13
(Mrk 4:1-9; Luk 8:4-8)
1 Dai shani jang, Yesu gaw dai nta na pru nhtawm, sharin shaga na matu nawng makau e sa dung nga ai.
2 Shi hpang de zuphpawng sa wa ai shawa masha wunawng wuwa nau law wa ai majaw, li langai mi
hta shi shang dung nga ai rai nna, shawa masha
ni mahkra gaw hkin-gau hta e tsap nga ma ai.
Ref 13:2: Luk 5:3; 8:4.
3 Shaloi, lam law law hpe ga shadawn ni hte shi shanhte hpe tsun mu ai gaw,
?Kalang mi na masha langai mi gaw, nli gat na matu pru sa wa ai.
4 Nli hpe shi gat dat wu yang, nkau mi gaw lam makau e hkrat nna, u ni dai hpe hta sha kau mu ai.
5 Nkau mi gaw ga n law ai lungrawk hta e hkrat wa ai: ga n htat ai majaw ya jang
tu pru wa ti mung,
6 jan pru nna katen jang krau mat wa ai rai nna, ru n jung lu ai majaw hkraw mat wa ai.
7 Nli tum nkau mi gaw, ju hpun nhpang e hkrat nna, ju hpun ni tu kaba wa ai hte, dai hpe
lim kau mu ai.
8 Rai ti mung nkau mi gaw ga kaja hta hkrat wa nna, asi si wa ai; nkau mi dang latsa, nkau
mi kru shi, nkau mi sumshi mayat wa ai.?
9 ?Na tu ai wa gaw na la u ga!,? nga nna ga hpungdim wu ai.
(Mrk 4:10-12; Luk 8:9-10)
10 Shaloi sape ni shi kaw sit sa wa nna, ?Madu e, nang masha ni hpe ga shaga ai
shaloi, hpa majaw ga shadawn ni lang nna
tsun shaga n ta?,? ngu nna shi hpe san mu ai.
11 Yesu gaw, ?Sumsing Lamu a Mungdan a makoi magap da ai sung htum ai lam ni hpe chye lu
na ahkang nanhte hpe jaw da sai; rai ti mung
kaga ni gaw dai ahkang n lu ma ai.
12 Hpa majaw nga yang, lu ai wa kadai hpe mung naw jat jaw na rai nna, shi hta law htam wa na rai nga ai; rai ti mung n lu ai wa kaw na chyawm gaw shi lu ai kachyi mi hpe pyi naw la kau ya na ra ai. Ref 13:12: Mat 25:29; Mrk 4:25; Luk 8:18.
13 Shanhte hpe ga shadawn hku ngai hpa majaw tsun ra a ta? nga yang, shanhte yu ti mung n mu ma ai; madat ti mung n na ma ai; shing n rai n chye
na ma ai.
14 Shing rai myihtoi Esaia shanhte hpe sha-ang lakap nna tsun ai myihtoi ga gaw:
?Ndai masha ni na lana n chye na na mu ai;
yu layu e n mu na mu ai. Ref 13:14: Esa 6:9; Mrk 4:12; Yhn 12:40; Kas 28:26-27.
15 Hpa majaw nga yang, shanhte a myit masin ni ayup akup rai nga nna,
shanhte a na ni hpe pat kau nhtawm,
myi ni hpe myi di tawn ma ai.
Dai n rai taw gaw, shanhte a myi ni mu lu nna,
shanhte a na ni na lu na hte,
shanhte a myit masin ni mung chye na wa ai rai yang gaw,
shanhte ngai hta kam hpa nna, shingbyi wa na mara ai.
Ngai mung shanhte hpe shamai ya na mawe ai,? nga nna Karai Kasang tsun ai hpe Esaia
htawn tsun ai ga dik wa sai,? ngu mu
ai.
16 ?Nanhte a myi mu lu nna, nanhte a na na lu nga malit dai majaw a lu myit dai.
Ref 13:16: Mat 13:16-17; Luk 10:23-24.
17 Nanhte hpe ngai teng teng tsun made ga, nanhte mu lu ai arai ni hpe myihtoi ni
law law hte ding hpring ai masha ni law
law wa grai mu mayu ma ti mung, n mu ma
ai; nanhte na lu ai lam ni hpe mung, na
mayu ti mung n na lu ma ai.
(Mrk 4:13-20; Luk 8:11-15)
18 ?Dai rai nna, nli gat ai ga shadawn a lachyum hpe madat la mu.
19 Dai mungdan a lam na la ai ni kadai rai ti mung, dai hpe n chye na ai ni gaw, lam makau e hkrat
ai nli tum hte bung ma ai. N hkru ai wa sa du
nna shanhte hta gat bang tawn ai nli tum hpe
shaw la kau ya wu ai rai nga ai.
