7
1 Ndai gaw mara raw hkungga a matu hkan sa na tara ni rai nna dai gaw grai chyoi pra nga ai.
2 Ndai hkungga a matu yam nga ni hpe tawn hkungri a dingdung maga nga ai yam nga sat shara hta yam nga sat na rai nga ai. De a asai hpe tawn hkungri a man mali grup grup de lapri na rai wu ai.
3 De a sau yawng ngu na nmai sau, pu kan hta kap ai sau,
4 sade tawng lahkawng hte dai hta kap ai sau, sin hta na kaja htum ai hpe la nna tawn hkungri hta nawng ya na rai wu ai.
5 Hkinjawng wa mung dai sau yawng dai Madu hpe lusha hkungga nawng ya ai zawn tawn hkungri hta nat na rai wu ai. Dai gaw htang jaw ai hkungga rai nga ai.
6 Hkinjawng dinghku ni hta na lasha ni kadai mung dai hpe sha mai nga ai; rai ti mung dai gaw grai chyoi pra nga ai majaw chyoi pra ai shara hta dai hpe sha na rai nga ai.
7 Htingrai hkungga hte mara raw hkungga gaw tara langai sha rai nga ai majaw shagu hkungga nawng ya ai dai hkungga shan gaw hkinjawng wa a matu rai nga ai.
8 Shagu hkungga nawng ya ai hkinjawng wa gaw wan nat hkungga nawng ya ai yam nga a ahpyi la na rai wu ai.
9 Wan htung hta kabaw ai shadung hkungga hpe mung, di jang, di dam re ai ni hta kakang ai hpe mung Karai Kasang hpe nawng ya ai hkinjawng wa la na rai nga ai.
10 Sau hte kayau ai rai ti mung sau n rawng ai hku kabaw ai shadung hkungga ni rai ti mung Arun hte shi a shadang sha ni maren mara karan la na rai ma ai.
11 Ndai gaw dai Madu hpe nawng jau na mahku hkungga a hkan sa na tara ni rai nga ai.
12 Ndai hkungga gaw masha langai ngai Karai Kasang hpe chyeju dum hkungga jaw ai shaloi, shagu hkungga nawng ya ai yam nga hte hpawn matsi n bang ai sha galaw ai muk, tsanlun sau hte kayau nna galaw ai htat ai muk pa ni, shing n rai tsanlun sau arut chya da ai muk hkrawp, shing n rai tsanlun sau hte kayau ai shadung hte galaw ai muk ni nawng ya na rai wu ai.
13 Dai hta kaga, matsi bang nna kabaw da ai muk pa ni hpe shi kahtap nna nawng jau na rai wu ai.
14 Shi gaw muk tawng shagu na chyen chyen, dai Madu hpe laksan kumhpa hku nawng ya na rai wu ai. Dai hpe tawn hkungri hta yam nga asai lapri ai hkinjawng wa madu la na rai wu ai.
15 Dai shani e nawng jau ai hkungga ashan sha kau na rai nga ai; dai hpe hpang jahpawt du hkra ngam da mai na n rai.
16 Masha langai ngai mahtang ga shaka shatup na matu shing n rai shi a myit ra ai hku jaw mayu nna la sa ai mahku hkungga rai yang, dai shani e nawng jau ai hpe sha nna hpang jahpawt du hkra ngam da ai hpe sha mai nga ai.
17 Masum ya du hkra ngam nga ai ashan hpe chyawm gaw wan hta nat kau na rai wu ai.
18 Masum ya nhtoi hta dai kaw na kachyi sha mi sha ai rai yang, dai masha wa a hkungga hpe Karai Kasang hkap la ya na wu ai n rai. Dai hkungga gaw n sharawng mai ai hte n san n seng ai hku sawn kau hkrum nga sai majaw, dai sha ai wa kadai mung de a nni nkri hkam sha lu na rai wu ai.
19 N san n seng ai ngu nna masat da ai arai hte hkra ai rai yang, dai hkungga shan sha lu na n rai; wan hta nat kau na rai wu ai.
