20
1 Dawi gaw Rama ginwang Nayut mare kaw nna hprawng mat wa nhtawm Yonahtan hpang de wa wu ai. Shi gaw, ?Ngai hpa galaw shut kau sata? Ngai gaw kaning re ai ru hka amu galaw shut kau sata? Shi ngai hpe sat kau mayu hkra na nwa hpe ngai hpa galaw shut kau sata?,? ngu nna san wu ai.
2 Yonahtan chyawm gaw, ?Karai Kasang gaw nang si na hpe n hkraw nga ai! Nye wa gaw shi galaw ai amu ahkyak ai rai ti mung, n ahkyak ai rai ti mung, dai amu ni hpe ngai n chye hkra ip da nhtawm lam magup hpe shi galaw wu ai n rai. Dai gaw n teng nga ai!,? ngu nna htan wu ai.
3 Rai ti mung, Dawi mahtang, ?Nang ngai hpe kade wa tsaw ra nga ndai gaw na nwa atsawm sha chye nga ai rai nna, nang hpe lai hkra n machyi shangun mayu ai majaw, shi kaning rai maw mawn na lam nang hpe n chye shangun mayu ai hku, shi daw dan da nga ai. Ngai gaw si hkrung si htan a lata kaw na lawt na lahkam mi dang sha rai nga sali ai ngu nna ahkrung nga ai dai Madu hta nang hpe dagam nngai,? ngu nna htan wu ai.
4 Yonahtan gaw, ?Nang myit ra ai hku hpa rai tim, ngai galaw ya na de ai,? ngu nna htan wu ai.
5 Dawi gaw, ?Hpawt ni gaw Shata Praw na Poi nhtoi rai nga ai rai nna, hkawhkam wa hte shat rau sha na zawn ngai nawn da nga nngai. Rai ti mung nang hkraw ai rai yang, hpawt din na de du hkra pa hkan sa makoi nga n-ga. Ref 20:5: Bhk 28:11.
6 Na nwa gaw sha ku e ngai n lawm ai hpe dum jang, nye a dinghku ting a matu shaning shagu galaw ai hkungga nawng ya ai aten du ai majaw, Betlehem nta de tin tin gat wa na nga, nang kaw akroi anoi ahkang hpyi se ai lam, shi hpe tsun dan u.
7 Shi rai nna, ?Rai sa,? nga jang mung nye a matu shim lum lam rai na rai nga ai; rai ti mung shi masin pawt wa taw gaw, ngai hpe machyi hkra shangun nga ai hpe shi daw dan da sai, ngu ai hpe nang chye da sanu.
8 Chyeju hte ngai hpe matsan dum la e law; nang ngai hpe jaw ai dai chyoi pra ai ga sadi hpe shatup nga u law; rai ti mung ngai mara lu ai wa rai n yang gaw nang nan ngai hpe sat kau rit! Ngai hpe sat kau na she rai yang, hpa majaw na nwa kaw naw woi wa ra na rai ta?,? ngu nna tsun htang wu ai.
9 Yonahtan gaw, ?Dai zawn re ai hku myit pyi hkum myit shut yu u! Nye wa nang hpe machyi jahkrum na hku she daw dan ai hpe ngai teng teng chye ai she rai yang mung nang hpe n tsun dan ai nga na rai nga a ni?,? ngu nna htan wu ai.
10 Dawi gaw, ?Na nwa nang hpe sin pawt lahtet hte htan wa ai rai yang, ngai chye hkra kadai wa sa shana na rai ta?,? ngu nna san wu ai.
11 Yonahtan chyawm gaw, ?Sa, an pa ga de naw sa pru yu saga,? ngu nna htan wu ai. Shaloi shan pru mat wa ai hte
12 Yonahtan gaw Dawi hpe, ?Dai Madu Israela a Karai Kasang gaw an a sakse tai nga u ga! Hpawt ni hpawt din, ndai aten e, nye wa hpe ngai naw san yu na we ai. Na a ntsa tawn da ai shi a myit masa kaja ai rai yang, ngai nang hpe ga shana dat na nngai.
