1 Ndai gaw Moba hte seng ai mungga rai nga ai.

Ara hte Kira mare ni gaw lana mi hta sha jahten kau hkrum nga ai, Moba mung hta katsi katsang shara tai nga ai. Ref 15:1-16:14: Esa 25:10-12; Yer 48:1-47; Eze 25:8-11; Amo 2:1-3; Zep 2:8-11. 2 Dibon masha ni gaw nawku shara hta wa hkrap na matu kawng de lung wa ma ai. Moba masha ni gaw Nebo hte Medeba mare ni a matu sharung shayawt nga ma ai; shanhte gaw yawn hkyen ai hte shanhte a baw ni hte nhka mun ni hpe shangun kau ma ai. 3 Lam nmaw hkan nga ai masha ni gaw lachyit nba bu hpun nga ma ai; mare lawk ni hte nta numgaw ntsa hkan e mung masha ni sharung shayawt ai hte jahtau hkrap nga ma ai. 4 Heshbon hte Eleale masha ni jahtau hkrap ma ai rai nna, shanhte a marawn hkrap ai nsen hpe Yahaza mare du hkra na lu nga ai. Hpyenla ni mung hkrit gari ma ai; shanhte a nden marai mung n nga mat masai. 5 Nye a myit masin gaw Moba a matu hkrap nga a hka! Masha ni gaw Zoara hte Eglat Shelishiya kahtawng de hprawng mat wa masai. Nkau mi gaw hkrap let Luhit mare lam de lung wa ma ai; nkau mi gaw Horonaim de ja ja yawn ai hte hprawng mat wa ma ai. 6 Nimrim Hka Lawng gaw hkun hkraw mat sai, dai makau hta tu ai tsingdu mung nyip mat sai, tsit lali ai hpa mung n tu nga ai. 7 Masha ni gaw shanhte lu ai sut gan yawng hte hprawng shakut lu na matu Mu Mahka Kadit hpe lai di ma ai. 8 Jahtau hkrap ai nsen gaw Moba mung a lamu ga jarit shara shagu hkan du hkra na lu nga ai. Dai nsen hpe Eglaim hte Berelim mare du hkra na lu nga ai. 9 Dibon mare na hka nu gaw sai hte hkyeng nga ai, Karai Kasang gaw dai masha amyu ni a matu grau sawng ai lam lama ma hpe pyi dai shara hta kyem da ya nga ai. Rai sa, Moba mung hta naw hti ngam nga ai masha hkum shagu hte gaw sat kau ai hkrum na mara ai.