10
1 Dai hpang Samuela gaw tsanlun sau rawng ai di bu langai la nna Shawlu a baw ntsa e ru jaw nna shi hpe pup let, ?Shi a amyu masha Israela hpe up hkang ai du tai na matu, dai Madu gaw nang hpe namman jaw ya nga ai. Dai rai nna shi a amyu masha ni hpe nang up hkang nna shanhte a gumlau hpyen ni yawng a lata kaw nna mung shanhte hpe makawp maga ya na rai ndai. Ndai gaw dai Madu nang hpe lata la nna shi a amyu masha ni hpe up hkang na du tai na matu nang hpe madun ai sakse rai nga ai.
2 Dai ni, nang ngai hte hka nna wa ai shaloi, Benyamin a lamu ga Zelza shara na Rahkela lup makau kaw masha lahkawng hte hkrum na ra ai. Shaloi, dai yan nang sa tam ai lawze ni mu la sai; na nwa gaw lawze ni a lam hpe n myit ru, na a lam myit tsang nna shi gaw, ?Nye a kasha a matu ngai kaning di na i?,? nga nna sha asan nga ai lam nang hpe tsun dan na mara ai.
3 Nang gaw Behtela e Karai Kasang a matu shagu hkungga nawng ya na nga hkawm lung wa ai marai masum hte hkrum nna, dai Tabora na chyoi pra ai hpun tu ai shara de nang du wa ai aten du hkra, dai yang kaw nna lung wa na rai ndai. Shanhte hta langai wa mi gaw bainam kasha masum dun nhtawm, kaga langai mi gaw muk pa masum gun ai hte masum ngu na wa mahtang sabyi hpring hkra rawng ai shanhpyi tau gun na rai ma ai.
4 Shanhte mung nang hpe hkap shakram la nhtawm muk pa lahkawng jaw na mara ai; dai hpe nang hkap la na rai ndai.
5 Dai hpang, Hpilisti dap nga ai Gibea shara na Karai Kasang a kawng de nang sa wa na rai ndai. Shing rai mare chyinghka e, sumpyi dawraw, chying bau, larung sumhkran hte tingse ni hpe dum let kawng ntsa hta nga ai tawn hkungri na yu wa ai myihtoi hpung mi hte nang hkrum na rai ndai. Shanhte gaw ka manawt let jahtau garu na mara ai.
6 Shaloi dai Madu a wenyi gaw akajawng sha nang hpe up hkang nna nawku htung hte seng ai ka manawt ai hte jahtau garu ai hta nang shang lawm nhtawm laklai ai masha tai wa na rin dai.
7 Ndai amu ni byin jang, Karai Kasang nang hpe woi galaw ai lam hpa mi rai tim hkan galaw nga u.
8 Ngai nang hte hkrum nna wan nat hkungga hte mahku hkungga nawng jau ya na ngu ai Gilgala de nye a shawng e nang sa wa na rai ndai. Nang hpang de ngai du nna nang galaw na amu hpe ngai tsun dan ai aten du hkra, dai yang e sanit ya naw la nga u,? ngu nna tsun wu ai.
9 Shawlu gaw Samuela kaw na pru mat wa na nga yin naw rai yang, Karai Kasang gaw Shawlu hpe myit nnan langai jaw wu ai. Samuela shi hpe tsun ai lam magup dai shani jang byin nga ai.
10 Shawlu hte shi a shangun ma shan gaw Gibea shara e du jang, myihtoi hpung mi hte shi hkrum wu ai. Shaloi Karai Kasang a wenyi gaw shi hpe up hkang let shi mung shanhte a kabu gara ka manawt ai hte jahtau garu ai hta shang lawm wu ai.
11 Shawlu ndai zawn galaw ai lam hpe shawng e shi chye chyap ai ni mu jang, shanhte langai hte langai gaw, ?Kisha a kasha hta hpa byin sai kun? Shawlu gaw myihtoi langai tai mat sai kun?,? ngu nna san hkat ma ai.
12 Dai yang e nga ai masha langai mi mung, ?Kaga myihtoi ni gaw gara hku rai nga ma ni? Shan a kawa ni mahtang kadai ni rai nga ma ta?,? ngu nna san wu ai. Dai re ai majaw, ?Shawlu gaw myihtoi rai mat sani?,? ngu ai ga gaw pru wa nga ai. Ref 10:12: 1Sa 19:23-24.
13 Shawlu gaw kabu gara ka manawt ai hte jahtau garu ngut jang, kawng ntsa na tawn hkungri nga ai de lung wa wu ai.
14 Shawlu a kawa toi gaw shi hte shangun ma wa hpe mu ai shaloi, shi gaw shan hpe, ?Nan kade sa myit ta?,? ngu nna san wu ai.
