8
(Pru 29:1-37)
1 Dai Madu gaw Mawshe hpe, ?Nye a hpung shingkang shanu nga ai Sum a
2 shang wa chyinghka lam de Arun hte shi a shadang sha ni hpe woi shang wa nna, hkinjawng hpun palawng, chya na namman, htingrai hkungga a matu usu, sagu la lahkawng, hte matsi n rawng ai muk ka la sa na rai ndai.
3 Dai yang e shawa masha ni hpe shaga jahpawng da na rai ndai,? ngu nna tsun wu ai.
4 Dai Madu hkang da ai hte maren Mawshe galaw wu ai rai nna,
5 shawa hpung masha ni hpawng nga ma yang, shi shanhte hpe, ?Ya ngai galaw na lam gaw dai Madu hkang da ai lam rai nga ai,? ngu nna tsun wu ai.
6 Mawshe gaw Arun hte shi a shadang sha ni hpe shawng de woi sa wa nhtawm hka shin na matu tsun wu ai.
7 Shi gaw Arun hpe palawng hte palawng galu jahpun ya nna nshang e shingkyit kyit ya wu ai. Hpahkai lawng hpe mung shi hpun ya nhtawm mani tsawm ai hte da da ai shingkyit hte shi a nshang hta kyit ya wu ai.
8 Shi gaw sinda magap hpe mung dagap ya nna dai hta Urim hte Htumim bang ya wu ai.
9 Shi gaw shi a baw hta bunghkaw hkaw ya nna de a man e dai Madu shi hpe hkang da ai hte maren ap nawng ai chyoi pra masat kumla rai nga ai ja htanbam bam ya wu ai.
10 Dai hpang Mawshe gaw chya na namman sau la nna dai Madu a hpung shingkang shanu nga ai Sum hte dai hta rawng ai arai yawng hpe chya wu ai; ndai hku nna dai arai yawng mayawng dai Madu a matu ap nawng da wu ai.
11 Shi gaw namman sau loi mi la nna tawn hkungri a ntsa e sanit lang lapri bun let dai hte seng ai arai nlang hte hpe mung, ntsin htung hte de a shadun ni hpe mung dai Madu a matu ap nawng da wu ai.
12 Shi gaw namman sau loi mi la nhtawm Arun a baw hta ru jaw ya nna aya dang ya wu ai.
13 Mawshe gaw dai Madu hkang da ai hte maren, Arun a shadang sha ni hpe shawng de woi shapraw la nhtawm palawng jahpun ya ai hte shingkyit kyit ya nhtawm shanhte a baw ni hta bunghkaw hkaw ya wu ai.
14 Mawshe gaw htingrai hkungga a matu, usu dun la nna de a baw hta Arun hte shi a shadang sha ni lata mara da ma ai.
15 Dai hpe Mawshe sat nhtawm asai loi mi la nna dai hpe ap nawng na matu tawn hkungri a jut ni hta tu ai nrung ni hta shi a lata hte chya wu ai. Ngam ai asai hpe chyawm gaw tawn hkungri a lagaw nhpang e ru hkaw kau wu ai. Ndai hku nna dai hpe shi ap nawng ai hte jasan jaseng da wu ai.
16 Mawshe gaw pu kan hta kap ai sau mahkra, sin hta na kaja htum ai, sade tawng lahkawng hte dai hta kap ai sau re ai ni hpe la nna tawn hkungri hta nat wu ai.
17 Shi gaw dai Madu hkang da ai hte maren, usu hta na ngam ai ahpyi, ashan hte ahkyi re ai ni hpe magawn la nna dap shinggan de dai ni hpe nat kau wu ai.
18 Dai hpang Mawshe gaw wan nat hkungga a matu sagu la dun la nna de a baw hta Arun hte shi a shadang sha ni a lata mara da nga ai.
19 Mawshe gaw dai hpe sat nna tawn hkungri a man mali grup grup de, de a asai lapri bun wu ai.
20-21 Shi gaw sagu la hkum hpe kahtam hpya nhtawm pu sin ni hte hpang lagaw ni hpe hka hte kashin nna abaw, asau hte ngam ai sagu hkum ting hpe tawn hkungri hta nat wu ai. Dai wan nat hkungga gaw lusha hkungga rai nga ai majaw de a sangau hpe dai Madu awng sharawng nga ai.
