SHAKAWN KUNGDAWN 115
1 O Madu e, na a dinggrin tsaw ra myit hte sadi sahka lam a majaw,
na a hpung shingkang gaw nang hta chyu sha, rai sa,
nang hta chyu sha, anga nga u ga,
anhte hta dai hpung shingkang nga ai n rai.
2 ?Nanhte a Karai Kasang kanang nga nga a ta?,?
nga nna amyu baw ni anhte hpe hpa majaw san nga ma ni?
3 Anhte a Karai Kasang gaw sumsing lamu hta nga nga ai;
shi ra ai hku hpa lam hpe mung shi galaw nga ai.
4 Shanhte a hpara ni hpe aja gumhpraw hte galaw da nna;
dai ni hpe masha a lata hte tawk galaw da nga ai.
5 Shanhte hta n-gup tu nga ma ti mung, ga n lu shaga nga ai;
myi tu ti mung, n mu lu nga ma ai.
6 Shanhte hta na tu nga ma ti mung, n na lu nga ma ai;
ladi tu ti mung, n lu manam nga ma ai.
7 Shanhte hta lata tu ti mung, n jum lu nga ma ai,
lagaw tu nga ma ti mung, n lu hkawm nga ma ai;
shanhte gaw nsen hpe mung n shapraw lu ma ai.
8 Dai hpara sumla ni hpe tawk galaw ai ni hte, shanhte hpe kam sham nga ai ni gaw
shanhte galaw ai hpara sumla ni zawn sha, rai nga mu ga.Ref 115:8: Shk 135:15-18; Shr 9:20.
9 Israela amyu masha ni e, dai Madu hpe kam hpa nga mu.
Shi nanhte hpe karum ya nna, makawp maga nga ai.
10 Karai Kasang a hkinjawng ni e, dai Madu hpe kam hpa nga mu.
Nanhte hpe karum let makawp maga nga ai.
11 Dai Madu hpe nawku daw jau nga ai ni yawng hte e, dai Madu hpe kam hpa nga mu.
Shi nanhte hpe karum ya nna, makawp maga nga ai.
12 Dai Madu anhte hpe adum nga ai hte shaman ya na ra ai;
Shi gaw Israela amyu masha ni hte
Karai Kasang a hkinjawng ni yawng hte hpe shaman ya na ra ai.
13 Shi hpe shagrau sha-a ai masha shagu hta na,
kaji ai kaba ai n nga, yawng hpe shaman ya na ra ai. Ref 115:13: Shr 11:18; 19:5.
14 Dai Madu gaw nanhte hte nanhte a aru arat ni hpe
kashu kasha ni jaw ya nga u ga!
15 Sumsing lamu hte ginding aga hpe hpan tawn da ai,
Madu gaw nanhte hpe shaman ya nga u ga!
16 Sumsing lamu hpe dai Madu chyu sha madu nga ai;
ginding aga hpe chyawm gaw shinggyim masha ni hpe ap ya nu ai.
17 Si mat sai ni hte, katsi katsang re ai shara de,
du shang mat wa ai ni gaw dai Madu hpe shakawn lu ma ai n rai.
18 Rai ti mung, asak hkrung nga ai anhte ni chyawm gaw ya kaw nna,
htani htana prat dingsa du hkra, shi hpe chyeju dum shakawn kungdawn nga na ga ai.
Dai Madu hpe shakawn mu!