20
1 Imera a kasha Nawku Htingnu agyi, hkinjawng Pashura gaw ngai tsun ai ndai lam ni hpe na ai shaloi,
2 shi gaw ngai hpe kayat ai hte Nawku Htingnu kata na lahta Benyamin Chyinghka makau e hpri hte gyit sumroi da mi ai.
3 Hpang jahpawt e, Pashura gaw ngai hpe sharen da ai kaw na raw dat ai hpang ngai gaw shi hpe, ?Dai Madu gaw nang hpe Pashura ngu nna shamying wu ai n rai. Shi nang hpe jaw ai mying gaw ?Shara Shagu Hkan Na Hkrit Hpa Lam? ngu ai rai nga ai.
4 Dai Madu gaw shi nan, ?Ngai gaw nang hkum nan hte na a jinghku ni mahkra hta nang hpe hkrit hpa lam shatai na we ai; shanhte yawng gaw gumlau hpyen ni a nhtu ni hte sat kau hkrum na mara ai hpe nang mu na rin dai. Ngai gaw Yuda amyu masha ni yawng hte hpe Babelon hkawhkam wa a lata de ap kau na we ai. Shi gaw nkau mi hpe shi a mungdan de bawng masha hku woi mat wa nna kaga ni hpe sat kau na wu ai.
5 Ngai gaw ndai mare a sut gan mahkra hte hpe mung, dai mare a sut gan arung arai nlang hte hte Yuda hkawhkam ni a sut gan ni du hkra pyi, shanhte a gumlau hpyen ni a lata de ngai ap kau na nngai. Shanhte gaw dai arai yawng mayawng hpe Babelon mung de la wa na mara ai.
6 Na a matu chyawm gaw Pashura e, nang hte na a dinghku masha ni yawng mung rim hkrum ai hte Babelon mung de woi mat wa hkrum na marin dai. Dai yang e, nang gaw nang hpe masu magaw ga law law tsun yu sai na a jinghku ni yawng hte rau si wa nna, lup makoi ai hkrum na rin dai,? ngu nna tsun ai.
7 Madu e, nang gaw ngai hpe masu hkalem kau nit dai,
ngai mung masu hkalem hkrum nga nngai.
Nang gaw ngai hta grau nna n-gun ja nga ndai,
nang gaw ngai hpe ka-up dang kau nga ndai.
Masha shagu ngai hpe mani asawng ma ai;
shanhte gaw ngai hpe shani tup mani asan nga ma ai.
8 Ngai ga tsun ai aten shagu, ngai gaw marawn jahtau
ai hte, ?Kashun kashe du daw sai hkaw lam! Hten byak lam!,? ngu nna marawn garu nngai.
Madu e, ngai gaw na a mungga hkaw tsun nngai majaw,
ngai gaw asawng hkrum ai hte aten shagu jahpoi hkrum nga nngai.
9 Rai ti mung, ngai gaw, ?Ngai gaw dai Madu hpe malap kau na nngai,
shi a mying hta mahta nna galoi mung n shaga na ni ai,? ngu nna tsun ai shaloi,
na a mungga gaw nye a myit masin kata hta wan
zawn hkru nga li ai.
Dai hpe hkam jan lu na matu kaja htum ai hku shakut ti mung,
dai hpe loi mi pyi n lu sharang lu nngai.
10 Masha shagu gaw, ?Hkrit hpa gaw shara shagu hkan nga nga ai!
shing rai anhte shi hpe ahkaw ahkang lu ai ni hpang de tang madun ga!,? nga nna kadum kahte tsun ai ga hpe ngai na nngai.
Nye a hku hkau ai jinghku ni pyi nye a hkrat sum na lam hpe la mada yu nga ma ai.
Shanhte gaw, ?Shi hpe mahkoi lau la lu nhten; shaloi anhte shi hpe lu rim ai hte matai dawp lu na ga ai,? nga nna tsun ai.
11 Rai ti mung, Madu e, nang gaw n-gun ja ai hte n-gun chyalai rawng nga ndai rai nna ngai hpang maga de nga nga ndai,
ngai hpe zingri zingrat ai ni sum mat na mara ai.
Shanhte n dang lu nga ma ai majaw,
htani htana kaya hkrum na mara ai.
Shanhte a kaya hkrum ai lam gaw galoi mung malap kau lu na ra ai n rai.
12 Rai ti mung, Chyahtum Chyalai N-gun Rawng ai Madu e, nang gaw amyu masha ni hpe teng man ai hku chyam dinglik yu nga ndai;
shanhte a myit masin hte kraw lawang ni hta hpa baw rawng nga ai hpe nang chye nga ndai.
Dai rai nna, na a lata hta nye a amu ap da ni ai majaw,
nye a gumlau hpyen ni hpe nang matai dawp na lam ngai mu lu n-ga law.
13 Dai Madu hpe mahkawn mangoi mu!
Dai Madu hpe shakawn kungdawn mu!
shi gaw dip gamyet sha hkrum nga ai ni hpe n hkru ai masha ni a lata kaw na hkye mawai la nga ai.
14 Ngai shangai wa ai nhtoi gaw dagam dala hkrum u ga!
Nye nu ngai hpe shangai ai shani hpe malap kau u ga! Ref 20:14-18: Yob 3:1-19.
15 ?Ndai gaw lasha rai nga ai! Nang shadang sha langai lu ndai!,? nga nna nye a wa hpe shiga shana ai hte
kabu shangun ai wa gaw
dagam dala hkrum nga u ga.
16 Madu gaw matsan dum ai lam n nga ai sha
dai mare ni hpe jahten kau ai zawn, shi tai nga u ga.
Jahpawt manap e nchyi nmu nga nna jahtau ai nsen ni hte
shani chyingtung e majan jasu shadum ai nsen ni shi na u ga,
17 hpa majaw nga yang, dai wa gaw hkritung kaw nna ngai hpe n sat kau ai majaw rai nga ai.
Dai hku byin wa ai rai yang, nye nu a kan gaw nye a lup tai wa na rai nga ai.
18 Ngai hpa majaw shangai wa nga a ta?
Ru tsang hte yawn hkyen ai chyu sha hkrum let
kaya hkrum ai hte nye a aprat jahtum kau na matu rai nga a ni?