga ni hpe mung n hkap la nga ma ai. Dai Madu hta kam hpa ai lam n nga ai sha n-ga, karum la na matu hpyi lajin ai lam mung n galaw ma ai.
3 De a du salang ni gaw shabam hkawm ai hkanghkyi ni zawn, tara agyi ni gaw hpang jahpawt sha na matu pyi n ngam da lu hkra lawhpa marin ai hte kawsi ai chyahkyawn ni zawn rai ma ai.
4 Myihtoi ni gaw lit n la ai hte ga kaman sha tsun nhtawm gumle gumlau rai nga ma ai; hkinjawng ni mung, chyoi pra ai shara hpe awu asin di nna shanhte a akyu a matu Karai Kasang a hkang da ai tara hpe manai makai di ma ai.
5 Rai ti mung, dai Madu gaw dai mare hta ya du hkra nga nga nna, shi gaw teng man ai amu galaw let n shawp n kap ai amu hpe galoi mung n galaw nga ai. Jahpawt shagu n hprai ai sha, shi gaw shi a amyu masha ni hpang de tara malang ai hku shapraw dan nga ai. Rai tim, n teng n man ai masha ni gaw shut hpyit ai amu ni hpe matut galaw nga ma ai hte kaya n chye nga ma ai.
6 Dai Madu gaw, ?Ngai gaw amyu baw ting hpe la kau na we ai. Shanhte a mare ni hpe ngai jahten kau nna shanhte a mare bunghku ni hte langchyi ni hten ngam nga manu ai. Shanhte a mare ni katsi katsang rai mat nna, mare lam ni hta masha n lai ai hte dai mare e kadai sha pyi ngam nga na ra ai n rai.
7 Nye a amyu masha ni ngai hpe hkrit hkungga wa nna, nye a hkang da ai tara matsun ni hpe hkap la wa na mara ai; shanhte hpe ngai sharin shaga ai ga matsun ni hpe galoi mung n malap kau lu na mu ai ngu, ngai myit nawn we ai. Rai ti mung, kade n na yang, shanhte gaw shawoi na hte maren, n hkru n kaja ai hpe shanang galaw wa nga masai.
8 Dai Madu gaw, ?Sha ala nga mu,? ngu nna tsun wu ai. Masha amyu baw ni hpe mara jaw na matu ngai rawt sa wa ai nhtoi du hkra ngai hpe ala nga mu; Masha amyu baw ni hte hkawhkam mungdan ni nye a masin kahtet ai hpe shanhte hkam sha lu na matu shanhte hpe zup hpawng shangun na nga, ngai shatawng shada da nngai. Nye a sindawng kahtet ai masin a majaw ginding aga ting jahten kau hkrum na ra ai.
9 ?Dai hpang, ngai gaw masha amyu baw ni hpe galai kau nna shanhte gaw kaga hpara ni hpe n nawku ai sha ngai kaw chyu akyu hpyi wa na mara ai. Shanhte yawng nye a ga matsun ni hpe madat mara hkan sa na mara ai.
10 Tsan la ai Ehtiopi mung na shabra kau dat ai nye a amyu masha ni pyi ngai hpang de shagu hkungga sa sak jaw na mara ai.
11 Nanhte ngai hpe gumlau nga myit ti mung, dai shani e nanhte nye a amyu masha ni kaya kahpa loi mi sha pyi hkrum ra na myit dai n rai; gumrawng gumtawng ai hte myit tsaw myit dap nga ai masha hkum shagu hpe ngai la kau na nngai; nanhte mung ngai hpe nye a chyoi pra ai bum ntsa e galoi mung bai gumlau rawt lu na n rai myit dai.
12 Ngai gaw shagrit shanem ai masha ni hte matsan mayan re ai masha ni hpe Yerusalem e jahti da nna shanhte gaw karum la lam lu na matu ngai hpang de sa wa na mara ai.
13 Naw ngam nga ai Israela amyu masha ni gaw kade a ntsa e mung shut hpyit ai amu galaw wa na n rai; masu magaw ga tsun na n rai. Hkalem hkalau ga mung shanhte shakut tsun na ma ai n rai. Shanhte gaw kadai hpe mung n hkrit ra ai sha shim lum ai hte ngamu ngamai wa na mara ai.
14 Israela amyu masha ni e, kabu gara mahkawn mangoi ai hte jahtau garu nga mu!
Yerusalem e, na a myit masin mahkra hte kabu awng sharawng nga u!
15 Dai Madu gaw nanhte a ari ahpri hpe jahkring kau nna
nanhte a gumlau hpyen ni yawng hpe la kau ya na ra ai.
Dai Madu Israela a hkawhkam gaw nanhte hte rau anga nga ai;
Dai shara hta ya kaw nna hkrit tsang shara hpa mung nga na n rai.
16 Shanhte gaw Yerusalem hpe ning ngu tsun na aten aten du wa nga sai,
?Ziun mare e, hkum hkrit nga et!
Na a lata hkum shakya kau nga et!
17 Dai Madu nanhte a Karai Kasang gaw nanhte hte rau anga nga ai;
shi a daru magam n-gun gaw nanhte hpe awng padang jaw ya nga ai.
Dai Madu gaw nanhte hpe awng sharawng wa nna
shi a tsaw ra myit hta, shi nanhte hpe asak nnan jaw ya na ra ai.
Shi gaw lusha poi hta shang lawm nga ai masha ni kabu gara nga ma ai zawn,
18 nanhte yawng a ntsa e mahkawn mangoi let kabu gara na ra ai.
Dai Madu gaw,
?Ngai gaw nanhte hpe jahkrit shama daw dan ai amu hte
nanhte a sari jahpoi kau ya ai amu ni hpe ngai jahtum kau ya ni ai.
19 Aten gaw du wa nga sai!
Ngai gaw nanhte hpe dip gamyet sha ai ni hpe ari jaw na nngai;
daw hten ai masha ni yawng hpe ngai mawai la na nngai,
bawng dung hkrum nga ai ni yawng hpe dum nta de woi wa na nngai.
Ngai gaw shanhte a kaya kahpa hpe shagrau sha-a ai hku bai jaw ya na nngai,
mungkan ga yawng gaw shanhte hpe shakawn na mara ai.
20 Aten gaw du wa nga sai!
Ngai gaw bra ayai hkawm nga ai amyu masha ni hpe dum nta de woi wa na nngai;
Ngai gaw nanhte hpe mungkan ting hta kajai gumhkawng ai amyu shatai na mawe ai
nanhte hpe kalang mi bai ngamu ngamai shangun na we ai.?
Dai Madu nan tsun nu ai.