Shawlu mahtang, ?Lawze ni hpe hkan yu hkawm ga ai. An dai ni hpe n mu tam lu ga ai majaw, Samuela kaw mung sa du da saga ai,? ngu nna htan wu ai.
15 Shaloi Shawlu a kawa toi gaw, ?Shi nang hpe kaning nga tsun a ta?,? ngu nna san wu ai.
16 Shawlu gaw, ?Yam nga ni bai mu la manu ai nga nna shi an hpe tsun dat mi ai,? ngu nna htan wu ai. Rai ti mung, shi hkawhkam tai wa na lam Samuela tsun nu ai ga hpe chyawm gaw shi n tsun dan wu ai.
17 Samuela gaw Mizpa shara e nawku htung hte seng ai zup hpawng a matu amyu masha ni hpe shaga shinggyin da wu ai;
18 shanhte hpe, ?Dai Madu Israela a Karai Kasang gaw, ?Ngai gaw nanhte hpe Egutu mung kaw nna woi shapraw wa ni ai; Egutu masha ni a lata kaw na mung, nanhte hpe dip gamyet sha nga ai kaga masha amyu baw ni yawng a lata kaw na mung hkye mawai la ni ai.
19 Nanhte a ru yak tsin-yam tsindam hte mayak manghkang lam yawng hta na nanhte hpe hkye mawai shaw la ai wa mung, nanhte a Karai Kasang ngai nan rai nga nngai; rai ti mung dai ni nanhte ngai hpe ningdang kau nhtawm hkawhkam jaw ya mi, nga nna ngai kaw san myit dai. Rai sa, dai gaw grai kaja nga ai, dai rai nna dai Madu a man e amyu bawsang hte bawsang, lakung lama hte lakung lama rai nanhte nan hpawng nga mu,?? ngu nna tsun wu ai.
20 Dai hpang Samuela gaw amyu bawsang shagu hpe shawng de pru wa shangun nna, Benyamin amyu bawsang hpe dai Madu lata shaw la wu ai.
21 Dai hpang Samuela gaw Benyamin amyu bawsang hta na dinghku masha ni hpe shawng de pru sa shangun mu yang, Matri a dinghku lata la hkrum nga ai. Shaloi Matri a dinghku na lasha ni hpe shawng de pru sa shangun mu yang, Kisha a shadang sha Shawlu lata la hkrum nga ai. Shing rai shanhte shi hpe tam yu mu ti mung n mu lu ma ai rai nna,
22 shanhte gaw dai Madu hpe, ?Ndai yang e marai langai ngai naw nga ai n rai ni?,? ngu nna san ma ai.
Dai Madu mahtang, ?Shawlu gaw htawra ang na gun rai shingdu e makoi gyem nga ai,? ngu nna htan wu ai.
23 Dai rai nna, shanhte kagat sa nhtawm amyu masha ni hpang de Shawlu hpe woi shapraw wa mu ai rai nna, kaga ni hta mung abaw mi jan tsaw nga ai hpe shanhte mu lu ma ai.
24 Samuela gaw amyu masha ni hpe, ?Dai Madu lata la nu ai wa gaw nang e nga nga ai law! Shi hte bung ai wa kadai mung anhte a lapran e n nga ma ai,? ngu nna tsun wu ai.
Shaloi amyu masha ni yawng gaw, ?Hkawhkam wa asak galu u ga law!,? ngu nna jahtau tsun ma ai.
25 Samuela gaw hkawhkam wa a ahkaw ahkang hte shi galaw na lit ni a lam amyu masha ni hpe tsun shaleng dan wu ai; Shing rai dai ni hpe laika langai mi hta ka nhtawm chyoi pra ai shara hta shi tawn da wu ai. Dai hpang masha shagu hte hpe nta de wa kau shangun wu ai.
26 Shawlu mung Gibea mare na shi a nta de bai wa wu ai. Karai Kasang e shanhte a myit masin hpe ahtawk jahkra ya nu ai dai daru magam n-gun rawng ai masha nkau mi mung shi kaw hkan nang ma ai.
27 Rai ti mung, masha gumbyak nkau mi mahtang, ?Ndai masha wa sha mi anhte hpe kaning rai mai kaja lam galaw ya lu na rai nga a ta?,? ngu nna tsun ma ai. Shanhte gaw shi hpe n kaw n law di mu ai hte kumhpa hpa mung n sa sak jaw ma ai.