SHAKAWN KUNGDAWN 104
1 Nye a Wenyi e Madu hpe shakawn u!
O Madu nye a Karai Kasang e, nang gaw kade wa galu kaba nga n hka!
Nang gaw daru magam, hpung shingkang hte bu hpun da nna;
2 na a hkum hpe nhtoi hte hpun lawai da nga ndai.
Nang gaw sumsing lamu ni hpe sum zawn kahpyan da nna;
3 lamu madin hta nga ai hka ni a ntsa e, na a nta hpe gap da nga ndai.
Nang gaw sumwi ni hpe na a gumra leng zawn, nang akyu jashawn nna;
nbung a singkaw ntsa e, nang jawn nga ndai.
4 Nang gaw nbung ni hpe na a kasa ni shatai nna,
myi hprap wan gala ai hpe na a shangun ma ni zawn, nang akyu jashawn nga ndai. Ref 104:4: Heb 1:7.
5 Nang gaw ginding aga hpe de a npawt hta ngang ngang gaw da nna;
dai gaw galoi mung shamu shamawt kau hkrum na n rai.
6 Dai ginding aga ntsa e, nammukdara hpe nba zawn, nang magap da nna;
hka mung bum ni hpe ka-up da nga ai.
7 Nang gaw hka ni hpe daru kau dat ai shaloi, dai ni tse rai yawng mat wa nna;
nang jahtau tsun ai mungga hpe dai ni na ai shaloi, lawan wan lwi agre mat wa nga ma ai.
8 Hka ni gaw bum ni a ntsa kaw nna, kadit hkam wam de,
dai ni a matu nang san da ya sai shara ni de, lwi mat wa nga ma ai.
9 Madu gaw mungkan ga hpe sha-u kalang mi bai n ka-up kau u ga;
hka ni n lu lai di na ga jarit hpe masat da nu ai.
10 Nang gaw hkaraw ni hkan e, hka hpawk ni hpe jahpaw dat ya nna,
bum ni a lapran hku hka nu ni hpe lwi shangun nga ndai.
11 Dai ni gaw nam na ashu ashan ni a matu hka jaw ya nna,
dai shara ni hkan lawze shazai ni shanhte a hpang gara ai hpe shamai la lu nga ma ai.
12 Ntsa malen u ni mung dai ni a makau mayang hkan tu nga ai hpun ni hta;
atsip tsip let, mahkawn gashai nga ma ai.
13 Sumsing lamu kaw nna bum ni a ntsa e, nang marang jahtu dat ndai majaw,
lamu ga ni na a chyeju ni hte hpring nga ai.
14 Yam nga ni a matu tsingdu hpe nang shatut ya ndai hte,
shinggyim masha ni lang na matu, hkai nmai ni hpe mung shatut ya nga ndai.
Shing rai, shi gaw shi a nsi naisi ni hpe tu kaba shangun lu nga ai hte,
15 shi hkum nan myit ngwi myit pyaw na matu sabyi ntsin hpe mung;
kabu sumsai lu na matu, tsanlun sau hpe mung, n-gun hpring wa na matu,
shadung muk hpe mung, shi galaw shapraw nga ai.
16 Madu hkai da ai shi a hpun ni ngu ai Lebanon a arit hpun ni mung:
lamu marang hpe law hkra hkam la lu nga ma ai.
17 Dai shara hta e, ntsa malen u ni shanhte a atsip tsip nna,
u kawp ni mung marau hpun ntsa hkan e, atsip galaw da nga ma ai.
18 Ya ni gaw tsaw ai bum ntsa hkan e, nga nga ma ai;
du dumsi dusat ni nlung bum n-gam hkan e, makoi rawng nga ma ai.
19 Nang gaw hti hkum shata ladaw da na matu, shata hpe hpan da nna;
jan mung, shi a shang na aten hpe chye nga ai.
20 Shana hpe nang hpan da nna nsin e,
nam na matse labye ni yawng pru hkawm nga ma ai.
21 Hkanghkyi hkalung ni shan hpe gyam ai shaloi, shabam nga ma ai;
shanhte gaw Karai Kasang jaw ya ai lusha ni hpe hkan tam nga ma ai.
22 Jan pru wa yang, shanhte a lungpu kata de
nhtang shang mat wa nna, hpum nga ma ai.
23 Dai shaloi, shinggyim masha ni shanhte a magam amu galaw na matu,
pru sa wa nna, shana de du hkra, amu galaw nga ma ai.
24 Madu e, nang gaw amyu baw sumhpa hpe galaw da nit dai!
Nang gaw yawng mayawng hte hpe hpaji rawng ai hku galaw da ni hka!
Mungkan ga gaw nang hpan da ai hkrung mahkrung ni hte hpring nga ai.
25 N dang hti hkra law la ai hkrung mahkrung kaji kaba ni shanu nga ai,
Nammukdara gaw dam lada nna kaba nga ai.
26 Dai nammukdara hka ntsa hta e, sanghpaw li ni hkawm nga ma ai;
dai shara ni hta nang hpan da ai baren numraw Lewihtan mung pyau chyai nga ai.Ref 104:26: Yob 41:1; Shk 74:14; Esa 27:1.
27 Dai ni yawng gaw ra ai aten hta lusha shahpa jaw ya na matu;
nang Madu hpe shamyet shanat nga ma ai.
28 Nang dai ni hpe lusha jaw nna, shanhte dai hpe sha ma ai;
nang lusha shahpa jaw nna shanhte myit dik nga ma ai.
29 Nang myi man kayin mat wa ai shaloi, dai ni hkrit nga ma ai;
dai ni a nsoi nsa ni hpe, nang dawm la kau ya ai shaloi,
shanhte si wa nna, shanhte pru wa ai ga nhpu kaw nna dai ga nhpu de bai nhtang mat wa ma ai.
30 Rai ti mung, nang shanhte hpe nsoi nsa gawut bang dat ai hte shanhte hpe hpan da nga ndai;
shing rai, nang gaw mungkan ga hpe asak ningnan jaw ya nga ndai.
31 Madu a hpung shingkang htani htana agrin nga u ga!
Madu gaw shi galaw da sai magam bungli ni hta kabu gara nga u ga!
32 Lamu ga hpe shi mada yu ai hte dai ni gari wa nga ai;
bum ni hpe shi ahtawk dat wu ai shaloi, dai kaw na wan hkut ni pru wa nga ai.
33 Ngai hkrung nga ai hte yang, Madu hpe ngai mahkawn mangoi nga na nngai;
ngai ahkrung nga dingsa, nye a Karai Kasang hpe ngai mahkawn shakawn nga na nngai.
34 Nye a kabu gara ai lam gaw shi kaw na rai nga ai majaw,
nye a mahkawn shakawn ai ga hpe Madu ra sharawng nga u ga law.
35 Yubak kap ai ni dinghta ga kaw nna shamyit kau ai hkrum nga mu ga;
tara n lang ai ni hkoi mat mu ga.
Nye a wenyi e, dai Madu hpe shakawn u!
Dai Madu hpe shakawn nga u law!