23
1 Ndai gaw Turu hte seng ai mungga langai rai nga ai.
Nammukdara ntsa na sanghpaw masha ni e, yawn hkyen ai hte sharung nga mu! Na a buga Turu sanghpaw daru hten za mat sai; De a nta ni hte sanghpaw danam ni hten run mat nga sai. Na a sanghpaw ni Kupru kaw na nhtang wa yang, dai shiga hpe nang na nga sai.
2-3 Sidon hpaga masha ni e, hkrap sharung nga mu! Nanhte gaw panglai rap nna Egutu mung hta pru ai nsi naisi ni hpe dut mari nna masha amyu baw ni yawng hte hpaga amu galaw na matu dat kasa ni dat dat nga myit dai.
4 Sidon mare e, Nanhte gaw myi man sum nga myit dai! Panglai hte galu kaba ai nammukdara gaw nang hpe ningdang kau ai hte, ?Ngai gaw kashu kasha n shaprat yu nngai. Ngai gaw shayi shadang sha ni hpe galoi mung n bau maka dat yu nngai,? nga nna tsun ai.
5 Turu mare jahten shaza kau hkrum sai lam hpe shanhte chye ma ai shaloi, Egutu masha ni pyi kajawng ai hte hkrit gari mat na mara ai.
6 Hponisha masha ni e, yawn hkyen ai hte hkrap sharung nga mu! Spain mung de hprawng lawt mat wa na matu shakut mu!
7 Moi chyaloi nhkoi kaw nna de da nga sai ndai Turu mare gaw kabu gara lu na rai nga a ni? Panglai rap nna sumtsan mung hkan e sa nga na matu masha dat dat ya ai gaw ndai mare rai nga a ni?
8 Ga ntsa e grau htum ai arawng sadang hkam la nga ai hpaga du ni nga ai ndai hkaw dung mare Turu hpe kadai wa hpaji jaw nna ndai lam yawng hpe shabyin dat a ta?
9 Chyahtum Chyalai N-gun rawng ai dai Madu gaw dai lam hpe shabyin dat nu ai. Shanhte galaw ai amu hta, shanhte a gumrawng gumtawng ai hpe jahtum kau na hte arawng sadang hte hpring ai shanhte a masha ni hpe shagrit kau na matu dai lam shabyin dat nu ai.
10 Spain mung na maden da ai lamu ga hta nga ai masha ni e, sa nna lamu ga hta yi sun galaw mu! Dai shara hta nang hpe makawp maga ya na masha langai mi mung n nga nga ai.
11 Dai Madu gaw panglai ntsa e shi a lata ladawn ai hte mungdan ni hpe jahten kau nu ai. Shi gaw Hponisha masha ni a hpaga yumga ginjaw ni hpe jahten kau na hkang dat nu ai.
12 Sidon mare e, Na a kabu gara ai gaw htum mat nit dai, na a masha ni dip gamyet sha hkrum nga masai. Shanhte Kupru de hprawng lawt mat wa ai rai yang pyi, shanhte naw shim lum na mara ai n rai.
13 (Matse labye dusat ni hpe Turu de shingle shang shangun ai gaw Asuri masha ni n rai, Babelon masha ni she rai ma ai. Babelon masha ni gaw langchyi ni hpe sharawt tawn nhtawm Turu a ngang ai hpyen dap ni hpe sharun shabyak kau ya let mare hpe jahten sharun kau da ma ai.)
14 Nammukdara ntsa e hkawm sa nga ai sanghpaw masha ni e, yawn hkyen ai hte hkrap sharung nga mu! Nanhte kam hpa nga ai mare gaw hten run mat nga sai.
15 Hkawhkam wa a asak prat ban, sanit shi ning tup, Turu mare hpe malap kau ai aten du na ra ai. Dai shaning ni lai mat wa ai shaloi, Turu mare gaw mahkawn mangoi hta na shawa num zawn rai na ra ai:
16 Matsan mayan malap kau hkrum ai shawa num e,
na a tingse lang nna, mare hkan shinggrup hkawm u,
Lasha ni lang mi bai sa wa na matu
na a mahkawn mangoi ni hpe bai dum shapyaw ai hte mahkawn u.
17 Dai sanit shi ning lai mat wa ai shaloi, dai Madu gaw Turu hpe mi na shi a hpaga shara de nhtang wa shangun na ra ai, shi gaw mungkan mungdan ni yawng hpang de shap sha na ra ai.
18 Shi hpaga ga nna lu tam ai gumhpraw hpe dai Madu hpang de ap nawng ya na ra ai. Shi gaw dai gumhpraw ni hpe n kyem da na nu ai, rai ti mung dai Madu hpe nawku daw jau ai ni gaw shanhte hta ra kadawn nga ai malu masha hte bu hpun palawng ni mari la na matu, shi a gumhpraw jai lang wa na ra ai.