20 Lungrawk hta gat ai nli tum gaw, dai mungga hpe na nna, shaloi jang kabu gara ai myit hte
hta la wu ai.
21 Rai ti mung kraw hta e ru sung sung n jung ai majaw, shanhte na na n grin ma ai. Shing rai
dai mungga a majaw ru tsang ai hte zingri
zingrat hkrum jang kalang ta htak mat ai ni
hte bung nga ai.
22 Ju hpun hta hkrat ai nli tum ni gaw, dai ga hpe na la ti mung, ndai prat na myit tsang ai
hte sut gan marin myit gaw, dai mungga hpe lim
kau nna asi n si lu ai hte bung nga ma
ai.
23 Ga kaja hta gat ai nli tum ni chyawm gaw, dai mungga hpe na la nna, chye na hkap la ai ni
hpe ngu ai rai nga ai. Shanhte gaw kaja wa
teng teng asi si nna, nkau mi dang latsa, nkau
mi kru shi, nkau mi sumshi jat wa ai hpe ngu ai
rai nga ai,? ngu mu ai.
24 Ga shadawn kaga mung, shi shanhte hpe tsun mu ai gaw; ?Sumsing Lamu a Mungdan
gaw hkauna hta nli kaja gat ai wa hte bung
nga ai.
25 Lana mi hta, masha ni yup nga yang, gumlau wa gaw sa nna, dai mam hta e tsing gat bang
da nhtawm pru mat wa ai.
26 Ya dai mam tu wa nna asi si jang, tsing mung dan pru wa ai.
27 Shaloi nta madu wa a mayam ni sa du nna, ?Madu e, na a hkauna hta nli kaja nang
gat nit dai n rai ni? Dai rai yang, tsing
ni kanang na du sa wa ma ta?,? ngu mu ai.
28 Shi gaw, ?Gumlau wa dai hpe galaw nu ai,? ngu nna shanhte hpe tsun mu ai. Dai rai
nna shanhte gaw, ?Anhte sa nna dai hpe
magang kau na nang hkraw nga n ni?,? shi
hpe ngu mu ai.
29 Shi mahtang, ?N rai,? nanhte tsing baw kau myit yang gaw, mam nkau mi hpe tsing hte
rau baw shalawm kau na myit dai.
30 Dai majaw, dai lahkawng yan nmut ta du hkra, rau tu kaba wa mu ga; nmut ta du jang, tsing
hpe shawng dan mahkawng nna, nhtan nhtawm wan
hta nat kau mu; dai mam hpe chyawm gaw, nye a
dum hta e mahkawng da mu, ngu nna mam dan ai
ni hpe ngai tsun na mawe ai,?? ngu mu ai.
(Mrk 4:30-32; Luk 13:18-19)
31 Ga shadawn kaga mung Yesu shanhte hpe kahtap tsun mu ai gaw, ?Sumsing Lamu a
Mungdan gaw, masha langai mi e la nna shi
a yi hta hkai ai chyinghkrang tum hte bung
nga ai.
32 Dai gaw tum baw shagu hta kaji htum rai nga ti mung, kaba wa jang kaga hpun bawng ni hta
grau kaba wa lu ai rai nna, hpun tai wa ai
hte ntsa malen u ni mung, de a lakung lakying
ni hta utsip tsip lu ma ai,? ngu mu ai.
(Luk 13:20-21)
33 Ga shadawn kaga mung shi shanhte hpe naw tsun mu ai gaw, ?Sumsing Lamu a Mungdan
gaw numsha langai mi matsi loi mi
la nna muk shadung dang mi hta bang dat wu
yang, mahkra hte hpe shawawm dat lu ai hte
bung nga ai,? ngu mu ai.
(Mrk 4:33-34)
34 Yesu gaw shawa masha ni hpe ndai lam mahkra ga shadawn hku tsun dan mu ai. Ga shadawn
hte n rai yang shi shanhte hpe hpa mung
n tsun dan ga ai.
35 Ndai hkaw tsun ai lam gaw,
?Nye a n-gup ga shadawn hte ngai hpaw nna,
Ginding aga nnan lat kaw nna makoi da ai ga hpe ngai htai dan na nngai,? nga nna Esaia tsun ai myihtoi ga dik wa na matu rai nga ai. Ref 13:35: Esa 6:9-10; Shk 78:2.
36 Dai hpang Yesu gaw shawa masha ni kaw na pru mat wa nna nta hta e shang mat wa ai. Shaloi shi a sape ni shi kaw sit sa wa nna, ?Hkauna
hta e tu ai tsing ga shadawn a lam, anhte hpe
htai dan mi,? ngu mu ai.
37 Yesu gaw, ?Nli kaja gat ai wa gaw, dai Masha Kasha rai nga ai.
38 Hkauna gaw mungkan ga rai nga ai. Kaja ai nli gaw Karai Kasang a Mungdan a kashu kasha
ni rai nga ma ai; Tsing gaw dai n hkru ai wa
a kashu kasha ni rai nga ma ai.
