13
1 Yeroboam gaw shagu hkungga nawng ya na nga tawn hkungri e tsap nga yang, dai Madu a hkang da ai ga hte maren, Yuda mung na myihtoi langai mi gaw Behtela mare de du sa wa nhtawm,
2 dai Madu a hkang da ai ga hta hkan sa na matu, tawn hkungri hpe ning ngu nna myihtoi wa htawn tsun wu ai: ?O tawn hkungri e, Tawn hkungri e, dai Madu tsun ai ga gaw da ndai rai nga ai. Yoshia ngu ai ma langai mi Dawi a dinghku hta shangai wa na ra ai. Shi gaw tara maigan tawn hkungri hta na a matu shagu hkungga nawng ya let daw jau amu gun hpai ya nga ai hkinjawng ni hpe sat nawng ya nna masha a nrut nra ni hpe mung nang hpe nat nawng ya na ra ai.? Ref 13:2: 2Hk 23:15-16.
3 Myihtoi wa gaw, ?Ndai tawn hkungri hkrat ga mat na ra ai; de a ntsa e nga ai wan dap ni yun hkrat mat na ra ai. Dai shaloi dai Madu nan ngai hku nna ga shaga nga nu ai hpe nanhte chye lu na rai myit dai,? ngu nna matut tsun wu ai.
4 Shing nga ai ga hpe Hkawhkam Yeroboam na jang, shi gaw dai wa hpe madi madun let, ?Dai wa hpe rim la mu!,? ngu nna hkang dat wu ai. Shaloi hkawhkam wa a lata lahpum gaw kalang lata katsing si mat ai hte bai n dawm la lu mat wu ai.
5 Dai Madu a mying ningsang hta myihtoi wa tau tsun da nu ai hte maren, tawn hkungri mung akajawng sha hkrat ga mat nhtawm wan dap ni ga de yun hkrat mat nga sai.
6 Hkawhkam Yeroboam gaw myihtoi wa hpe, ?Chyeju hte dai Madu na a Karai Kasang kaw nye a matu akyu hpyi ya e; nye a lata lahpum hpe bai shamai ya na shi kaw hpyi nem ya e!,? ngu nna tsun wu ai.
Shaloi myihtoi wa mung dai Madu kaw akyu hpyi ya wu ai rai nna hkawhkam wa a lata lahpum mai tsai mat wu ai.
7 Dai hpang hkawhkam wa gaw myihtoi wa hpe, ?Lusha lama ma sha la na matu ngai hte rau nta de wa gaw. Nang galaw dan sai amu a majaw ngai nang hpe kumhpa jaw na de ai,? ngu nna tsun wu ai.
8 Dai myihtoi wa mung, ?Na a sut gan ka-ang hkup mi ngai hpe jaw tim pyi nang hte rau lu rau sha na matu, ngai nang kaw n hkan nang lu na nngai.
9 Dai Madu mahtang ngai hpe hpa mung n lu, n sha ai hte ngai sa wa ai lam hku bai nhtang wa lu na n rai, nga nna ngai hpe hkang da nga ai,? ngu nna htan wu ai.
10 Dai rai nna shi sa wa ai lam hku n re ai sha, kaga lam hku mahtang shi nhtang mat wa wu ai.
11 Dai aten hta Behtela mare e myihtoi dingla langai nga nga ai. Shaloi shi a kasha ni sa nna dai shani, Yuda mung na myihtoi wa Behtela mare e galaw dan nu ai amu hte Hkawhkam Yeroboam hpe shi kaning ngu tsun kau nu ai lam, shi hpe tsun dan mu ai.
12 Myihtoi dingla wa gaw shanhte hpe, ?Gara lam hku shi pru mat wa sata?,? ngu nna san wu ai. Shanhte gaw shi hpe lam madun dan mu ai,
13 shi a matu lawze byau ya na, shi shanhte hpe tsun wu ai. Shanhte mung galaw ya nhtawm,
14 Yuda mung na hkinjawng wa hpang de hkan na matu lam dingyang jawn yu wa wu ai. Shaloi wamyi hpun npu e dung nga ai hpe sa mu jang, ?Nang gaw Yuda mung na myihtoi wa rai nga n ni?,? ngu nna san wu ai.
Shaloi dai wa mung, ?Ngai rai nga nngai,? ngu nna htan wu ai.
15 Myihtoi dingla wa gaw, ?Ngai hte rau nta de wa nna lusha da mi jawm sha chyai ga,? ngu nna tsun wu ai.
16 Rai ti mung Yuda mung na myihtoi wa mahtang, ?Ngai nang hte rau nta de n hkan wa lu na nngai; na a hkalum la ai lam hpe mung n hkap la lu na nngai. Ndai yang e mung nang hte hpa n lu, n sha lu na nngai;
17 hpa majaw nga yang, dai Madu mahtang ngai hpe hpa mung n lu, n sha ai sha ngai sa wa ai lam hku nta de nhtang wa lu na n rai nga nna hkang da nga ai,? ngu nna htan wu ai.
