SHAKAWN KUNGDAWN 105
(Hkawhkam Labau Laika langai 16:8-22)
1 Dai Madu a chyeju hpe shakawn nga mu,
shi a galu kaba ai lam hpe htawn tsun nga mu;
shi galaw dan sai magam bungli ni, amyu baw ni hpe tsun dan mu.
2 Dai Madu hpe mahkawn shakawn nga mu;
shi galaw dan sai mauhpa amu nlang hte hpe tsun hkai dan mu.
3 Anhte hpe shi madu da nga ai majaw kabu gara nga mu;
shi hpe nawku daw jau ai ni myit dik myit pyaw lu mu ga.
4 Karum hpyi na matu, dai Madu hpang de sit shang wa mu,
shi hpe n sim n sa nawku daw jau nga mu.
5-6 Shi a shangun ma Abraham a aru arat ni hte
shi lata la sai Yaku a aru arat ni e,
Karai Kasang galaw dan sai lamik kumla ni hte
shi jaw da sai tara dara lam ni hpe adum nga mu.
7 Dai Madu gaw anhte a Karai Kasang rai nga ai,
shi a hkang da ai tara ni mungkan ting a matu rai nga ai.
8 Shi gaw shi a ga shaka hpe htani htana shagrin da na ra ai;
shi a ga sadi ni prat ban hkying mi a matu rai nga ai.
9 Shi gaw Abraham hte tawn da sai myit hkrum ga shaka hte,
Isak hpe jaw da sai shi a ga sadi hpe shagrin da na ra ai.Ref 105:9: Nin 26:3.
10 ?Ngai nang hpe Hkanan mung jaw na nngai,
dai hpe nang madu lu na ra ai,? nga nna
Madu gaw Yaku hte ga shaka tawn da nu ai hte maren,
11 dai gaw prat dingsa htani htana agrin nga na ra ai.Ref 105:13: Nin 28:13.
12 Karai Kasang a amyu masha ni gaw hti hkum hku nna n law nga ma ai;
shanhte gaw Hkanan mungdan hta masha tsasam ni rai ma ai.
13 Shanhte gaw mungdan langai mi kaw nna langai mi de;
hkawhkam mungdan mi kaw nna mungdan mi de, kayin hkawm nga ma ai.
14 Rai ti mung, Karai Kasang gaw shanhte hpe dip gamyet sha lu na ahkang, kadai hpe mung n jaw ya nga ai;
shanhte hpe makawp maga la na matu,
15 Madu gaw, ?Ngai lata san da sai shangun ma ni hpe hkum machyi shangun myit,
nye a myihtoi ni hpe hkum hkra ya mi,? nga nna hkawhkam ni hpe sadi jaw nu ai. Ref 105:15: Nin 20:3-7.
16 Madu gaw shanhte a mungdan e hku wa dat dat ya nna,
shanhte a lusha mahkra hpe dawm la kau ya nu ai.Ref 105:16: Nin 41:53-57.
17 Rai ti mung, shi gaw shanhte a shawng e mayam hku nna,
dut kau hkrum ai Yosep ngu ai masha langai mi shangun dat wu ai.Ref 105:17: Nin 37:28; 45:5.
18 Shi tsun ai myihtoi ga dik wa ai aten du hkra, shi a lagaw gyit hkang da ai hkrum nna;
shi a du hpe mung, hpri sumri hte gyit da ya nga ma ai.
19 Dai Madu a mungga gaw shi a teng man ai lam hpe sakse madun dan nga ai. Ref 105:19: Nin 39:20-40:23.
20 Dai shaloi, Egutu hkawhkam wa shi hpe raw dat nna,
amyu baw ni a du wa gaw shi hpe shalawt dat wu ai.Ref 105:20: Nin 41:14.
21 Hkawhkam wa gaw shi a mung up magam bungli hta woi awn na matu, shi hpe san da mu ai hte,
mungdan ting a ntsa e up hkang na du, shi hpe shatai nu ai rai nna, Ref 105:21: Nin 41:39-41.
22 shi gaw hkawhkam wa a up hkang du ni a ntsa e mung, hkaw kata na hpaji jaw du,
salang ni hpe sharin matsun na ahkang mung shi hkam la nu ai.
23 Dai hpang Yaku gaw Egutu mung de yu wa nna,
dai mungdan hta sa shanu nga ai. Ref 105:23: Nin 46:6; 47:11.
24 Dai Madu gaw shi a amyu masha ni hpe kashu kasha law law mayat maya shangun nna;
shanhte a gumlau hpyen ni hta grau nna, n-gun ja wa shangun nga ai.
