2
1 Kaya n chye ai amyu baw e,
2 nanhte gaw nbung e shapoi kau hkrum ai numhkaw zawn garai n gawt kau hkrum ai hte dai Madu a masin kahtet ai gaw garai n hkru ai sha nanhte a ntsa de garai n du ai hte shi a sindawng kahtet ai hpe madun ai shani garai n du yang, nanhte a n hkru ai lam hpe hpyi nem nga mu.
3 Dai Madu a hkang da ai ga matsun ni hpe madat mara let dai lamu ga na shagrit shanem ai amyu masha nlang hte e, Madu hpang de kayin wa marit. Teng man ai amu galaw mu, Dai Madu a man e nanhte hkum hpe shagrit shanem mu. Shi a masin kahtet ai hpe madun dan nna ari jaw na nhtoi kaw na nanhte mahkoi lawt wa lu na rai myit dai.
4 Gaza mare hta kadai mung ngam nga lu na ra ai n rai; Ashkelon mare gaw katsi katsang shara tai mat wa na ra ai. Ashdod masha ni gaw shani chyingtung e gawt shapraw kau hkrum nna, Ekron gaw shanhte a mare kaw nna gau shapraw kau hkrum na mara ai. Ref 2:4-7: Esa 14:29-31; Yer 47:1-7; Eze 25:15-17; Yoe 3:4-8; Amo 1:6-8; Zeh 9:5-7.
5 Panglai hkin-gau mayan hku nga ai Hpilisti masha ni e, nanhte gaw dingnye hkrum nga myit dai. Dai Madu gaw nanhte hpe ari jaw na matu daw dan nu ai. Shi gaw nanhte hpe jahten kau na ra ai, nanhte kadai mung ngam nga lu na n rai.
6 Panglai hkin-gau na nanhte a lamu ga gaw udat shara, sagu rem ni a sum gap shara hte sagu hpung ni a ulawng shara ni tai mat na mara ai.
7 Naw ngam nga ai Yuda amyu masha ni gaw nanhte a lamu ga hpe madu la kau ya na mara ai. Shanhte gaw shanhte a sagu hpung ni hpe ushat shayaw nna Ashkelon mare na nta ni hta yup na mara ai. Dai Madu shanhte a Karai Kasang gaw shanhte hte rau nga nga nna shanhte hpe kalang mi bai ngamu ngamai shangun na ra ai.
8 Chyahtum Chyalai N-gun rawng ai dai Madu gaw, ?Moba hte Amon masha ni gaw nye a amyu masha ni hpe n kaw n law rai nna asawng asang di ma ai; shanhte a lamu ga madu la na nga, gumrawng nga ma ai lam, ngai na ni ai. Ref 2:8-11: Esa 15:1-16:14; 25:10-12; Yer 48:1-47; Eze 25:8-11; Amo 1:13-15.
9 Ngai gaw ahkrung nga ai dai Madu Israela a Karai Kasang teng teng rai nga nngai hte maren, Moba hte Amon mungdan yan gaw Sodom hte Gomora mare zawn jahten kau hkrum na mara ai gaw ngai dagam da se ai. Shanhte gaw jum nhkun hte htani htana katsi katsang shara tai mat nna nam hkrai shim rai na ra ai. Nye a amyu masha ni kaw na naw ngam nga ai ni gaw shanhte hpe kashun kashe hpya sha nna shanhte a lamu ga ni hpe la kau ya na mara ai,? ngu nna tsun wu ai. Ref 2:9: Nin 19:24.
10 Dai gaw Moba hte Amon yan gaw shan a gumrawng gumtawng ai hte myit tsaw myit dap nga nna, Chyahtum Chyalai N-gun rawng nga ai dai Madu a amyu masha ni hpe n kaw n law di ai a majaw nni nkri ari hkrum sha na mara ai.
11 Dai Madu gaw shanhte hpe jahkrit shama dat na ra ai. Shi gaw aga ting na karai ni hpe kaman de shayu kau tawn na ra ai, shaloi masha amyu baw shagu gaw shanhte a shara kaw na shi hpe nawku na mara ai.
12 Dai Madu gaw Ehtiopi masha ni hpe mung si wa na myit dai, ngu wu ai. Ref 2:12: Esa 18:1-7.
13 Dai Madu gaw Asuri mungdan hpe shaza kau na matu shi a daru magam n-gun lang wa na ra ai. Shi gaw Ninewe mare hpe shingran katsi ai shara hte hkun hkraw ai zaibru jang shatai kau na ra ai. Ref 2:13-15: Esa 10:5-34; 14:24-27.
14 Yam nga u hpung ni hte dusat amyu shagu gaw dai shara hta hpum nga na mara ai. Dai hten run mat sai shara na hkuwawt ni hta u hku ni dung nga na mara ai; hkuwawt chyinghka ntsa hkan e mung nga nga na mara ai. Chyinghka hkinbawng ntsa hkan e u hka ni ak nga na mara ai. Dai dum nta gap ai arit hpunpyen ni mung gawng mat na ra ai.
15 Dai mare gaw shi a daru magam n-gun hta gumrawng gumtawng nga nna shim ai mare re, ngu myit aru yu ai a majaw, byin wa na lam rai nga ai. Dai mare masha ni mung shanhte a mare gaw mungkan hta hkik hkam htum ai mare rai nga ai, nga nna myit la nga ma ai. Ya mare dai gaw katsi katsang byin mat nna matse labye dusat ni hpum shanu ai shara tai mat wa sa hka! Dai mare hku lai wa ai ni yawng yu hkrit kajawng nna shingdu de htingnut mat wa na mara ai.