11
1 Shata mi dang na ai hpang, Amon Hkawhkam Nahasha gaw shi a hpyen luksuk hpe woi nhtawm Gilead mung na Yabesha mare man de sa nna dai hpe wang da wu ai. Yabesha masha ni gaw Nahasha hpe, ?Anhte hte myit hkrum ga shaka galaw tawn ga; shaloi nanhte gaw anhte a up hkang du ni rai nga myit dai ngu, anhte hkap la na ga ai,? ngu nna tsun ma ai.
2 Nahasha chyawm gaw, ?Ngai gaw masa lam langai hta mahta nna nanhte hte ga shaka tawn da na nngai; masha shagu hte a hkra maga na myi ni hpe ngai malawk kau ya nhtawm, Israela amyu ting hpe jahpoi asawng kau lu na rai myit dai,? ngu nna htan wu ai.
3 Yabesha ningbaw ni gaw, ?Dai rai taw gaw, Israela mungdan ting de kasa ni hpe dat dat lu hkra nhtoi sanit ya, anhte hpe naw jaw mi. Shaloi anhte hpe karum la na masha kadai mung n nga sayang chyawm gaw nang kaw anhte asum hkam na saga ai,? ngu nna tsun ma ai.
4 Shaloi kasa ni gaw Shawlu nga ai Gibea mare de du nna dai shiga tsun dat mu yang, amyu masha ni myit htum mat ai hte hkrap shajang ma ai.
5 Ya Shawlu gaw shi a dumsu utang ni hte yi de na ya sha shang wa wu ai; shaloi shi gaw, ?Hpa baw shut mat sata? Masha shagu gaw hpa majaw hkrap shajang nga myit ni?,? ngu nna san wu ai. Shaloi shanhte gaw Yabesha mare na kasa ni tang madun ai shiga hkap tsun dan ma ai.
6 Shawlu gaw dai shiga na ai shaloi, Karai Kasang a wenyi shi hpe up hkang nga ai rai nna shi masin ja ja kahtet nga ai.
7 Shi gaw dumsu utang lahkawng hpe sat kahtum nhtawm kasa ni hpe dai shan tawng jahpai nna Israela mung ting de ndai shadum jahprang dat ai ga hte hpawn shangun dat wu ai. Shawlu, Samuela ni hte rau majan pa de n hkan sa ai ni kadai mung ndai dumsu utang yan hpe di kau ai zawn hkrup sha na rai nga ai!?
Shaloi, Israela amyu masha ni gaw dai Madu kaning rai galaw wa na hpe hkrit ma ai rai nna, langai mi mung n hti ngam ai sha shanhte yawng rau sha pru sa wa ma ai.
8 Shawlu gaw shanhte hpe Bezek shara e zup hpawng da wu yang, Israela hta na 300,000 hte Yuda kaw na 30,000 du ma ai.
9 Shanhte gaw Yabesha kaw na du sa ai kasa ni hpe, ?Hpawt ni shani chyingtung garai n du yang shanhte hkye mawai la ai hkrum na re ai lam, nanhte a masha ni hpe wa tsun dan mu,? ngu nna tsun ma ai. Yabesha masha ni mung shiga dai hpe na jang, n chye tsun hkra kabu nga ma ai rai nna,
10 Nahasha hpe, ?Hpawt de nang hpe anhte asum jaw na saga ai, nang ra ai hku anhte hpe di mi,? ngu nna tsun ma ai.
11 Dai shana e, Shawlu gaw shi a masha ni hpe hpung masum garan nhtawm, jahpawt nhtoi htoi wa ai aten hta gumlau hpyen ni a dap de gat dumbri bang let Amon masha ni hpe htim gasat ma ai. Shanhte hpe shani chyingtung aten hta htau sat kau ma ai. Naw ngam nga ai ni mung tinang chye ai mi de hprawng bra mat ma ai.
12 Dai hpang Israela amyu masha ni gaw Samuela hpe, ?Shawlu gaw anhte a hkawhkam n tai ging ang nga ai nga nna tsun ai masha ni kanang rai nga ma ta? Anhte a lata de ap ya mi, anhte shanhte hpe sat kau na ga ai!,? ngu nna tsun ma ai.
13 Rai ti mung, Shawlu gaw, ?Dai ni na nhtoi gaw dai Madu Israela hpe hkye hkrang la ai shani rai nga ai majaw, langai mi mung sat kau hkrum na n rai,? ngu nna tsun wu ai.
14 Samuela gaw shanhte hpe, ?Anhte yawng Gilgala de wa saga; Shawlu hpe anhte a hkawhkam rai nga sai ngu, kalang mi bai tsun shana gaw,? ngu nna tsun wu ai.
15 Dai rai nna, shanhte yawng mung Gilgala de wa nna dai yang na chyoi pra ai shara hta Shawlu hkawhkam rai nga ai lam shanhte tsun shana ma ai. Shanhte mung mahku hkungga nawng ya mu ai hte Israela amyu masha ni yawng mung poi galaw ma ai.