25 Shi gaw Egutu masha amyu ni hpe shi a amyu masha ni hte n ju n dawng shangun nna;
shi a shangun ma ni hte hkalem hkalau amu shabyin dat wu ai.Ref 105:25: Pru 1:7-14.
26 Dai hpang, shi lata san da sai shi a shangun ma Mawshe hte
Arun yan hpe shi shangun dat wu ai. Ref 105:26 Pru 3:1-4
27 Shanhte gaw, Karai Kasang a mauhpa magam amu ni hte
lamik kumla amyu myu ni hpe Egutu mung hta e, madun dan manu ai.
28 Karai Kasang gaw dai mungdan a ntsa e, nsin jasin dat nu ai;
rai ti mung, Egutu amyu masha ni shi a hkang da ai ga hpe n madat ya mu ai. Ref 105:28: Pru 10:21-23.
29 Shi shanhte a hka nu ni hpe sai shatai kau ya nna,
dai hta rawng ai nga ni yawng hpe sat kau ya wu ai.Ref 105:29: Pru 7:17-21.
30 Shanhte a mungdan hta shu ni hte hpring nga nna;
hkawhkam wa a gawk de du hkra, shu ni hte hpring kaput nga ai.Ref 105:30: Pru 8:1-6.
31 Karai Kasang hkang dat ai hte maren, jinghkam hte ji nu ni,
mungdan ting hta prang hkawm nga ma ai. Ref 105:31: Pru 8:20-24.
32 Shi gaw shanhte a mungdan hta marang a malai
sin hte myi hprap wan dat dat wu ai.
33 Shi gaw sabyi ru ni hte maihpang hpun ni hpe jahten kau nna;
mungdan ting na hpun ni yawng hpe agrawp shadaw kau nu ai. Ref 105:33: Pru 9:22-25.
34 Shi hkang dat ai hte, sen sen wan wan n dang hti hkra
law ai dinggam-yaw ni du sa wa nga ma ai.
35 Dai ni gaw mungdan na hpun lawn kasha ni yawng hpe sha kau nga ma ai;
nsi naisi yawng hpe mung mayu kau ma ai. Ref 105:35: Pru 10:12-15.
36 Egutu mungdan na dinghku yawng a
shadang sha alat ni hpe shi sat kau ya mu ai.Ref 105:36: Pru 12:29.
37 Dai hpang shi gaw Israela amyu masha ni hpe woi shapraw mat wa nna,
shanhte gaw gumhpraw hte aja ni hpe mung, htaw mat wa ya nga ma ai;
shanhte yawng hte mung hkam kaja ai hte n-gun hpring shajang nga ma ai.
38 Egutu amyu masha ni mung shanhte hpe hkrit nga ma ai;
shanhte pru mat wa ai shaloi, kabu gara nga ma ai.Ref 105:38: Pru 12:33-36.
39 Karai Kasang gaw shi a amyu masha ni a ntsa e, sumwi ka-up da ya nna;
shana e, shanhte hpe wan jahtoi ya nga ai.Ref 105:39: Pru 13:21-22.
40 Shanhte hpyi mu ai hte maren, u preng ni hpe dat dat ya nna;
shanhte myit dik hkra sha lu na matu, lamu na lusha shanhte hpe jahkrat jaw ya wu ai.Ref 105:40: Pru 16:2-15.
41 Shi gaw lunghkrung hpe hpaw dat nna hka ni kapaw pru wa nhtawm;
hkun hkraw ai shara hkan, hka nu langai mi zawn lwi nga ai.Ref 105:41: Pru 17:1-7; Bhk 20:2-13.
42 Shi a shangun ma kaja Abraham hte tawn da ai
chyoi pra ai ga sadi ndat ga ni hpe shi dum nga wu ai.
43 Dai majaw shi lata la hkrum ai shi a amyu masha ni hpe woi shapraw mat wa ai;
shanhte kabu gara jahtau garu ai hte mahkawn shakawn ma ai.
44 Shi shanhte hpe kaga amyu masha ni a lamu ga ni hpe jaw ya nna;
shanhte mung kaga masha ni a sun, hkauna ni hpe madu la nga ma ai.Ref 105:44: Ysh 11:16-23.
45 Shing rai, shi a amyu masha ni shi a tara ni hpe madat nna;
shi a hkang da ai ga ni yawng hpe hkan shatup na mu ai.
Dai Madu hpe shakawn nga mu law!