16
1 Moba masha ni gaw nam mali na Sela mare kaw na sagu kasha langai hpe kumhpa hku nna Yerusalem up ai wa hpang de sak jaw dat ma ai.
2 Shanhte gaw tsip run nna nwan hkawm ai u ni zawn Arnon hka nu hkin-gau ntsa hkan e ala nga nna shatawng shada ai lam n nga ai sha shawng de, hpang de kahkrang hkawm nga ma ai.
3 Shanhte gaw Yuda amyu masha ni hpe, ?Hpa galaw na lam anhte hpe tsun dan mi. Hpun gaw shani pungding madi kahtet ai aten, katsi pyaw ai shingnip ka-up ya ai zawn anhte hpe makawp maga la mi. Anhte gaw na shingnip npu hta hkring sa la lu mi ga. Anhte gaw tsin-yam hkrum ai ni rai nga ga ai; anhte hpe kadai mung n mu tam na shara hta anhte hpe makoi da mi.
4 Na a mung hta anhte nga lu mi ga. Anhte hpe shamyit kau mayu ai ni a lata kaw na anhte hpe makawp maga la mi,? ngu nna tsun ma ai.
(Dip gamyet sha hkrum ai hte jahten shaza ai amu gaw htum mat na ra ai, mungdan hpe agrawp jahten kau ai ni mung hkoi mat na mara ai.
5 Dai hpang Dawi a matu mara langai gaw hkawhkam tai na ra ai, shi gaw amyu masha ni hpe sadi sahka hte tsaw ra myit hte up hkang na ra ai. Shi gaw ding hpring ai amu galaw na matu lawan na ra ai; teng man rap ra ai amu nga nga ai hpe shi mu na ra ai.)
6 Yuda amyu masha ni gaw, ?Moba masha ni kade wa gumrawng gumtawng nga ma ai hpe anhte na saga ai. Shanhte myit tsaw myit dap hte rai dum nga ma ai lam hpe anhte chye ga ai, rai ti mung shanhte a shakawng shakat ai amu gaw kaman lila rai nga ai,? ngu nna tsun nga ai.
7 Moba masha ni gaw shanhte hkam sha ai nni nkri a majaw hkrap wa na mara ai. Shanhte yawng gaw Kira-Heresha mare hta sha ga sai lusha kaja hpe dum wa ai shaloi hkrap wa na mara ai. Shanhte gaw myit htum myit chyum hkrum na mara ai.
8 Heshbon makau na yi sun ni hte Sibma a sabyi sun ni gaw hten za mat nga ai-ndai sabyi sun ni hta na pru ai sabyi ntsin gaw masha amyu baw ni a mung up du ni hpe lu nang shangun ngun rai nga ai. Kalang mi, sabyi ru ni gaw Yazera mare hte sinpraw maga de nga ai nam maling de du hkra mung, sinna maga de Jum Nawng a wora hkran de du hkra hkrawn sa wa nga ai.
9 Ya chyawm gaw, ngai gaw Yazera a matu hkrap ai zawn Sibma a sabyi ru ni a matu hkrap na nngai. Amyu masha ni hpe kabu gara shangun na matu dai shara ni hta mangai n ngai nga ai majaw, nye a myi prwi ni gaw Heshbon hte Eleale a matu hkrat nga li ai.
10 Ya chyawm gaw namhpun kaja ai yi hkauna ni hta kabu gara ai lam n nga sai. Kadai mung sabyi sun ni hta jahtau garu ai hte mahkawn mangoi ai lam n nga sai. Sabyi ntsin galaw shapraw na matu kadai mung sabyi si kabye ai n rai; kabu gara jahtau garu ai nsen htum mat sai.
11 Ngai gaw Moba a matu yawn hkyen ai hte madai sharung nngai, Kira Heresha a matu sharung shayawt nngai.
12 Moba masha ni gaw bum ntsa na shanhte a nawku shara ni hte akyu hpyi na matu shanhte a nawku htingnu ni de shanhte hkum nan hki ba ai hte lung wa nga ma ai, rai ti mung dai gaw shanhte hpe mai kaja ai lam galaw ya lu nga ai n rai.
13 Ndai gaw Moba hte seng nna shawng e dai Madu jaw ya ai mungga rai nga ai.
14 Ya chyawm gaw, dai Madu gaw, ?Moba a galu kaba ai sut gan gaw masum ning laman hta teng teng hkoi mat na ra ai. Dai mung na masha law law hta na nkau mi sha asak hkrung nga na mara ai, shanhte gaw n-gun kya mat na mara ai,? ngu nna tsun wu ai.