9
(1Hk 10:1-13)
1 Sheba hkawhkam jan gaw Shawlumon a mying kajai gumhkawng nga ai hpe na jang, shi hpe htai yak na zawn nawn ai ga san ni hpe san let chyam yu na nga, Yerusalem mare de sa wa wu ai. Shi gaw shi kaw hkan gumbawm nang ai masha wunawng wuwa ni hte rau gawla-uk ni hta manam pyaw ai namji namya ni, lung seng ni hte ja law law htaw let woi sa wa wu ai. Shawlumon hte shi hkrum jang shi myit shapraw lu ai ga san yawng hte shi hpe san yu wu ai. Ref 9:1-9: Mat 12:42; Luk 11:31.
2 Shawlumon gaw dai ga san ni yawng hpe htai ya ai rai nna tsun shaleng ai lam hta shi a matu nau wa yak ai lam hpa mung n nga nga lu ai.
3 Sheba Hkawhkam jan gaw Shawlumon a hpaji byeng-ya a lam hpe na nna shi gap da nu ai hkawhkam htingnu hpe sa mu wu ai.
4 Bai shi gaw sha ku ntsa e shi hpe daw jau ai lusha hpe mung, shi a du salang ni nga ai nta ni hpe mung, shi hkawhkam hkaw na rung magam bungli galaw ai hpung kaba hte shanhte bu hpun sumli ai hking ni hpe mung, lusha poi ni hpe daw jau ya nga ai shangun ma ni hpe mung, Nawku Htingnu kata hta shi nawng jau ya ai shagu hkungga ni hpe mu jang, nsa pyi n lu sa la lu na daram mau kajawng mat wu ai.
5 Shi gaw hkawhkam wa hpe, ?Nang hte na a hpaji byeng-ya a lam hte seng nna nye a mungdan hta ngai na lu ai ga gaw teng nga sahka!
6 Nye a myi hte chyaw n mu lu dingsa shanhte ngai hpe tsun dan ai hpa lam hpe mung ngai n kam nngai. Na a hpaji byeng-ya ka-ang hkup hpe pyi ngai n na yu nngai; nang gaw masha ni tsun kajai nga ai hta pyi grau nna hpaji rawng nga ndai.
7 Na a man e nang hpe tut nawng daw jau nga ai masha ni hte na a hpaji ga ni hpe na la lu na ahkaw ahkang lu la ai ni gaw kade sha gam kaja nga ma hka!
8 Dai Madu na a Karai Kasang hpe shakawn kungdawn ga law! Shi a mying nsang hta up hkang na matu nang hpe hkawhkam shatai let shi hte nang rau rai nga ai hpe kade sha yu awng sharawng nga ai hpe madun dan nga nu ai. Shi gaw shi a amyu Israela hpe tsaw ra ai hte shanhte hpe htani htana kyem mazing da mayu wu ai majaw teng man ai tara hte nang sin lajang lu u ga nga, nang hpe shanhte a hkawhkam shatai da nit dai,? ngu nna tsun wu ai.
9 Shi gaw shi la sa ai kumhpa ni, Hkawhkam Shawlumon hpe jaw wu ai; dai ni gaw ja tan manga daram hte manam pyaw ai namji namya hte lung seng law law sak jaw wu ai. Sheba Hkawhkam jan gaw Hkawhkam Shawlumon hpe sak jaw ai manam pyaw ai namji namya daram kaja ai gaw galoi mung n nga yu nga sai.
10 (Hkawhkam Hiram hte Hkawhkam Shawlumon a masha ni gaw Ohpira mung na ja, Junipa hpun hte lung seng law law hpe mung la wa ya mu ai.
11 Shawlumon gaw Nawku Htingnu hte hkawhkam htingnu a lakang ni a matu dai hpun ni hpe lang wu ai; mahkawn mangoi ai ni a matu dawraw tingse galaw ai hta mung lang nga ai. Yuda mung hta dai hte bung ai hpun shawng de galoi mung n mu yu nga ai.)
12 Hkawhkam Shawlumon gaw shi a matu hkawhkam jan la sa ya ai kumhpa ni a matu bai jaw ya ai kumhpa hta kaga, Sheba Hkawhkam jan hpyi ai made jaw ya wu ai. Dai hpang shi hte shi a hpang hkan ai ali ama ni Sheba mung de nhtang mat wa ma ai.
(1Hk 10:14-25)
13 Hkawhkam Shawlumon shaning shagu lu la ai aja gaw tan hkun manga jan rai nga ai;
14 dai sha n-ga, hpaga ga ai masha ni kaw na hta la lu ai ahkun ni, hpaga amyat ni lawm nga ai. Arabi hkawhkam ni hte Israela ginwang ni hpe up hkang ai mung du ni mung ja gumhpraw ni la sa ya nga ma ai.
