5
1 Yerusalem masha ni e, na a hpyen n-gun ni hpe mahkawng da u! Anhte gaw wang da ai hkrum nga saga ai! Shanhte gaw Israela a ningbaw wa hpe gasat nga ma ai.
2 Dai Madu gaw, ?Nang Betlehem Ehprat e, nang gaw Yuda mung na mare ni hta kaji htum rai nga ti mung, Israela a matu up hkang du langai nang kaw na pru wa na ra ai; shi a dinghku ru sai mung moi chyaloi nhkoi kaw nna nga nga ai wa rai nga ai,? ngu nna tsun ai. Ref 5:2: Mat 2:6; Yhn 7:42.
3 Dai rai nna, shinggyim machyi ai num gaw shi a kasha shangai ai aten du hkra dai Madu gaw shi a amyu masha ni hpe shanhte a gumlau hpyen ni a lata de ap kau na ra ai. Dai hpang, bawng dung nga ai shi a mungdan masha hpu nau ni hte shanhte a amyu masha ni bai galung shinggyin wa na mara ai.
4 Shi du sa ai shaloi, shi gaw dai Madu kaw nna n-gun atsam hte Madu Karai Kasang shi hkum nan a daru magam hpung shingkang hte shi a amyu masha ni hpe up hkang wa na ra ai. Shi a amyu masha ni mung shim lum ai hte nga lu na mara ai; hpa majaw nga yang, aga ting na masha ni yawng shi a galu kaba ai magam amu hpe yin la na mara ai,
5 shi gaw ngwi pyaw sim sa ai hpe la sa wa na ra ai.
Asuri masha ni anhte a mung de shang gasat nna anhte a makawp maga dap ni hpe jahten kau ma ai shaloi, anhte mung shanhte hpe gasat na matu n-gun atsam rawng htum ai ningbaw ni hpe dat dat na ga ai.
6 Shanhte gaw luksuk n-gun hte Nimrod a lamu ga Asuri hpe gasat dang la na mara ai; shanhte gaw anhte a lamu ga de shang gasat ai shaloi, shi gaw anhte hpe Asuri ni a lata kaw na makawp maga la na ra ai. Ref 5:6: Nin 10:8-11.
7 Naw hkrung nga ai Israela amyu masha ni gaw masha amyu baw law law a matu dai Madu kaw na hkrat ai n-gun awai la shangun ai numri hte tu kaba wa ai hkai bawng ntsa e htu ai marang zawn tai na mara ai. Shanhte gaw masha hpe n rai, Karai Kasang hpe kam hpa wa na mara ai.
8 Naw ngam nga ai ni gaw masha amyu baw ni a ka-ang e nam mali shing n rai udat shara hkan lu sha tam gyam sha nga ai hkanghkyi zawn tai na ra ai. Shi gaw sagu ni a lapran de shang nna adaw achyen di gang amya je kau na ra ai; dai shara hta mawai la na matu myit mada shara nga na n rai.
9 Israela gaw shi a gumlau hpyen ni hpe awng dang kau na ra ai, shanhte yawng hpe jahten shaza kau na ra ai.
10 Dai Madu gaw, ?Dai aten hta, ngai gaw na a gumra ni hpe la kau ya nna, na a hpyen leng ni hpe jahten agrawp kau na we ai.
11 Ngai gaw na a mung na mare ni hpe jahten kau nna na a hpyen dap ni yawng hpe hpya ashin kau na nngai.
12 Nang akyu jashawn lang ai mandan lakle hpaji ni hpe ngai jahten kau nna, gumhpan chye hpan ai masha kadai mung nang kaw ngam da ya na we ai n rai.
13 Ngai gaw nang tawk da ai hpara sumla ni hte chyoi pra ai nlung shadaw ni hpe jahten kau ya na nngai; htawm hpang de na a lata hte galaw ai arai ni hpe nang galoi mmung nawku lu na ra ai n rai.
14 Ngai gaw na a mung na Asherim nat shayi hpara sumla ni hpe baw kau nna na a mare ni hpe jahten sharun kau na we ai.
15 Nye a ja la ai masin kahtet ai a majaw, nye a ga n madat n mara nga sai masha amyu baw ni yawng a ntsa e ngai matai htang na we ai,? ngu nna tsun ai.