21
1 Yuda Hkawhkam Zedekia gaw Malhkiya a kasha Pashura hte hkinjawng Masea a kasha Zehpania yan hpe ngai hpang de shangun dat nhtawm ndai lam hpyi lajin ma ai:
2 ?Babelon Hkawhkam Nebuhkadneza hte shi a hpyen luksuk ni gaw mare hpe wang da nga ma ai majaw, anhte a matu dai Madu hpe chyeju hte naw tsun ya mi. Dai Madu gaw anhte a matu shi a lamik kumla lama mi shabyin dat nna Nebuhkadneza hpe htingnut mat wa shangun na ra ai.? Ref 21:2: 2Hk 25:1-11; 2Hl 36:17-21.
3 Dai hpang dai Madu gaw ngai hpe ning ngu tsun ai hte maren ngai gaw ngai hpang de shangun dat ai ni hpe tsun ni ai.
4 Dai Madu Israela a Karai Kasang gaw Zedikia hpe ning nga tsun na matu tsun nu ai: ?Ngai gaw Babelon hkawhkam hte shi a hpyen luksuk ni hpe hkap gasat nga ai na a hpyen luksuk hpe jasum kau ya na nngai. Na a share shagan hpyenla ni a laknak arung arai ni hpe ndai mare ka-ang e sumpum da na nngai.
5 Ngai gaw nang hpe nye a n-gun mahkra hte, pawt sindawng ai, n-yun bu ai, masin kahtet ai hte hkap gasat na nngai.
6 Ndai mare hta shanu nga ai masha hkum shagu hpe ngai sat kau na we ai. Mare masha ni hte dusat yam nga ni mung hkrit hpa ana zinli hte si mat na mara ai.
7 Rai ti mung, nang hte na a mung du salang ni majan, hkuwa hte ana zinli kaw nna lawt lu ti mung, naw ngam nga ai nanhte hte ndai mare na amyu masha ni gaw Hkawhkam Nebuhkadneza hte nang hpe sat kau na matu ra sharawng nga ai na a gumlau hpyen ni a lata hta nanhte yawng hpe ngai ap kau na we ai. Nebuhkadneza mung nang hpe sat kau na ra ai. Shi gaw nanhte langai mi hpe mung ngam da na ra ai n rai, matsan yu dum na ra ai n rai, nanhte kadai hpe rai tim myit yu machyi na ra ai n rai. Dai Madu ngai nan tsun ni ai.?
8 Dai hpang dai Madu gaw shi a amyu masha ni hpe htawn tsun na matu ngai hpe ning nga tsun wu ai: ?Madat u! Ngai dai Madu nan nang hpe asak hkrun lam hte si ai de woi sa wa ai lam lahkawng hpe lata la na ahkang jaw da nga nngai.
9 Ndai mare hta nga ai kadai rai ti mung majan, kawsi hpang gara hte ana zinli ni hte sat kau hkrum na mara ai. Rai ti mung, ya mare hpe htim gasat nga ai Babelon masha ni hpang de sa shang mat wa ai ni chyawm gaw sat kau hkrum na mara ai n rai; shanhte a asak sha gaw lawt lu na mara ai.
10 Ngai gaw ndai mare hpe n shangam da na matu nye a myit hpe daw dan ni ai; ndai mare hpe jahten shabyak kau na we ai. Dai mare gaw Babelon Hkawhkam a lata de ap kau ai hkrum na ra ai; shi gaw dai hpe ga du hkra nat kau na ra ai. Dai Madu ngai nan tsun ni ai.?
11-12 Yuda hkawseng htingnu na masha ni hpe ndai mungga tsun na matu dai Madu ngai hpe ning nga tsun ai: Dai Madu ngai tsun nga ai ga hpe na la mu. Yu u, teng man ai amu hpe shani shagu daw dan nga ai. Shi hpe maw sha mawp sha nga ai wa kaw nna maw sha mawp sha n hkrum mat hkra dai masha wa hpe makawp maga u. Dai lam hpe nang n galaw ai rai yang nang galaw ai n hkru ai amu gaw n sat lu ai wan zawn nye a masin kahtet ai hpe hkru shangun na ra ai.
13 Yerusalem e, nang gaw pa layang e dung nga ai lunghkrung zawn kadit ni a ntsa e dung nga ndai. Rai ti mung, ngai nang hpe hkap gasat na nngai. Anhte hpe kadai htim gasat lu na n rai, na a bunghku ni hpe kadai agrawp kau ya lu na n rai, nga nna nang tsun ndai.
14 Rai ti mung, nang galaw sai amu ni hte maren, ngai nang hpe ari jaw na we ai. Na a hkawhkam htingnu hpe mung wan nat kau na we ai, shing rai dai wan gaw grup yin yawng mayawng hpe hkru kau na ra ai. Dai Madu ngai nan tsun ni ai.?