15 Shawlumon gaw ninggang kaba lahkawng tsa hte hpe ja pawng shi manga daram hte chya magap da nga ai;
16 bai shi gaw ninggang kaji masum tsa hte hpe mung aja pawng matsat daram mi hte chya magap da nga ai. Shi gaw ndai ninggang ni yawng hpe Lebanon Nam Maling a Gawknu hta tawn da wu ai.
17 Hkawhkam wa mung hkawhkam tingnyang kaba langai galaw nhtawm daw mi hpe magwi kawng hte galaw nna, ngam ai daw hpe ja jet hte sup da wu ai.
18 Tingnyang de lung wa na matu lakang ninggam kru rawng nna tingnyang hte matut ai lagaw kabye shara hpe aja hte sup da nga ai. Tingnyang a maga mi hte maga mi de lata mara shara rawng nga ai rai nna de a makau e hkanghkyi lahkawng tsap nga ai.
19 Lakang ninggam shagu a matu jahtum lahkawng maga hta hkanghkyi langai ngai tawn da ai rai nna hkanghkyi yawng shi lahkawng rai nga ai. Dai hte bung ai tingnyang gaw gara mungdan hta mung n galaw shadun da nga ai.
20 Hkawhkam Shawlumon a gawm ni yawng hpe aja hte galaw da nga ai; Lebanon Nam Maling a Gawknu hta lang ai wan ni yawng ja jet hkrai rai nga ai. Shawlumon a prat e gumhpraw gaw hpa manu n dan ai zawn myit nawn da ma ai.
21 Shi gaw nammukdara hta hkawm ai sanghpaw hpung ni lu ai rai nna, Hiram a sanghpaw li hpung ni hte rau hkawm nga ma ai. Shing rai masum ning du shagu shi a sanghpaw li hpung ni gaw ja, gumhpraw, magwi kawng, u tawng ni hte woi ni hpe htaw let nhtang wa wa rai ma ai.
22 Hkawhkam Shawlumon gaw mungkan ga na kaga hkawhkam ni kadai hta mung grau nna sut su ai hte hpaji byeng-ya rawng nga ai.
23 Karai Kasang gaw Shawlumon hpe jaw ya nu ai hpaji byeng-ya hpe sa madat hkam la na matu shanhte yawng shi hpe sa san shajang nga ma ai.
24 Shanhte hta na kadai mung Shawlumon a matu kumhpa ngu na aja, gumhpraw, palawng galu, hpyen laknak, manam pyaw ai namji namya, gumra hte lawze ni hpe la sa ya mu ai. Dai hpe shaning shagu matut sak jaw ma ai.
25 Hkawhkam Shawlumon gaw shi lu da ai hpyen leng hte gumra ni a matu gumra lawng hkying mali hte gumra dap a matu gumra mun mi hkying lahkawng lu nga ai. Dai hta na nkau mi hpe Yerusalem mare hta mung, ngam ai ni hpe kaga mare ni hta tawn da nga ma ai. Ref 9:25: 1Hk 4:26.
26 Shi gaw Uhprat hka nu kaw nna Hpilisti mung hte Egutu mung lamu ga jarit du hkra, dai lapran na mungdan ni hpe up hkang ai hkawhkam ni yawng hta tsaw htum ai wa rai nga ai. Ref 9:26: Nin 15:18.
27 Shi hkaw dung ai aten hta Yerusalem mare e gumhpraw gaw nlung zawn, arit hpun gaw Yuda mung bum lagaw hkan e tu ai maihkawng hpun ni zawn law htam nga ai.
28 Shawlumon gaw Musri mung hte kaga mungdan shagu na gumra ni hpe mari jashawn wu ai. Ref 9:28: Trj 17:16.
(1Hk 11:41-43)
29 Ya naw ngam nga ai Shawlumon a labau npawt ndung hkren re ai lam hpe Myihtoi Nahtan a Labau Laika hta mung, Shilo mare na Myihtoi Ahiya a Laika hta mung, Israela Hkawhkam Yeroboam a lam lawm ai Myihtoi Ido a Shingran Laika ni hta ka matsing da nga ai.
30 Shawlumon gaw Yerusalem mare hta hkaw dung nna Israela mung ting hpe shaning mali shi ning tup up nga ai.
31 Shi si mat sai rai nna Dawi a Mare hta lup makoi da ma ai; dai hpang shi a kasha Rehoboam gaw shi a hkang hta hkawhkam tai wa sai.