SHAKAWN KUNGDAWN 44
1 O Karai Kasang e, anhte a na ni hte dai lam hpe anhte na yu saga ai.
Anhte a kaji kawa ni mung, lai mat wa sai nhtoi ni ngu ai, shanhte a aten hta,
nang galaw shapraw dan sai galu kaba ai amu ni ngu ai;
2 maigan masha ni hpe nang kaning rai shaden kau sai lam,
shanhte a mungdan hta na a amyu masha ni hpe shanu nga na matu
shara jahkrat ya sai lam, kaga amyu baw ni hpe nang ari jaw kau nna
na a amyu masha ni hpe ngamu ngamai shangun nit dai.
3 Na a amyu masha ni gaw dai lamu ga hpe shanhte a nhtu ni hte gasat dang la lu
ma ai n rai;
shanhte a n-gun atsam hte dai mung hpe lu la ai n rai.
Dai gaw na a daru magam atsam hte na a chyalai n-gun
shanhte hpe na a tsaw ra myit madun sai ngu ai
nang shanhte hte rau shanu nga ai ga sadi ni a majaw rai nga ai.
4 Nang gaw nye a hkawhkam wa hte nye a Karai Kasang rai nga ndai;
na a amyu masha ni hpe awng padang nang jaw ya nga ai rai nna,
5 \q2 anhte gaw gumlau hpyen ni hpe na a daru magam n-gun hte dang ga ai.
6 Ngai gaw nye a ndan hpe n kam nngai,
nye a nhtu mung ngai hpe hkye la lu ai n rai;
7 rai ti mung, nang gaw anhte hpe gumlau hpyen ni a lata kaw na hkye hkrang la
nit dai;
anhte hpe n ju n dawng ai ni hpe mung dang kau ya nga nit dai.
8 Anhte gaw nang hpe tut nawng e shakawn nga na ga ai,
nang hpe htani htana chyeju dum nga na ga ai.
9 Rai ti mung, ya chyawm gaw nang anhte hpe kau da nit dai hte sum shangun kau nit dai;
nang gaw anhte a hpyen luksuk ni hte rau majan pa de kachyi mi mung n pru
sa nit dai.
10 Nang gaw anhte hpe anhte a gumlau hpyen ni kaw nna jahtaw jahprawng kau shangun
nhtawm,
shanhte gaw anhte a arai ni hpe shanhte a matu, hpya la kau manu ai.
11 Sagu ni hpe zawn anhte hpe sat kau na matu, nang ahkang jaw kau nit dai;
nang gaw anhte hpe maigan mungdan ni de shabra kau nit dai.
12 Na a amyu masha ni gaw manu kachyi mi sha dan nga ai ni hpe zawn
nang shanhte hpe manu kachyi mi hte sha dut kau nga nit dai.
13 Anhte a htingbu ni gaw nang anhte hpe kaning di kau sai lam hpe mu nga ma
ai rai nna,
shanhte gaw anhte hpe ashu ai hte mani asawng nga ma ai.
14 Amyu baw ni a ka-ang e, nang anhte hpe mani chyai hpa galaw kau nit dai rai nna;
shanhte gaw shanhte a baw kanga let, anhte hpe jahpoi asawng nga ma ai.
15 Ngai gaw tut nawng e, myi man sum nga nngai;
16 nye a gumlau hpyen ni hte ngai hpe n ju n dawng ai ni a asawng asang ai hte
n kaw n law re ai ni a nsen ni hpe na lu ai majaw;
ngai gaw kaya kahpa hte htinggrum da hkrum nga nngai.
17 Anhte gaw nang hpe n malap kau nga ga ai hte
anhte hpe nang tawn da ya sai ga shaka hpe mung n jahten sharun kau ga ai;
rai ti mung, dai lam ni yawng gaw anhte hta byin nga sai.
18 Anhte gaw nang hta sadi n dung nga saga ai n rai;
na a hkang da ai ga ni hpe mung, anhte n hkan ai sha, lale kau ga ai n rai;
19 Rai ti mung, zai ai dusat ni a ka-ang hta, nang anhte hpe matsan mayan tawn kau da nna;
htat htum ai si ai shingnip hta nang anhte hpe kabai kau da nit dai.
20 Anhte a Karai Kasang hpe nawku daw jau nga ai hpe anhte jahkring kau nna;
tsasam karai hpe akyu hpyi nga ga ai rai yang,
21 anhte a kraw kata e makoi da ai myit sawn lam ni hpe nang chye ya nga ndai
majaw;
nang dai lam hpe teng teng mu chye kau na ndai.
22 Rai ti mung, na a majaw anhte aten shagu sat kau ai hkrum nga ga ai;
sat na san da hkrum ai sagu ni zawn, anhte nawn da ai hkrum nga ga ai.
Ref 44:22: Rom 8:36.
23 Madu e, rawt u! Nang hpa rai yup pyaw nga n ta?
Na a myit hpe shajin u! Anhte hpe htani htana hkum kau da nga et!
24 Nang gaw hpa rai anhte kaw na makoi nga n ta?
Anhte a nni nkri hte ru tsang lam hpe hkum malap kau ya mi.
25 Anhte gaw ga du hkra kadawng agrawp nga ga ai;
anhte sum mat ga ai majaw, ga nhpu ntsa e, galeng taw nga ga ai.
26 Anhte hpe karum la na sa rit!
Na a dinggrin tsaw ra myit a majaw, anhte hpe hkye hkrang la mi law!