22
1 Dai rai nna Dawi gaw, ?Ndai shara gaw Madu Karai Kasang a Nawku Htingnu gap na shara tai na ra ai. Tawn hkungri nga ai ndai yang gaw Israela amyu masha ni wan nat hkungga nawng ya na shara tai na ra ai,? ngu nna tsun wu ai.
2 Hkawhkam Dawi gaw Israela mung e nga ai maigan masha ni yawng hte hpe jahpawng da nna amu galaw shangun na matu hkang da wu ai. Shanhte hta na nkau mi Nawku Htingnu gaw gap na nlung tawk ai amu hkyen lajang nga ma ai.
3 Shi gaw hpri maina galaw na matu hpri law law hpe mung, hpun chyinghka ni a matu matep ni hpe mung, kadai e mung n dang shen hkra law ai magri mang ni hpe tawn da wu ai.
4 Shi hta e arit mailung tawng law law sa sa ya ai Turu hte Sidon masha ni nga nga ma ai.
5 Dawi gaw, ?Ngai sha Shawlumon galaw na ra ai Nawku Htingnu gaw galu kaba hkik hkam nhtawm mungkan hta gumhkawng na ra ai. Rai ti mung shi gaw naw kaji ai hte mahkrum madup hpa mung n nga nga ai majaw de a matu ra mara ngai shachyip da na we ai,? ngu nna myit da wu ai. Dai rai nna Dawi gaw shi garai n si yang arung arai law law shajin shachyip da wu ai.
6 Shi gaw shi a kasha Shawlumon hpe shaga la nna dai Madu Israela a Karai Kasang a matu Nawku Htingnu langai galaw na lam shi hpe hkang da wu ai.
7 Dawi gaw shi hpe, ?Sha e, dai Madu nye a Karai Kasang hpe shagrau sha-a na matu nta langai ngai galaw mayu nngai. Ref 22:7-10: 2Sa 7:1-16; 1Hl 17:1-14.
8 Rai ti mung ngai mahtang masha law law hpe sat kau nhtawm majan nau wa gasat kau nga nit dai nga nna dai Madu ngai hpe tsun ni ai. Dai sai hka shalwi ai amu ngai shabyin kau ni ai majaw, shi a matu Nawku Htingnu ngai hpe n gap shangun nga sai.
9 Rai ti mung shi chyawm gaw ngai hpe ga sadi jaw nu ai. Dai rai nna shi gaw, ?Shi a gumlau hpyen ni yawng a lata kaw nna ngwi pyaw sim sa ai lam ngai shi hpe jaw ya na nngai majaw ngwi pyaw sim sa ai hte up hkang lu ai shadang sha langai nang lu na rin dai. Shi a amying gaw Shawlumon rai na ra ai. Shi hkaw dung ai laman Israela hpe ngwi pyaw sim sa ai lam hte shim lum lam ngai jaw na we ai.
10 Shi mahtang nye a matu Nawku Htingnu gap ya na ra ai. Shi gaw nye a kasha tai nna ngai gaw shi a kawa tai na nngai. Shi a hkawhkam amyu matu gaw Israela mungdan a ntsa e htani htana a up nga na ra ai,?? ngu nna tsun wu ai.
11 Dawi gaw, ?Ya chyawm gaw sha e, dai Madu na a Karai Kasang gaw nang hte rau rai nga u ga, shi a matu nang hpe awng dang hkra galaw shangun ai Nawku Htingnu hte seng ai shi a ga sadi hpe shi shadik shatup ya nu ga law.
12 Shi a Tara hte maren, Israela mungdan hpe nang up hkang lu hkra, dai Madu na a Karai Kasang gaw nang hpe myit kraw hpaji hte hpaji byeng-ya jaw ya nga u ga law.
13 Dai Madu gaw Israela amyu ni a matu Mawshe hpe jaw ya sai tara ni yawng hpe nang madat mara ndai rai yang, nang hta awng dang ai lam hkam la lu na ndai. Myit jahkut daw dan nna kam hpa nga u. Hpa lam mung nang hpe n hkrit shangun nga u ga. Ref 22:13: Yak 1:6-9.
14 Nawku Htingnu gap ai hta lang na matu ngu nna nye a n-gun hte aja tan hkying mali hte gumhpraw tan mun mali daram hpe ngai mahkawng da nngai. Dai sha n-ga, n dang hti hkra law ai magri mang hte hpri mung nga nga ai. Ngai mung hpunpyen hte nlung ni hpe shajin da ni ai, rai ti mung nang gaw dai hta naw jat lu na rai ndai.
15 Amu galaw masha law law mung nang lu nga ndai. Nlung maw ni hkan amu galaw na masha mung, ing gade chya ai ni hte lasama amu galaw ai ni mung,
16 aja, gumhpraw, magri mang hte hpri ni hte amyu baw shagu hpe lata hte chye galaw ai masha ni mung alaw alam wa rai nga ai. Ya jang amu galaw hpang sanu. Dai Madu gaw nang hte rau rai nga u ga law,? ngu nna matut tsun wu ai.
17 Dawi gaw Shawlumon hpe karum la na matu Israela ningbaw ni yawng hpe hkang da wu ai.
18 Shi gaw, ?Dai Madu na a Karai Kasang gaw nang hte rau rai nga nna, shara shagu hkan ngwi pyaw sim sa lam nang hpe jaw da nga sai. Shi gaw ngai hpe ndai mung na amyu masha ni yawng hpe up hkang shangun nga ai; ya chyawm gaw shanhte gaw na a npu hte dai Madu a man e taw nga ma ai.
19 Ya chyawm gaw dai Madu na a Karai Kasang hpe na a myit kraw lawang mahkra hte na a myit masin mahkra hte ya daw jau nga u. Nawku Htingnu hpe gaw gap hpang wa sanu; shaloi dai shara hta dai Madu a Ga Shaka Sumpu hte shi hpe nawku yang lang ai kaga chyoi pra ai arung arai ni hpe tawn da lu u ga,? ngu nna tsun wu ai.