28
1 Hkawhkam Dawi gaw Israela du salang ni yawng hpe Yerusalem mare hta zup hpawng nga na matu hkang dat wu ai. Dai rai nna amyu bawsang ni a du ni yawng mung, mungdan a magam amu ni hpe up hkang nga ai du ni mung, amyu lakung ni a ningbaw ni mung, hkawhkam hte shi a shadang sha ni hte seng ai sut rai ni hte yam nga hpung ni hpe yu lajang ai ni mung, hkawhkam htingnu kata na du salang ni yawng mung, hpyenla ni hpe woi awn ai ni hte ahkyak ai masha ni yawng Yerusalem mare e sa zup hpawng ma ai.
2 Dawi gaw shanhte a man e sa tsap nhtawm ning ngu nna tsun wu ai: ?Nye a mung masha ni e, nye a ga madat mu. Ga Shaka Sumpu htani htana shanu nga na nta hte dai Madu anhte a Karai Kasang a lagaw kabye lahkum hpe galaw na ngai ra sharawng nga nngai. Shi hpe shagrau sha-a na Nawku Htingnu langai gaw gap na matu ngai hkyen lajang da ni ai; Ref 28: 2-7: 2Sa 7:1-16; 1Hl 17:1-14.
3 rai ti mung ngai gaw hpyenla langai mi rai nga ai hte asai nau jahkaw kau ni ai majaw dai hpe galaw na ahkang shi hkum pat kau ya nga sai.
4 Dai Madu Israela a Karai Kasang gaw ngai hpe lata la sai hte Israela ntsa e nye a amyu matu mara ni hpe htani htana up shangun nga ai. Shi gaw ningbaw tai ya na matu Yuda amyu bawsang hpe lata la nu ai; Yuda amyu kaw na nye wa a dinghku hpe shi lata la nga sai. Dai dinghku masha ni kaw na ngai hpe woi la nhtawm Israela mung ting a ntsa e up nga na matu ngai hpe hkawhkam shatai ni ai gaw shi a ra sharawng ai lam rai nga ai.
5 Shi ngai hpe shadang sha law law jaw ya ai hta na dai Madu a mungdan ngu ai Israela mung ting hpe up hkang na matu Shawlumon hpe shi lata la nu ai.
6 ?Dai Madu gaw ngai hpe, ?Na a kasha Shawlumon gaw nye a Nawku Htingnu hpe gap ai wa rai na ra ai. Nye a kasha tai na matu ngai shi hpe lata la ni ai rai nna ngai gaw shi a kawa tai na nngai.
7 Nye a tara ni hte hkang da ai ga ni yawng hpe ya shi galaw nga ai zawn, sadi sahka hte matut nna madat mara ai rai yang, shi a mungdan hpe htani htana prat dingsa ngai shagrin da na we ai,? ngu nna tsun wu ai.
8 ?Ya chyawm gaw nye a amyu masha ni e, ndai mai kaja ai mungdan hpe nanhte a matu madu lu nna, ban hte ban htani htana nanhte a lata hta arai nga lu na matu anhte a Karai Kasang a man e mung, dai Madu a amyu masha ngu ai Israela masha ni yawng a ndai shawa hpawng a man e mung, dai Madu anhte a Karai Kasang anhte hpe hkang da mada lam magup hpe sadi sahka hte hkan sa madat mara na matu, ngai nanhte hpe tsun shadut nngai law.?
9 Shi gaw Shawlumon hpe, ?Ngai sha e, na nwa a Karai Kasang hta yin la nna labra ai myit n rawng ai sha, awng sharawng ai myit masin hte shi hpe daw jau na ngai nang hpe tsun shadut nngai. Anhte a myit mang ai lam hte ra sharawng ai lam yawng mayawng hpe shi chye ya nga ai. Nang shi kaw sa ai rai yang, shi nang hpe hkap la na ra ai; rai ti mung, nang shi hpe kayin kau da ndai rai yang, shi nang hpe htani htana kau da na ra ai.
10 Shi a chyoi pra ai Nawku Htingnu hpe gap na matu dai Madu nang hpe lata la nit dai hpe nang dum hprang lu na rai ndai. Ya chyawm gaw dai hpe galaw sanu - dai hpe myit jahkut daw dan let galaw nu,? ngu nna tsun wu ai.
11 Dawi gaw Shawlumon hpe Nawku Htingnu yawng hte seng ai sut rai tawn ai gawk ni, kaga gawk ni hte yubak mara raw dat ya ai Chyoi Pra Htum ai Shara ni a matu hkrang kasi ni jaw ya wu ai.
12 Shi gaw wang ni hte dai grup yin e nga ai gawk ni, Nawku Htingnu arung arai hte dai Madu hpe ap nawng ya ai kumhpa ni hpe tawn da na sut gawk ni a lam, shi a kraw kata rawng ai kasi ni yawng Shawlumon hpe jaw ya wu ai.
13 Dawi gaw hkinjawng ni Lewi masha ni shanhte a magam amu galaw na matu mung, Nawku Htingnu kata na amu galaw na matu mung, Nawku Htingnu e lang ai hkinghku arung arai ni hpe yu lajang na matu kasi ni hpe shatsam da wu ai.
14-16 Shi gaw hkinghku arai galaw na matu mung, pyengdin hte pyengdin shadun shagu a matu mung, gumhpraw ku ni hte Karai Kasang hpe nawng ya ai muk pa ni hpe tawn da ai ja ku a matu mung, ja gumhpraw gade lang ra na lam tsun matsun da nga ai.
17 Shi gaw zun kabrang ni, hka wan ni hte hka yam ni galaw ai hta ja jet gade lang ra ai hpe mung, ban hka wan ni galaw ai hta ja gumhpraw gade lang ra ai hpe mung,
18 manam pyaw ai baw nat na tawn hkungri a matu ja jet gade lang ra ai mung, dai Madu a Ga Shaka Sumpu ntsa e singkaw kahpyan ka-up ai singkaw tu ai hkrung kanu ni a matu leng galaw ai hta mung, gade lang ra ai lam tsun matsun da nga ai.
19 Hkawhkam Dawi gaw, ?Dai Madu shi nan ndai amu galaw shapraw na matu ngai hpe hkang da ai matsun maroi ga hte maren, ndai lam yawng kasi ka da ai laika hta rawng nga ai.
20 Hkawhkam Dawi gaw shi a kasha Shawlumon hpe, ?Kam sham ai hte myit jahkut daw dan u. Bungli galaw hpang sanu; hpa mung nang hpe myit n daw shangun nga u ga. Ngai daw jau ai dai Madu Karai Kasang gaw nang hte rau rai nga na ra ai. Shi nang hpe kau da na ra ai n rai; shi a Nawku Htingnu galaw na amu shangut shakre lu ai aten du hkra, shi gaw nang hte rau rai nga na ra ai.
21 Hkinjawng ni hte Lewi masha ni gaw Nawku Htingnu kata amu galaw na magam lit shatsam da ai hkrum ma ai. Hpa baw amu hta rai ti mung kung kyang ai amu galaw masha ni gaw nang hpe grai sharawng ai myit hte karum la na mara ai. Amyu masha ni yawng hte shanhte a ningbaw ni mung na a hkang da ai ga hta hkan na mara ai,? ngu nna tsun wu ai.