13 Shi nang hpe machyi hkra shangun mayu ai hku myit tawn ai rai yang mung, dai lam a majaw ngai nang hpe n chye shangun ai hte shim ai hku n hprawng shangun lu ai rai yang, dai Madu ngai hpe si hkra adup u ga law. Dai Madu gaw nye wa hte rau nga yu nu ai zawn nang hte mung rau anga nga u ga law!
14 Ngai naw ahkrung nga yang, chyeju hte an a chyoi pra ai ga sadi hpe shatup nna, ngai hta sadi dung nga u; rai ti mung ngai si mat ai rai yang,
15 nye a dinghku a ntsa e dai zawn re ai sadi dung ai lam htani htana madun dan u law. Dai Madu gaw na a gumlau hpyen ni yawng hpe tsep kawp shamyit kau tim,
16 an a lapran tawn da ai ga sadi gaw naw agrin nga u ga law. Dai ga sadi hten mat ai rai yang, dai Madu nang hpe ari jaw u ga law,? ngu nna tsun wu ai.
17 Yonahtan gaw Dawi hpe shi hkum hpe tsaw ra ai zawn grai tsaw ra wu ai majaw, shi hpe tsaw ra nga ai lam kalang mi bai ga sadi tawn da wu ai.
18 Dai hpang, Yonahtan gaw shi hpe, ?Hpawt ni gaw Shata Praw Shani a Poi rai nga ai hte maren, dai lusha poi hta nang n shang lawm ai rai yang, nang n nga ai hpe yu matsing na ra ai.
19 Hpawt ni din hta jan nna pyi, nang n nga ai lam hpe yu matsing na ra ai rai nna, kaga aten hta nang sa makoi ai shara de sa nhtawm, dai yang e nga ai nlung sumpum shingdu e makoi nga u.
20 Ngai gaw dai masat da ai shara de pala masum gap dat na nngai.
21 Dai hpang, nye a shangun ma wa hpe dat dat nhtawm dai ni hpe sa tam shangun na we ai. Ngai gaw shi hpe, ?Yu u, pala dai ni na a makau e sha rai nga ai,? ngu nna tsun dat jang, dai gaw nang shim nga lu ndai hte pru wa lu ai, ngu ai lachyum rai na ra ai. Shaloi nang hta hkrit tsang shara hpa n nga nga na rai nga ai gaw, ahkrung nga ai dai Madu hta dagam na ngai.
22 Rai ti mung, ngai shi hpe, ?Dai pala ni gaw wora kaga shara e she rai nga ai,? ngu nna tsun ai shaloi, dai Madu nang hpe dat dat nga ai majaw pru mat wa u.
23 Ya an shada da a lapran tawn da sai ga sadi hte maren, dai hpe an htani htana shatup lu u ga, dai Madu teng teng shagrin ya nga u ga,? ngu nna tsun wu ai.
24 Dai rai nna, Dawi gaw pa hkan e makoi nga ai; Ya Shata Praw shani na Poi hta Hkawhkam Shawlu gaw shat sha na nga,
25 shawoi na shi a shara shakum makau e sa dung nga wu ai. Abna mahtang shi a makau e dung nhtawm Yonahtan gaw shi hte tawtap e dung nga ai; Dawi a shara mahtang man nga ai;
26 rai ti mung Shawlu gaw, ?Shi hta lama ma byin sai, shi gaw htung lai hku nna kaja wa n san n seng nga sai,? ngu nna shi myit nawn la wu ai majaw dai shani e hpa mung n shaga nga ai.
27 Hpang shani ngu na Shata Praw shani na Poi a hpang shani e, Dawi a shara mahtang naw man nga ai rai nna Shawlu gaw Yonahtan hpe, ?Mani mung, dai ni mung, Dawi hpa majaw shat n sa sha a ni?,? ngu nna san wu ai.
