22
1 Ndai gaw Shingran Kadit hte seng ai mungga langai rai nga ai.
Hpa byin nga a ni? Mare masha ni yawng gaw hpa majaw nta numgaw ntsa e poi galaw nga ma ni?
2 Mare ting gaw kaming kamawng rai nga nna garu kachyi nsen hte mau kahpra ai hte hpring nga ai.
Ndai majan hta si mat sai na a amyu masha ni gaw gasat si mat ai ni n rai ma ai.
3 Na a ningbaw ni yawng gaw hprawng mat wa nna shanhte ndan pala langai pyi garai n lu gap dat yang rim la ai hkrum ma ai.
4 Ya chyawm gaw si mat wa sai nye a amyu masha ni yawng a jaw e ahkup ahka nga hkra hkrap sharung na matu ngai hpe sha tawn da mi. Ngai hpe shalan shabran hkum rai myit.
5 Ndai gaw Shingran Kadit hta dai Chyahtum Chyalai N-gun rawng ai Tsaw Htum ai dai Madu gaw kajawng kaja kaming kamawng rai hkrat sum ai hte shanut shanat re ai hpe anhte a ntsa e dat dat ya ai aten rai nga ai. Anhte a mare bunghku ni agrawp daw mat ai hte karum la na matu jahtau ai nsen gaw kawng ni a lapran e hpungtang kashaw nga ai.
6 Elam mung na hpyenla ni gaw ndan pala ni hpe lang nna gumra jawn sa wa nga ma ai. Kira mung na hpyenla ni gaw shanhte a ninggang ni hpe jin jin di da nga masai.
7 Yuda mung na namhpun kaja rawng ai kadit ni gaw hpyen leng ni hte hpring nga ai; gumra jawn ai hpyenla ni gaw Yerusalem chyinghka ni hkan tsap nga ma ai.
8 Yuda mung na dahpran shara ni yawng agrawp mat sai.
Dai zawn byin ai shaloi, nang gaw laknak dum na laknak ni hpe la shapraw da nga nit dai.
9-10 Nanhte gaw Yerusalem bunghku ni hta na bai gram lajang ra ai shara ni hpe mu manit dai. Nanhte gaw Yerusalem na dum nta mahkra hpe hkan yu nhtawm, mare bunghku bai gram lajang na nlung lu la na matu nta nkau mi hpe run kau nga myit dai.
11 Hka lawng dingsa na lwi hkrat wa ai hka hpe dim sha-ing da na matu nanhte gaw mare kata hta hka lawng ni hpe galaw manit dai. Rai ti mung nanhte gaw moi chyaloi nhkoi kaw nna dai lam yawng hpe yaw shada da ai hte byin wa na matu shabyin ya ai Karai Kasang a ga hpe n madat kau nga myit dai.
12 Chyahtum Chyalai N-gun rawng ai Tsaw Htum ai dai Madu gaw nang hpe hkrap ngu hkrap ngoi ai, sharung shayawt ai, na a baw shangun na hte lachyit nba hpun na matu htet da nga ai.
13 Shing rai na malai, nang gaw mani sumsai hte masat poi galaw nga ndai. Nang gaw sha na matu sagu, dumsu ni sat nna sabyi lu nga ndai. Nang gaw, ?Anhte mung sha ga, lu ga! Hpawt ni sha anhte si wa na saga ai,? ngu nna tsun ndai.
14 Chyahtum Chyalai N-gun rawng ai Tsaw Htum ai dai Madu gaw shi hkum nan ngai hpe, ?Ndai n hkru n shawp ai gaw shanhte asak hkrung nga dingsa galoi mung mara dat hkrum na ma ai n rai. Chyahtum Chyalai N-gun rawng ai Tsaw Htum ai dai Madu Ngai nan tsun ni ai,? ngu nna tsun wu ai.
15 Chyahtum Chyalai N-gun rawng ai Tsaw Htum ai dai Madu gaw hkawseng nta woi hpareng ai Shebna hpang de sa nna shi hpe ning ngu tsun na matu ngai hpe tsun ai:
16 ?Na hkum nang hpa zawn nawn da wu ni? Nang gaw kawng nhkrem hkan na lunghkrung hta na a matu lup tawk na, kaning re ai ahkaw ahkang lu nga n ni?
17 Nang gaw ahkyak na ndai, rai ti mung dai Madu gaw nang hpe magra la nna kabai kau na ra ai.
18 Shi gaw nang hpe magra la nna gumdin tarin nhtawm, grau dam lada ai mung de, kabai kau dat na ra ai. Nang gaw dai shara hta nang grai gumrawng ai hpyen leng makau e nang si wa na ndai. Nang gaw na a madu a nta hta myi man sum na rai ndai.
19 Dai Madu gaw nang hpe amu kaw na shapraw kau nhtawm na a tsaw ai arawng aya kaw nna mung jahkrat kau na ra ai.?
20 Dai Madu gaw Shebna hpe, ?Dai lam byin ai shaloi, ngai gaw Hilkia a kasha nye a shangun ma Eliakim hpe shangun dat na nngai.
21 Ngai gaw na a tara shang palawng galu shi hpe jahpun ya nhtawm, shi hpe shingkyit kyit ya nna, nang hpe jaw tawn da ai ahkang aya mahkra, shi hpe ap ya na nngai. Shi gaw Yerusalem mare na amyu masha ni hte Yuda mung a kawa tai nga na ra ai.
22 Ngai gaw Dawi a aru arat hta na hkawhkam wa a npu e hkum tsup ai daru magam ahkang aya shi hpe ap ya na nngai. Shi gaw dai nta a sumsaw hpe jum da na ra ai, shi hpaw da ai hpe kadai mung pat na n rai, shi pat da ai hpe kadai mung hpaw na n rai.
23 Ngai gaw shi hpe sumprat langai zawn ngang ngang dawk jung da na nngai, shi gaw shi a dinghku ting a arawng sadang a hka hpawk tai na ra ai.
24 ?Rai ti mung shi a makyin jinghku ni hte shamyet shanat ai ni yawng hte gaw shi a matu lit tai na ra ai. Shanhte gaw di mala hka wan ni hpe sumprat hta mahkai tawn da ai zawn shi a ntsa e noi da na mara ai!
25 Dai zawn byin wa ai shaloi, ngang ngang jung da ai sumprat gaw malawk pru mat wa nna hkrat mat na ra ai. De a ntsa e noi da ai arung arai gaw magup sumhpa a jahtum mung rai na ra ai,? nga nna tsun ai. Dai Madu nan tsun nu ai.