8
(1Hk 9:10-28)
1 Shawlumon gaw Nawku Htingnu hte shi a hkawhkam htingnu gap na matu hkun ning
2 aten la wu ai. Shi gaw Hiram shi hpe jaw tawn ai mare ni hpe bai de da nhtawm Israela masha ni hpe dai hkan e nga nga shangun wu ai.
3 Shi gaw Hamat hte Zoba lamu ga hpe mung madu la kau nhtawm,
4 nam mali kata na Palmora mare hpe bunghku kum da wu ai. Shi gaw sut gan mahkawng da na matu mung ka-ang shara ang ai Hamat hta nga ai mare ni yawng hpe bai de da nga ai.
5 Shawlumon gaw ndai mare ni hpe bai gaw gap da nga ai; dai ni gaw lahta Bet Horon, lawu Bet Horon, (htinggrang lu ai chyinghka ni hte bunghku kum ai mare ni),
6 Balat mare, shi a sut gan mahkawng da ai mare ni yawng hte shi a gumra ni hte leng ni tawn da ai mare ni rai nga ai. Yerusalem mare hta mung, Lebanon mung hta mung, shi up hkang ai mungdan hkan e mung, gaw gap na matu shi a shatawng shada ai amu yawng hpe shi galaw da wu ai.
7-8 Shawlumon gaw Israela masha ni mungdan madu la mu yang, shanhte n sat kau da ai Hkanan masha ni a amyu matu ni hpe magam bungli galaw shangun da ma ai. Dai amyu matu ni hta Amori, Hiti, Perizi, Hiwi hte Yebusi masha ni lawm nga ma ai rai nna dai ni du hkra dai amyu ni hpe mayam shatai da nga ma ai.
9 Israela masha ni chyawm gaw mayam n shatai hkrum nga ma ai; shanhte gaw shi a hpyenla ni, du salang ni, hpyen leng up hkang ai ni; gumra jawn ai dap ni hta gun hpai shajang ma ai.
10 Gaw gap magam bungli masing amyu myu hta bungli galaw masha ni hpe woi hpareng ai du salang ni marai 250 rai ma ai.
11 Shawlumon gaw shi a madu jan rai nga ai Egutu hkawhkam a shayi sha hpe Dawi a Mare kaw nna shi a matu gap da ya ai nta de htawt la wu ai. Shi gaw, ?Ga Shaka Sumpu tawn da ai shara gaw Chyoi Pra nga ai majaw hkawhkam jan gaw Israela Hkawhkam Dawi a hkawhkam htingnu hta nga lu na n rai,? ngu nna tsun wu ai.
12 Shawlumon gaw Nawku Htingnu a man e shi galaw da nu ai tawn hkungri ntsa e dai Madu a matu shagu hkungga ni nawng ya wu ai.
13 Mawshe a Tara hta tsun da sai hte maren, Bansa Nhtoi hkungga, Shata praw hkungga, shaning shagu galaw nga ai poi ngu ai matsi n rawng ai muk poi, Nmut shang poi hte Sum Poi ni hpe dai Chyoi Pra ai shani shagu a matu wan nat hkungga ni hpe shi nawng ya wu ai. Ref 8:13: Pru 23:14-17; 34:22-23; Bhk 28:9; 29:39; Trj 16:16.
14 Shi gaw shi a kawa Dawi jahkrat tawn da ai tara ni hte maren hkinjawng ni a shani shagu galaw na amu hte mahkawn mangoi ai hte amu galaw ai hkinjawng ni hpe karum shingtau ai Lewi masha ni hpe hpaw ninghtan tawn wu ai. Shi gaw Karai Kasang a masha Dawi e hkang da nu ai hte maren chyinghka shagu hta shanhte gun hpai ang ai shani shagu na bungli lit ni hpe hpung hte hpung garan gun na matu Nawku Htingnu sin ai masha ni hpe mung hpaw ninghtan tawn wu ai.
15 Dawi gaw hkinjawng ni hte Lewi masha ni hpe arung arai mahkawng tawn ai sut dum hte kaga lam ni hte seng nna akri akrai rai gun hpai na amu matsun maroi ga jaw ya wu ai.
16 Ndai aten hta Shawlumon a bungli masing ni yawng hpe galaw shangut da nga ai. Dai Madu a Nawku Htingnu a npawt nhpang gaw ai shani kaw nna de a bungli hpe galaw shangut ai aten du hkra galaw shangut da lu nga ai.
17 Dai hpang Shawlumon gaw Edom mung, Nawng Hkyeng a hkin-gau ntsa e nga ai Elat mare hte Eziongebera mare de sa wa wu ai.
18 Hkawhkam Hiram gaw shi up hkang ai npu na du salang ni hte mahkrum madup lu sai sanghpaw masha ni hpe shangun dat nhtawm Shawlumon a du salang ni hte rau Ohpira mung de li jawn sa nna Shawlumon hpang de ja tan 16 daram la wa ya ma ai.