39 Dai hpe gat ai gumlau wa gaw, nat rai nga ai; nmut ta gaw lamu ga htum na aten rai nga ai,
mam dan ai ni gaw, lamu kasa ni rai nga ma ai.
40 Dai tsing ni hpe lahkawn shinggyin la nna wan hta nat kau ai zawn, lamu ga aprat htum ai
shani hta e byin na ra ai.
41 Dai Masha Kasha gaw, shi a lamu kasa ni hpe shangun dat na rai nna shanhte gaw
shi a mungdan kata na, masha ni hpe myit
kataw shangun ai ni yawng hte, n hkru n
shawp ai amu galaw ai ni yawng hte hpe
lata shaw la nhtawm,
42 wan htung hta kabai bang da na maru ai rai nna, dai yang e hkrap ngu hkrap ngoi ai hte
wa udik rai na mara ai.
43 Dai shaloi, ding hpring ai ni gaw shanhte a Kawa a Mungdan hta e ajan zawn htoi kabrim
na mara ai; na tu ai wa gaw na la u ga.
Ref 13:43: Dan 12:3; 1Ko 15:42,53.
44 ?Sumsing Lamu a Mungdan gaw, ga dachyawk hta e makoi da nna masha langai mi e mu hkrup ai hte bai makoi da ai sutgan hte bung nga ai.
Kabu gara ai myit hte shi wa nhtawm, shi lu
malu hte hpe dut kau nna, ga dachyawk dai
hpe mari la wu ai.
45 ?Bai, Sumsing Lamu a Mungdan gaw, hpaga la langai mi kaja reng ai hkachyi ni hpe hkan
tam nna,
46 laklai nna kaja reng dik ai hkachyi langai mi hpe mu hkrup jang, shi nhtang wa nhtawm,
shi a lu malu hpe dut kau nna dai hkachyi
hpe mari la kau ai hte bung nga ai.
47 ?Bai, Sumsing Lamu a Mungdan gaw, nga hkan ai ni nawng hta e kabai bang nna, nga amyu myu hpe magawn la ai sumgawn hte bung nga ai.
48 Dai sumgawn hta nga hpring chyat hkra lu jang, garawt la mu ai rai nna, dung nga let,
kaja ai baw hpe shanhte a mung hta bang da
nna n kaja ai baw hpe kabai kau mu ai.
49 Dai hte maren lamu ga aprat htum ai ten hta mung byin na ra ai. Lamu Kasa ni pru
sa nna, ding hpring ai ni a kata na, n hkru
ai ni hpe karan da na mu ai rai nna,
50 shanhte hpe wan htung hta kabai bang kau na maru ai; dai yang e shanhte hkrap ngu
hkrap ngoi hte wa udik rai na mara ai.
51 ?Ndai lam mahkra hte hpe, nanhte chye da mu ni?,? ngu nna Yesu shanhte hpe san mu
yang,
shanhte gaw, ?Chye nga ga ai,? ngu mu ai.
52 Bai shi gaw, ?Dai rai nna sumsing lamu a Mungdan hta e sape langai mi tai wa sai tara
sara shagu gaw, tinang a sut dek hta na nnan
baw mung, dingsa baw mung shapraw ai nta madu
wa hte bung nga ai,? ngu nna shanhte hpe
htan mu ai.
(Mrk 6:1-6; Luk 4:16-30)
53 Ya Yesu gaw dai ga shadawn ni hpe tsun ngut jang, dai shara kaw na shi pru mat
wa ai rai nna,
54 shi a buga mare de du wa ai. Tara jawng ni hta shi hkaw tsun sharin shaga mu yang,
na la ai ni yawng mau mat ai hte, ?Ndai
wa gaw ning re ai hpaji byeng-ya hte
lamik kumla daru magam atsam kanang na lu wu
hka!
55 Shi gaw laksama wa a kasha re ai, n rai ni? Shi a kanu Mari mying ai hte, shi a
kanau ni, Yaku, Yosep, Simun hte Yuda rai
nga ma ai n rai ni?
56 Shi a kajan ni yawng mung, anhte hte rau nga nga ma ai, n rai ni? Shing re ai wa
she re ai mi, ndai wa gaw ndai nlang hte
hpe kanang na lu la wu hka?,? nga nna,
57 shi a lam myit kataw wa ma ai hte shi hpe n hkap la ma ai.
Yesu mahtang, myihtoi gaw tinang a buga hta n rai yang she arawng lu nga ai,
ngu nna shanhte hpe tsun mu ai.
Ref 13:57: Mat 11:6; Mrk 6:3-4.
58 Shanhte kam sham ai myit n rawng nga ma ai majaw, dai shara e lamik kumla law law wa shi n galaw nu ai.