SHAKAWN KUNGDAWN 28
1 Nye a dahpran shara rai nga ai Madu e, ngai nang hpe shaga nngai.
Nye a hpyi jahtau ai nsen hpe madat ya e!
Ngai shaga ai nsen hpe nang n htan ya ai rai yang,
katsan ga e shang sa wa ai ni hta ngai lawm mat wa na nngai.
2 Karum la na matu ngai nang hpe hpyi jahtau ai hte na a chyoi pra ai Htingnu maga de
nye a lata ni hpe sharawt tawn ai shaloi, ngai hpyi ai nsen hpe na ya e.
3 Tara n lang ai ni hte mung,
n hkru ai amu galaw ai ni hte mung,
masha a n-gup aga ni gaw jinghku zawn hku hkau nga ti mung,
shanhte a myit masin ni hta n ju n dawng ai myit rawng nga sai ni hte rau ngai hpe hkum daw dan et.
4 Shanhte hpa galaw sai lam hte shanhte shut hpyit kau sai
n hkru n shawp ai amu a matu, shanhte hpe ari jaw u;
shanhte a sat lawat yawng a matu shanhte hpe ari jaw u;
shanhte hpe ang ai hte maren tai ya u! Ref 28:4: Shr 22:12.
5 Dai Madu gaw kaning re ai amu galaw sai shing n rai,
shi hpa galaw tawn sai lam ni hpe, shanhte hpa zawn n nawn ya nga ma ai;
dai majaw, shi shanhte hpe ari jaw na ra ai,
shanhte hpe htani htana shamyit kau na ra ai.
6 Dai Madu hpe shakawn kungdawn nga mu;
shi gaw karum la na matu nye a hpyi jahtau ai nsen hpe na ya ni ai.
7 Dai Madu gaw ngai hpe makawp maga ai hte ninggang tai ya nga ai;
ngai shi hpe kam hpa nga nngai.
Shi gaw ngai hpe karum la ai lam jaw ya ai hte ngai hpe kabu gara shangun nga ai;
Ngai shi hpe kabu gara ai mahkawn ga ni hte shakawn nga nngai.
8 Dai Madu gaw shi a amyu masha ni hpe makawp maga nga ai;
lata la hkrum ai shi a hkawhkam wa hpe makawp maga ai hte hkye hkrang la nga ai.
9 Madu e, na a amyu masha ni hpe hkye hkrang la u,
na a amyu masha ni hpe shaman ya u.
Shanhte hpe yu ai sagu rem wa tai nga nna,
shanhte hpe htani htana lanu lahku nga u law.