1 Masha amyu baw ni yawng a masha ni e, sa marit! Jawm hpawng nna madat mu. Ginding aga hte dai hta shanu nga ai masha shagu hte gaw ndai de sa nna madat la mu ga. 2 Dai Madu gaw masha amyu baw ni yawng hte shanhte a hpyen luksuk ni yawng hpe pawt sindawng nga ai. Shi gaw shanhte hpe shamyit kau na matu daw dan nu ai. 3 Shanhte a moi mang ni hpe lup makoi lu na n rai, rai ti mung dai yang e yat ai hte manam hkying taw nga na mara ai; bum ni gaw asai hte hkyeng mat na ra ai. 4 Ajan, shata hte shagan ni gaw ga de di hkrat ayai mat na ra ai. Sumsing lamu gaw laika shabawn zawn katsu mat na ra ai; shagan ni gaw sabyi ru shing n rai lakum hpun kaw na run hkrat ai hpun lap ni zawn tai mat na ra ai. Ref 34:4: Mat 24:29; Mrk 13:25; Luk 21:26; Shr 6:13-14.

5 Dai Madu gaw sumsing lamu hta shi a nhtu hkyen lajang da nu ai, ya chyawm gaw dai hte Edom mung hte jahten kau na matu shi daw dan kau nu ai masha ni hpe adup kayat na ra ai. Ref 34:5-17: Esa 63:1-6; Yer 49: 7-22; Eze 25:12-14; 35:1-15; Amo 1:11-12; Oba 1-14; Mal 1:2-5. 6 Shi a nhtu gaw hkungga nawng ya ai sagu bainam ni a asai hte asau ni zawn sai hkru nga nna sau abya taw nga na ra ai. Dai Madu gaw Bozra mare e ndai hkungga nawng ya na ra ai; shi gaw Edom mung hta e sat poi kaba galaw na ra ai. 7 Amyu masha ni gaw hpawlam hte usu ni zawn kadawng taw mat na mara ai, ginding aga gaw sai hte hkyeng nna sau hte ka-up da ai hkrum na ra ai. 8 Ndai aten gaw dai Madu Ziun hpe hkye mawai la ai hte de a gumlau hpyen ni hpe matai htang ai aten rai na ra ai.

9 Edom mung na hka nu ni gaw katara zawn hkat mat nna ga sau gaw kan gale mat wa na ra ai. Mungdan ting gaw katara zawn hkru mat na ra ai. 10 Dai mungdan gaw shani shana hkru nga na ra ai, wan hkut mung dai mungdan kaw na htani htana rawt mawng taw nga na ra ai. Dai mung gaw prat mi hte prat mi katsi katsang shara tai mat nna kadai mung dai mung hku bai ga lai hkawm sana ma ai n rai. Ref 34:10: Shr 14:11; 19:3. 11 U hku ni hte u hka ni dai mung hpe madu na mara ai. Dai Madu gaw dai mung hpe hpan da ai lam hpa mung garai n nga yang na zawn akrin ayang shatai kau na ra ai. 12 Dai mung hpe up na hkawhkam nga na n rai, ningbaw ni yawng hkoi mat na mara ai. 13 Ju hpun hte tsing ni gaw hkawhkam htingnu ni hte bunghku kum da ai mare ni hkan tu wa na mara ai, nam gwi ni hte u hku ni dai shara hkan nga na mara ai. 14 Nam na matse labye dusat ni dai hkan brak hkawm na ra ai, lep nat ni shanhte shada da shaga hkat na mara ai. Shana na jahtung nat kanu gaw dai shara de sa wa nhtawm ban sa shara hkan tam wa na ra ai. 15 U hku ni atsip tsip nna di di nhtawm hkalung kraw wa ai hte dai ni hpe dai hkan e bau maka na mara ai. Langda ni mung dai shara e langai hpang langai sa hpawng na mara ai.

16 Dai Madu a hkrung kanu ni hte seng ai laika buk hta sawk tam yu mu; dai laika hta hpa baw a lam tsun da ai hpe hti yu mu. Dai dusat ni hta na langai mi mung mat mat na n rai, manang n lu ai shingtai langai mi mung nga na n rai. Dai Madu gaw dai zawn rai nga na matu hkang da nu ai; shi nan dai ni hpe shinggyin da na ra ai. 17 Dai Madu gaw mungdan dai hpe shanhte a lapran e karan ya nna shanhte langai hte langai hpe kumhtaw karan ya na ra ai. Shanhte gaw dai mung e prat mi hte prat mi shanu nga na mara ai, shanhte gaw dai mung hpe htani htana madu la na mara ai.