28 Shaloi Yonahtan gaw, ?Betlehem mare de naw wa shangun et, nga nna shi ngai kaw akroi anoi ahkang hpyi wu ai.
29 Shing rai shi gaw, ?Nye a dinghku masha ni dai mare hta shagu hkungga nawng jau ya ai poi galaw nga ma ai majaw mung, dai shara de wa na matu nye a kahpu htet dat ai a majaw mung, nang nan nye a manang rai nga ndai gaw, nye a jinghku ni hpe wa hkrum shangun na, chyeju hte ngai hpe wa shangun e law,? nga nna tsun ai a majaw, shi ndai sha ku na shi a shara hta n du lu ai rai nga ai,? ngu nna htan wu ai.
30 Shawlu gaw Yonahtan hpe masin pawt bu let shi hpe, ?Gumlau ai hte sadi n dung ai na nnu gaw gara hku rai wa sata? Nang hkum nan hte na nnu kaya hkrum hkra Dawi a maga de nang tsap nga ndai gaw ya ngai chye ni ai!
31 Dawi hkrung nga dingsa ndai mungdan hta hkawhkam galoi mung byin na n rai nga ndai hpe nang n myit dum nga sani? Ya sa nna ndai yang e shi hpe woi tawn mu-shi si lu na rai nga ai,? ngu nna tsun wu ai.
32 Yonahtan gaw, ?Shi hpa majaw si na rai ta? Shi hpa shut kau sata?,? ngu nna tsun htang wu ai.
33 Dai aten hta Yonahtan hpe sat kau na nga, shi a nri jinghkyen dat wu ai rai nna, shi a kawa gaw Dawi hpe teng teng sat kau na daw dan da nga nu hka, nga nna dum chye wa wu ai.
34 Yonahtan pawt bu ai hte sha ku kaw na rawt mat wa let dai lahkawng ning ngu na Shata Praw na Poi e hpa mung n sha ai sha nga nga wu ai. Shawlu gaw shi hpe kaya jahkrum kau wu ai majaw Dawi a matu dik hkra shi myit yawn da wu ai.
35 Shing rai hpang jahpawt shan ndat da ai aten hta, Yonahtan gaw Dawi hte hkrum na nga, pa de sa wa wu ai. Shaloi shi gaw ma kaji langai mi hpe woi nhtawm,
36 shi hpe, ?Ya ngai gap dat na pala ni hpe hkan kagat tam su,? ngu nna tsun wu ai. Ma dai kagat mat wa jang, Yonahtan gaw shi hpe lai hkra pala langai gap dat wu ai.
37 Dai ma gaw pala hkrat ai shara de hkan dep nang jang, Yonahtan gaw shi hpe, ?Pala gaw lai mat wa sai!
38 Dai yang e sha gaw hkum tsap nga sa! Lawan kagat su!,? ngu nna jahtau tsun wu ai. Shaloi dai ma gaw pala hta lang nna shi a madu kaw nhtang wa wu ai;
39 shing rai galaw ai lam a lachyum hpe n chye wu ti mung, Yonahtan hte Dawi chyawm gaw chye nga ma ai.
40 Dai hpang Yonahtan gaw dai ma hpe shi a ndan pala ni hpe ap dat nna, mare de la wa na matu tsun dat wu ai.
41 Dai ma pru mat wa ai hpang, Dawi gaw nlung sumpum a shingdu kaw nna rawt pru wa nhtawm ga de hput di di let masum lang gum dagup wu ai. Shi hte Yonahtan mahtang shan shada da pup let hkrap nga ma ai; Dawi mahtang Yonahtan hta grau nna yawn nga ai.
42 Yonahtan gaw Dawi hpe, ?Karai Kasang nang hte rau a nga nga u ga law. Dai Madu gaw nang hte ngai hpe mung na a amyu matu ni hte nye a amyu matu ni hpe mung, an shada a lapran e tawn da sai chyoi pra ai ga sadi hpe htani htana agrin nga shangun nhtawm teng teng shadik shatup shangun nga sanu ga law,? ngu nna tsun wu ai. Dai hpang Dawi pru mat wa nhtawm Yonahtan mung mare de wa mat wa wu ai.