21
(2Sa 24:1-25)
1 Satan gaw Israela amyu masha ni hpe sharu shatsang mayu wu ai majaw yuptung jahpan hta na matu Dawi hpe myit daw dan shangun wu ai.
2 Dawi gaw Yoab hte kaga du salang ni hpe, ?Mungdan a jahtum jut shara mi kaw nna kaga shara mi de du hkra nga ai amyu masha ni hpang de sa nhtawm amyu masha ni hpe hti yu su. Dai hkan e gade wa law nga ma ai hpe ngai chye mayu nngai,? ngu nna hkang dat wu ai.
3 Yoab chyawm gaw, ?Dai Madu gaw Israela amyu masha ni hpe ya shanhte nga nga ai hta htam latsa n ga hkra naw shalaw u ga! Madu hkawhkam e, shanhte yawng gaw na a shangun ma ni hkrai rai ma ai. Ndai amu hpe nang hpa majaw galaw mayu nga n ta? Mungdan ting hpe hpa majaw shut shangun na rai ta?,? ngu nna htan wu ai.
4 Rai ti mung hkawhkam wa mahtang Yoab hpe dai hkang da ai ga hpe madat mara shangun wu ai rai nna, Yoab mung Israela mungdan ting de dinghkren hkawm mat wa nhtawm Yerusalem mare de bai nhtang wa wu ai.
5 Shi gaw Hkawhkam Dawi hpe hpyen amu gun hpai lu ai Israela mung na 1,100,000 hte Yuda mung na 470,000 yawng hte nga nga ai lam wa tang madun wu ai.
6 Yoab chyawm gaw hkawhkam wa a hkang da ai ga hpe n ra sharawng wu ai majaw Lewi hte Benyamin amyu bawsang ni hpe yuptung jahpan hta n bang la wu ai.
7 Dai zawn galaw kau manu ai lam hpe Karai Kasang n ra sharawng wu ai rai nna Israela amyu ni hpe ari jaw wu ai.
8 Dawi gaw Karai Kasang hpe, ?Ndai amu galaw ai majaw, ngai gaw hkrit hpa yubak hpe galaw shut kau ni ai! Chyeju hte ngai hpe mara dat ya e. Ngai gaw angawk ai amu hpe galaw kau se ai,? ngu nna tsun wu ai.
9 Shaloi dai Madu gaw Dawi a myihtoi Gad hpe,
10 ?Lata la na lam masum ngai shi hpe jaw tawn da ai lam Dawi hpe sa tsun su; shi lata la ai hpe sha ngai galaw na we ai,? ngu nna tsun wu ai.
11 Gad gaw Dawi kaw sa nhtawm, dai Madu shi hpe kaning nga tsun sai lam tsun dan let, ?Hpa hpe mahtang lata la na wu ni?
12 Na a mungdan hta masum ning hku hku na, shing n rai, shata masum na a gumlau hpyen ni a lata kaw nna hprawng hkawm na, shing n rai masum ya laman dai Madu gaw nang hpe nhtu hte gasat nna na a mung hta ana zinli dat nhtawm shi a lamu kasa gaw Israela mung ting de si hkrung si htan shabyin dat ya na ra ndai kun? Dai Madu hpe kaning re ai mahtai ngai jaw na rai ta?,? ngu nna san wu ai.
13 Dawi gaw Gad hpe, ?Ngai myit ru nga ai aten rai nga ai law! Rai ti mung masha a lata hku ari jaw ai hpe ngai n ra sharawng nngai. Dai Madu gaw matsan dum ai wa rai nga ai majaw shi nan ngai hpe ari jaw ai wa she rai u ga,? ngu nna tsun htang wu ai.
14 Dai re ai majaw,Madu mung Israela amyu masha ni a ntsa de ana zinli dat dat wu ai rai nna shanhte hta na masha mun sanit si mat ma ai.
15 Dai hpang Yerusalem mare hpe jahten kau na matu lamu kasa langai hpe shi shangun dat wu ai; rai ti mung shi a myit galai mat nhtawm dai lamu kasa hpe, ?Hkring sanu! Ram sai!,? ngu nna tsun wu ai. Shaloi dai lamu kasa gaw Yebusi masha Arauna a mam chyarang makau e tsap nga ai.
