6
1 Israela hte dangrang hkat ai dai Madu a amu hpe madat mu.
O Madu e, rawt u, na a amu jashawn u; bum ni hte kawng ni nang hpa tsun ai lam na la mu ga.
2 Bum ni hte dinggrin anga nga ai mungkan ga na npawt nhpang ni e, dai Madu a amu madat mu! Dai Madu gaw shi a amyu masha ni hte dangrang na amu langai lu nga ai. Shi gaw Israela hpe mara shagun na ra ai.
3 Dai Madu gaw, ?Nye a amyu masha ni e, Ngai nang hpe hpa amu galaw yu sata? Ngai nang hpe kade wa jahki shaba yu a ni? Ngai hpe htan e.
4 Ngai gaw nang hpe Egutu mung kaw na woi shapraw wa nhtawm nang hpe mayam prat kaw na mawai la ni ai. Mawshe, Arun hte Miriam ni nang hpe woi awn na matu ngai dat dat ni ai. Ref 6:4: Pru 12:50-51; Pru 4:10-16; Pru 15:20.
5 Nye a amyu masha ni e, Moba Hkawhkam Balak gara hku hpaji daw ai lam hte Beora a kasha Balam shi hpe gara hku htan ai ga dum nga u. Akasia dabang kaw nna Gilgala dabang lapran na hkrun lam hta byin lai wa sai lam ni hpe dum u. Nang gaw ndai lam ni hpe dum nna nang hpe hkye hkrang la na matu ngai galaw lai wa sai amu ni hpe nang bai chye wa lu na ndai,? nga nna tsun ai.
6 Ngai gaw shi hpe nawku na matu sit sa wa ai shaloi, sumsing lamu a Madu Karai Kasang hpang de hpa baw kumhpa la sa na rai ta? Shi hpe wan nat hkungga nawng jau na matu kaja htum ai dumsu kasha ni hpe woi sa wa ra na kun?
7 Sagu la hkying mun hte n htum lu ai tsanlun sau hka shi ni, shi kaw ngai lama la sa wa ai rai yang, dai Madu gaw dai hpe ra sharawng na wu ai kun? Nye a yubak mara a majaw nye a kasha alat hpe gawng malai hkungga tai na ngai shi hpe sak jaw ra na rai nga a ni?
8 N rai law, dai Madu gaw anhte hpe mai kaja ai amu galaw na matu she hkang da sai. Anhte kaw na shi hpyi ai gaw ndai lam rai nga ai: ?Teng man ai amu galaw na lam, dinggrin tsaw ra myit madun dan na lam, anhte a Karai Kasang hte kanawn mazum ai hta myit grit myit nem hte asak hkrung hkawm nga na lam ni hpe sha, shi hpyi nga ai.?
9 Dai Madu hpe hkrit hkungga ai gaw hpaji byeng-ya rai nga ai. Shi gaw dai mare hpe jahtau tsun nna, ?Mare kata hta hpawng nga ai amyu masha ni hte dai hpe san da ai ni e, madat mu!
10 N hkru ai masha ni a dum nta kata na sut gan ni gaw n ding n man ai hku nna lu tawn ai arai ni rai nga ai. Shanhte gaw n teng n man ai dang hte bye ni hpe lang ma ai; dai zawn re ai mawp sha ai arai hpe ngai matsat nngai.
11 N teng n man ai joi jang hte joi si ni hpe lang ai masha ni a mara hpe ngai kaning di dat ya lu na rai ta?
12 Nanhte a sut su ai masha ni gaw matsan mayan masha ni hpe n-gun makru shadaw ya nga ma ai; buga masha yawng hte mung masu magaw masha ni hkrai rai ma ai.
13 Dai rai nna, na a yubak ni a majaw, nang hpe jahten sharun hpang na ngai lajang da ngut chyalu rai ni ai.
14 Nang shat sha lu na rai ndai, rai ti mung myit dik lu na n rai; nang teng teng kawsi kyet na rai ndai. Arung arai ni hpe nang la wa lu ai rai tim, dai hpe nang mahkawng da lu na n rai; Nang mahkawng kyem da ai arai hpa hpe rai tim, majan hta ngai jahten kau ya na we ai.
15 Nang gaw nli tum gat ti mung, dai hpe shu la lu na n rai; nang gaw tsanlun si kaw na sau rin shapraw lu ti mung, dai hpe galoi mung lang lu na n rai. Nang gaw sabyi shup ti mung, dai hpe galoi mung lu lu na ndai n rai.
16 Hkawhkam Omri hte shi a kasha Hkawhkam Ahab ni a n hkru ai amu ni hta nang hkan galaw nga ndai majaw ndai lam byin wa na ra ai. Nang gaw shanhte a myit masa hta matut nna hkan nang nga ai majaw ngai nang hpe jahten kau na nngai; masha hkum shagu nang hpe asawng asang di kau na mara ai. Shara shagu hkan na amyu masha ni gaw nang hpe n kaw n law matsat kau na mara ai,? ngu nna tsun ai.