SHAKAWN KUNGDAWN 7
1 O Madu nye a Karai Kasang e, makawp maga la na matu,
ngai nang kaw du sa nngai;
ngai hpe hkan shachyut ai ni yawng a lata kaw nna, ngai hpe mawai la ai hte hkrang shaw la e;
2 shing n rai yang, shanhte gaw hkanghkyi zawn ngai hpe kawa hpai mat wa na maru ai,
ngai hpe hkye hkrang la na, kadai mung n nga ai shara hta,
shanhte gaw ngai hpe ashep ashin di gang je kau na mu ai.
3-4 O Madu nye a Karai Kasang e, ngai masha langai ngai hpe shut kau ni ai rai yang mung,
nye a manang wa hpe gumle gumlau galaw kau ni ai rai yang mung,
shing n rai, matu kata nye a gumlau hpyen wa a ntsa e, kashun kashe amu galaw kau ai hte,
ndai lam langai ngai hpe ngai galaw hkrup kau ni ai rai yang mung,
5 nye a gumlau hpyen ni ngai hpe hkan shachyut rim nna, shanhte ngai hpe kahtum kadaw di sat kau nhtawm,
asak n rawng sai ngai hpe ga ntsa e, kau da nga mu ga.
6 Madu e, Pawt sindawng ai hte rawt u!
Nye a gumlau hpyen ni a sindawng kahtet ai hpe rawt ninghkap u;
hprang u, ngai hpe karum la e!
Nang hpyi ai gaw teng man rap ra ai lam rai nga ai.
7 Dai majaw masha yawng mayawng hte hpe, na grup yin e jahpawng da nna;
shanhte hpe sumsing lamu kaw nna up hkang nga u.
8 Nang gaw masha amyu baw yawng hte a tara agyi wa rai nga ndai;
Madu e, ngai hpa mara n kap nga nngai hpe nang chye nga ai rai nna,
nye a maga de tsap nna tara dara ya e.
9 Nang gaw ding hpring ai Karai Kasang rai nga ndai rai nna,
anhte a myit mang ai lam hte ra sharawng ai lam ni hpe jeyang ya nga ndai.
N hkru ai masha ni a tara n lang ai lam hpe jahkring kau nna,
mai kaja ai masha ni hpe shagrau kumhpa jaw ya nga ndai.Ref 7:9: Shr 2:23.
10 Karai Kasang gaw ngai hpe makawp maga ai wa rai nga ai;
shi hpe madat mara ai ni hpe shi hkye hkrang la nga ai.
11 Karai Kasang gaw ding hpring ai tara agyi rai nga ai hte
tara n lang ai ni hpe tut nawng e, daw dan ya nga ai.
12 Shanhte gaw shanhte a lam ni hta n galai shai ai rai yang,
Karai Kasang gaw shi a nhtu hpe garang shadai ya wu ai.
Shi gaw shi a ndan hpe shachyen nna dai hpe gap na matu jin jin rai nga na ra ai;
13 shi gaw shi a si shangun lu ai laknak ni hpe hta lang nna,
ju jahkyeng da ai shi a pala ni hte shading da nga ai.
14 Tara n lang ai ni gaw n hkru ai lam hpe kaning rai myit shapraw nga ma ai hpe yu yu mu.
Shanhte gaw makyin madut ru tsang lam hpe maw mawn nna, hkalem hkalau lam hpe hkan galaw nga ma ai.
15 Rai ti mung, shanhte gaw kaga ni a matu, mahkam hkam da ai hta;
shanhte hkum nan ahkang la nga ma ai.
16 Shing rai shanhte gaw shanhte galaw ai n hkru ai amu hta ari hkrum sha nna,
shanhte a kashun kashe re ai amu hta machyi hkrum nga ma ai.
17 Shi a teng man rap ra ai tara a majaw, Madu hpe ngai chyeju dum nga nngai;
Ngai gaw Tsaw Htum ai dai Madu hpe mahkawn shakawn na nngai.