22 Dai hpang Mawshe gaw hkinjawng aya dang la na matu nga, kaga san da ai sagu la hpe dun sa nna, de a baw hta Arun hte shi a shadang sha ni a lata mara da nga ma ai.
23 Mawshe gaw dai hpe sat nhtawm asai loi mi la nna Arun a hkra na lapyen hta mung, hkra lata yungnu hta mung, hkra lagaw yungnu hta mung chya ya wu ai.
24 Dai hpang shi gaw Arun a shadang sha ni hpe shawng de shapraw la nhtawm asai loi mi la nna shanhte a hkra na lapyen ni hta mung, hkra lata yungnu ni hta mung, hkra lagaw yungnu ni hta mung chya ya wu ai. Mawshe gaw naw ngam ai asai hpe tawn hkungri ntsa man mali grup grup de lapri bun wu ai.
25 Shi gaw sau man hpe mung, nmai sau mung, pu kan magap ai sau hpe mung, sin hta na kaja htum ai hte sade tawng lahkawng hte dai hta kap ai sau, hkra magyi re ai ni hpe la sa wu ai.
26 Dai hpang shi gaw matsi n rawng ai muk ka hta na muk pa langai mi la nhtawm dai Madu hpe ap nawng nna sau hte gumrin ai muk pa langai mi hte muk hkrawp pa mi hpe sau man hte hkra magyi a ntsa hta mara da wu ai.
27 Arun hte shi a shadang sha ni a lata hta dai lusha yawng tawn da ya wu ai rai nna shanhte mung laksan kumhpa langai zawn dai Madu hpe nawng ya ma ai.
28 Dai hpang Mawshe gaw shanhte kaw na dai lusha la nhtawm aya dang ya ai hkungga zawn shatai nna wan nat hkungga ntsa tawn hkungri hta dai hpe nat wu ai. Dai gaw lusha hkungga rai nga ai majaw de a sangau gaw dai Madu hpe awng sharawng shangun nga ai.
29 Dai hpang Mawshe gaw sinda hpe mung la nna dai Madu hpe laksan kumhpa hku nawng jau ya wu ai. Dai aya dang ai sagu sinda gaw Mawshe a kamhtaw rai nga ai. Mawshe gaw dai Madu hkang da ai hte maren lam shagu galaw wu ai.
30 Mawshe gaw chya na namman sau hte tawn hkungri ntsa na sai loi mi la nhtawm Arun hte shi a shadang sha ni hte shanhte a hpun palawng ni hta lapri bun ya wu ai. Ndai hku nna shanhte hpe mung, shanhte a hpun palawng ni hpe mung dai Madu hta ap nawng ya wu ai.
31 Mawshe gaw Arun hte shi a shadang sha ni hpe, ?Dai Madu a hpung shingkang shanu nga ai Sum a shang wa chyinghka lam de hkungga shan la sa nhtawm dai hpe shadu nna dai Madu hkang da sai hte maren, aya dang ai hkungga ka hta na muk hte rau sha lu na myit dai.
32 Naw ngam ai shan hte muk hpe chyawm gaw wan hta nat kau na rai mu ai.
33 Nanhte a aya dang la ai htung ngut kre hkra, Sum a shang wa chyinghka lam kaw na sanit ya tup pru sa lu na myit dai n rai.
34 Nanhte a matu htingrai htingrat ya na, dai ni anhte ning rai galaw ai gaw anhte galaw na matu dai Madu hkang da ai lam rai nga ai.
35 Dai Madu hkang da sai hte maren, Sum a shang wa chyinghka lam e sanit ya, sanit na tup nga nga lu na rai myit dai. Nanhte n galaw myit yang si na rai myit dai. Dai gaw dai Madu ngai hpe hkang da ai lam rai nga ai,? ngu nna tsun wu ai.
36 Dai re ai majaw, dai Madu Mawshe hpe hkang da mada yawng Arun hte shi a shadang sha ni mung lam magup hkan galaw ma ai.