18 Dai hpang Behtela mare na myihtoi dingla wa gaw shi hpe, ?Ngai mung nang hte maren sha myihtoi langai mi rai nga nngai, dai Madu a hkang da ai ga hta, nang hpe ngai nta de woi wa nna hkalum la na lam lamu kasa ngai hpe tsun ai,? ngu nna tsun dan wu ai. Rai ti mung myihtoi dingla wa chyawm gaw masu tsun nga wu ai.
19 Dai rai nna Yuda mung na myihtoi wa gaw myihtoi dingla wa hte rau nta de wa nhtawm shi hte rau lu rau sha rai nga ai.
20 Shan gaw dai sha ku makau e naw dung nga ma yang, dai Madu a ga myihtoi dingla wa kaw du ai rai nna,
21 shi gaw Yuda mung na myihtoi wa hpe, ?Nang gaw shi a ga hpe n madat n mara ai hte shi hkang da ai hku n hkan galaw nga ndai.
22 Shing rai na malai, nang n lu n sha na lam shi nang hpe hkang da tim, nang nhtang wa nna shara mi hta lu sha kau nit dai majaw sat kau ai hkrum na ndai; na a moi mang hpe mung na a dinghku masha ni a lupwa hta lup makoi da lu na n rai,? ngu nna tsun wu ai.
23 Shan lu sha ngut jang, myihtoi dingla wa gaw Yuda mung na myihtoi wa a matu lawze byau ya nhtawm dai hta jawn mat wa wu ai.
24 Dai hpang hkrun lam ntsa e, hkanghkyi langai mi hte hkrum nna shi hpe kawa sat kau wu ai. Shi a moi mang gaw nmaw lam ntsa e taw nga nna, lawze hte hkanghkyi mahtang de a makau e tsap nga ai.
25 Moi mang gaw nmaw lam ntsa e taw nga nna, hkanghkyi gaw de a makau e tsap nga ai hpe lai masha nkau mi mu ma ai. Shaloi shanhte gaw Behtela de wa nna shanhte mu ai lam shiga wa shana ya mu ai.
26 Dai zawn byin ai shiga hpe myihtoi dingla wa na jang, shi gaw, ?Dai wa gaw dai Madu a hkang da ai ga hpe n madat n mara ai myihtoi wa she rai na sai law! Dai Madu gaw shi tsun ai hte maren galaw shatup nga ai majaw shi hpe htim nna sat kau na matu dai Madu gaw hkanghkyi hpe shangun dat ai rai na sai,? ngu nna tsun wu ai.
27 Dai hpang shi gaw shi a kasha ni hpe, ?Nye a matu lawze byau ya mi,? ngu nna tsun wu ai. Shanhte mung galaw ya mu ai.
28 Shi jawn mat wa yang, nmaw lam ntsa e myihtoi wa a moi mang taw nga ai hpe, de a makau e lawze hte hkanghkyi tsap nga ai hpe mung sa mu wu ai. Dai hkanghkyi chyawm gaw moi mang mung n sha, lawze hpe mung n amya rai nga la ai.
29 Myihtoi dingla wa gaw moi mang hpe hta la nna lawze ntsa e mara let Behtela mare de nhtang wa wu ai; shing rai sharung shayawt ai hte dai hpe lup makoi da wu ai.
30 Dai moi mang hpe shi a nta masha ni a lupwa hta nan lup makoi nhtawm shi hte shi a kasha ni sharung shayawt let, ?Oh ngai hpu e, ngai hpu e!,? ngu nna tsun ma ai.
31 Ya makoi mayang ai amu ngut jang, myihtoi wa gaw shi a kasha ni hpe, ?Ngai si jang ndai lupwa shi a makau e ngai hpe lup makoi da mi,
32 Behtela mare e nga ai tawn hkungri hpe mung, Samari mung na mare ni a nawku shara ni yawng hpe ninghkap nna shi tsun ai dai Madu a hkang da ai ga gaw kaja wa teng teng byin wa na ra ai,? ngu nna tsun wu ai.
33 Israela Hkawhkam Yeroboam gaw shi a n hkru ai lam hta na myit n kayin ai sha shi galaw da ai tawn hkungri hta daw jau amu galaw na matu yu maya dinghku kaw na hkinjawng ni hpe naw lata la wu ai; dai shara hta hkinjawng tai mayu ai ni kadai hpe mung hkinjawng aya dang ya wu ai.
34 Ndai zawn shi a maga hku nna galaw ai yubak gaw shi a magam tingnyang aru asai matu hpe jahten sharun kau shangun ai hte atsai awai hten za mat shangun nga ai.