16 Dai lamu kasa gaw Yerusalem mare hpe jahten sharun kau na matu shi a lata hta nhtu lang da nhtawm nbung ka-ang e tsap nga ai lamu kasa hpe Dawi mu wu ai. Dawi hte shi a amyu masha ni a ningbaw ni gaw lachyit nba bu hpun let shanhte a myi man ga de du hkra gum dagup nga ma ai.
17 Dawi gaw, ?O Karai Kasang e, ngai gaw shut ai amu hpe galaw ai wa rai nga nngai; yuptung jahpan hta shangun ai mung ngai rai nga nngai. Ndai matsan mayan re ai amyu masha ni hpa galaw kau nga ma ni? Dai Madu nye a Karai Kasang e, ngai hte nye a dinghku masha ni hpe mahtang ari jaw rit law; na a amyu masha ni hpe chyawm gaw jahkrung da u,? ngu nna hpyi tsun wu ai.
18 Arauna a chyarang pa e dai Madu a matu tawn hkungri langai galaw na lam, Dawi hpe hkang da na, dai Madu a lamu kasa gaw Gad hpe tsun wu ai.
19 Shi hpe Gad tsun nu ai hte maren, dai Madu a hkang da ai ga hpe Dawi madat nna sa mat wa wu ai.
20 Dai yang na chyarang pa hta Arauna hte shi a shadang sha mali hte gaw hkaulan mam kabye nga ma ai; shanhte gaw dai lamu kasa hpe mu jang, shi a shadang sha ni rawt kagat mat wa nhtawm sa makoi nga ma ai.
21 Hkawhkam Dawi shani sa wa nga ai hpe Arauna mu dat ai shaloi jang, chyarang pa kaw nna shi pru sa nhtawm shi a myi man ga de hkra hkra gum dagup wu ai.
22 Dawi gaw shi hpe, ?Ana zinli hpe jasim kau na matu na a chyarang pa ngai hpe dut ya e, dai Madu a matu tawn hkungri langai ngai gap lu na rai nngai; de a manu tup hpe mung ngai jaw na we ai,? ngu nna tsun wu ai.
23 Arauna mahtang, ?Madu hkawhkam e, dai hpe la u; nang ra sharawng ai hte maren galaw u. Ndai yang e tawn hkungri ntsa wan nat hkungga nawng ya na usu ni mung, ju hpun shatai na matu mam dup gawng ni hte hkungga shatai na hkaulan mung nga nga ai. Dai ni yawng ngai nang hpe jaw na we ai,? ngu nna tsun wu ai.
24 Rai ti mung hkawhkam wa chyawm gaw, ?N rai law, de a matu hkrat ang ai manu jahpu ngai nang hpe jaw na de ai. Ngai hta hpa manu n hkrat ang ai sha, nang madu da ai arai hpa hte mung dai Madu hpe hkungga n nawng ya na nngai,? ngu nna htan wu ai.
25 Shing rai shi gaw chyarang pa a matu aja dengga kru tsa Arauna hpe jaw wu ai.
26 Dai yang e, dai Madu a matu tawn hkungri langai galaw nna wan nat hkungga hte mahku hkungga ni hpe nawng jau ya wu ai. Dai Madu mung sumsing lamu kaw nna wan jahkrat dat nhtawm hkungri ntsa na shagu hkungga ni hpe hkru kau ya let, shi a akyu hpyi ga hpe htan ya wu ai.
27 Dai Madu gaw shi a nhtu bai bang kau na matu lamu kasa hpe tsun wu ai rai nna lamu kasa mung madat nga ai.
28 Dawi gaw shi a akyu hpyi ga hpe dai Madu htan ya nga sai hpe mu wu ai rai nna, Arauna a chyarang pa na tawn hkungri ntsa e shagu hkungga ni hpe nawng ya nga wu ai.
29 Nam mali hkan e Mawshe galaw ai dai Madu a hpung shingkang shanu nga ai Sum hte wan nat hkungga nawng ya ai tawn hkungri ni gaw dai aten e Gibeon mare na nawku ai shara hta naw nga nga ai;
30 rai ti mung Dawi chyawm gaw dai Madu a lamu kasa a nhtu hpe hkrit nga ai majaw Karai Kasang hpe nawku na matu dai shara de n sa gwi nga ai.