Kadai rai ti mung htung hte maren san seng ai wa gaw dai ashan sha mai nga ai.
20 Rai ti mung, n san n seng ai wa kadai mung dai hpe sha ai rai yang, shi gaw Karai Kasang a amyu masha hta na sumri dan kau ai hkrum na rai wu ai.
21 Masha hta na mung, yam nga hta na mung, htung hte maren n san n seng ai arai hpa baw hpe mung shi hkra kau ai hpang ndai hkungga ashan hpe sha hkrup ai rai yang, shi gaw Karai Kasang a amyu masha hta na sumri dan kau ai hkrum na rai wu ai.
22 Dai Madu gaw Mawshe hpe Israela amyu masha ni a matu hkan sa na tara ni
23 jaw ya wu ai. Dumsu hte sagu bainam re ai ni a sau man sha lu na myit dai n rai;
24 shi hkrai si ai hte matse labye e kawa sat ai yam nga a sau hpe kaga lam a matu lang lu ti mung, sha lu na myit dai n rai.
25 Kadai rai ti mung dai Madu hpe nawng jau ai lusha hkungga ngu na yam nga asau sha ai wa gaw Karai Kasang a amyu masha hta na sumri dan kau ai hkrum na rai nga ai.
26 Israela amyu masha ni shanu nga ai shara shagu hkan lusha a matu u sai hte yam nga asai galoi mung lang lu na myit dai n rai.
27 Ndai tara hpe jahten sharun ai wa kadai mung Karai Kasang a amyu hta na sumri dan kau ai hkrum na rai wu ai.Ref 7: 26-27: Nin 9:4; Jaw 17:10-17; 19:26; Trj 12:16,23; 15:33.
28 Dai Madu gaw Mawshe hpe Israela amyu masha ni a matu hkan sa na tara ni jaw ya wu ai.
29 Mahku hkungga nawng ya ai wa kadai mung dai hta na kau chyen mi hpe laksan kumhpa hku dai Madu hpang de la sa nhtawm dai hpe lusha hkungga shatai nna shi a lata hte nan la sa na rai wu ai.
30 Shi gaw yam nga sau hte hpawn sinda hpe dai Madu a matu laksan kumhpa shatai na sak jaw na rai wu ai.
31 Hkinjawng wa gaw dai sau hpe tawn hkungri hta nat na rai wu ai; rai ti mung sinda hpe mahtang hkinjawng ni la na rai ma ai.
32 Yam nga a hkra magyi gaw mahku hkungga a matu,
33 asai hte sau nawng ya ai hkinjawng wa hpe laksan jaw na rai wu ai.
34 Dai Madu gaw yam nga sinda hte hkra magyi hpe laksan kumhpa a matu Israela amyu masha ni kaw na la nhtawm hkinjawng ni hpe jaw ya wu ai. Dai gaw dai Madu hpe nawng ya ai lusha daw chyen mi rai nna, Arun hte shi a shadang sha ni hpe kamhtaw jaw da nu ai. Dai gaw hkinjawng ni a matu Israela amyu masha ni prat mi hte prat mi jaw lu na rai ma ai.
35 Dai gaw Arun hte shi a shadang sha ni hpe hkinjawng amu gun hpai na matu aya dang ya ai shani e dai Madu hpe nat nawng ai lusha kumhpa ni hta na shanhte hpe jaw ai kamhtaw rai nga ai.
36 Dai shani e, nat nawng ai kumhpa daw chyen ni, shanhte hpe jaw na matu dai Madu gaw Israela masha ni hpe hkang da nu ai. Israela amyu masha ni gaw ndai hkang da ai tara ni hpe prat mi hte prat mi madat mara lu na rai ma ai.
37 Ndai ni gaw wan nat hkungga, shadung hkungga, htingrai hkungga, mara raw hkungga, aya dang hkungga hte mahku hkungga ni a tara lam ni rai nga ai.
38 Israela amyu masha ni shanhte a shagu hkungga ni nawng ya ai shani tsun na matu, dai Madu Mawshe hpe nam mali kata Sina Bum ntsa e hkang da ai ga ni rai nga ai.