2
1 Ngai gaw nye a langchyi ntsa de lung wa nhtawm Madu ngai hpe hpa lam tsun dan na hte nye a lajin ai ga hpe shi kaning ngu htan ya ai hpe chye lu hkra, la mada yu nga na nngai.
2 Dai Madu gaw ngai hpe ndai mahtai jaw wu ai: ?Ngai nang hpe madun dan ai lam hpe lungpa ntsa hta e dan dan pra pra ka jahkrat tawn u, shaloi dai hpe praw rai hti lu na ra ai.
3 Dai hpe ka tawn u, hpa majaw nga yang dai gaw teng teng byin wa na aten garai n du nga ai. Rai ti mung aten gaw alawan du nga sai, ngai nang hpe madun ai lam gaw teng wa na ra ai. Dai du wa na aten gaw lanyan ai zawn rai nga ai, rai ti mung dai hpe la nga u; dai gaw teng teng byin wa na ra ai, dai gaw na taw nga na ra ai n rai. Ref 2:3: Heb 10:37.
4 Ndai gaw mungga rai nga ai: ?N hkru ai ni gaw hkrung nga lu na ra ai n rai, rai ti mung ding hpring ai ni gaw hkrung nga na ra ai hpa majaw nga yang shanhte gaw Karai Kasang hta sadi dung nga ma ai.??
5 Sut gan gaw masu hkalem ai amu rai nga ai. Lawhpa myit marin ai ni gaw gumrawng gumtawng ai hte kadau kadap rai nga ai-shanhte gaw si du zawn galoi mung myit n dik hkraw nga ma ai. Dai re ai majaw, shanhte gaw masha amyu baw mi a hpang masha amyu baw mi hpe shanhte a matu gasat dang la nga ma ai.
6 Padang dip hkrum ai masha ni gaw padang ninglaw lu ai ni hpe ashu kau nna, shanhte hpe jahpoi asawng kau na mara ai. Shanhte gaw, ?Na a n rai ai hpe nang la ndai, rai ti mung nang dingnye hkrum nga ndai! Nanhte gaw hka hpyi shagyeng ai hku nna galoi du hkra sut su nga na ngu nga myit ni?,? ngu nna tsun ma ai.
7 Rai ti mung, nanhte dai lam garai n chye yang, kaga ni hpe padang dip da ai ni gaw shanhte hkum nan hka kap ai wa hte amyat jaw ya na matu shagyeng hkrum na mara ai. Gumlau hpyen ni sa nna nanhte hpe hkrit shangun na mara ai. Shanhte gaw nanhte hpe hpya lu hpya sha na mara ai.
8 Nanhte gaw masha amyu baw law law a masha ni hpe hpya lu hpya sha manit dai, rai ti mung ya chyawm gaw naw hkrung nga ai ni nanhte hpe hpya lu hpya sha na mara ai hpa majaw nga yang, nanhte shut kau ai ru hka amu ni hte masha nga ai mungkan hte de a mare ni hpe kashun kashe du daw sai hkaw amu galaw manit dai.
9 Nanhte gaw dingnye hkrum nga myit dai! Nanhte gaw tinang a dinghku hpe kashun kashe du daw sai hkaw amu shabyin nna la wa ai sut gan hte mung, nanhte a dinghku hpe machyi hkra shangun ai hte hkrit tsang shara kaw na shim hkra nga pyaw shangun ai hte mung sut su shangun nga myit hka!
10 Rai ti mung nanhte a maw mawn ai lam ni gaw nanhte a dinghku hpe kaya kahpa jahkrum kau myit dai; Nanhte gaw masha amyu baw law law hpe jahten shaza ai hku nna tinang hkum hpe sha jahten sharun la shangun nga manit dai.
11 Bunghku nlung ni pyi nanhte hpe ninghkap marawn jahtau nga ai, lapa ni mung hpungtang kashaw nga ai.
12 Nanhte gaw dingnye hkrum nga myit dai! Nanhte gaw mare hpe ru hka amu hta npawt de da nga myit dai; ru hka amu hte dai mare hpe gaw sharawt da nga myit dai.
13 Nanhte padang dip da ai masha amyu baw ni gaw akyu n rawng ai amu magam hta hki ba nga ma ai, shanhte yawng galaw da sai amu ni gaw wan numli hta hkru mat na ra ai. Chyahtum Chyalai N-gun rawng ai dai Madu nan ndai amu galaw nu ai.
14 Rai ti mung, Panglai ni gaw hka hte hpring nga ai zawn ginding aga gaw dai Madu a hpung shingkang a machye machyang hpaji hte hpring nga na ra ai. Ref 2:14: Esa 11:9.
15 Nanhte gaw dingnye hkrum nga myit dai! Nanhte gaw tinang masin kahtet ai hta htingbu ni hpe kaya kahpa jahkrum nna sari jahpoi kau ya nga myit dai; nanhte gaw shanhte hpe chyaru nang ai ni zawn ndi nda di kau nga myit dai.
16 Nanhte gaw arawng sadang a malai kaya kahpa hte bai htinggrum da hkrum na marin dai. Nanhte nan lu nang nna ndi nda rai wa na myit dai. Dai Madu gaw nanhte hpe ari gawm lu shangun nna nanhte a arawng sadang sari jahpoi kau hkrum na rai myit dai.
17 Nanhte gaw Lebanon a nam maling ni hpe kran kau manit dai; ya chyawm gaw nanhte mung kran kadang hkrum na rai myit dai. Nanhte gaw dai shara yam nga ni hpe sat kau manit dai; ya chyawm gaw yam nga ni nanhte hpe jahkrit na mara ai. Ndai amu byin wa na ra ai, hpa majaw nga yang nanhte gaw sai hkaw ai ru hka amu galaw shut kau manit dai, nanhte galaw ai kashun kashe du daw sai hkaw amu ni hte mungkan ga a masha ni hte de a mare ni hpe ninghkap manit dai.
18 Hpara sumla gaw hpa baw akyu pru nga a ta? Dai gaw masha e tawk tawn ai arai langai mi sha rai nna, nanhte hpe masu hkalem, lam woi shadam ai hta jan nna shi hpa tsun dan lu nga ai n rai. Dai hpe tawk ai lasama wa shi galaw ai amu hta kam hpa ai gaw shi hta hpa akyu n rawng nga ai-dai karai gaw ga pyi n lu shaga nga ai!
19 Nanhte gaw dingnye hkrum nga myit dai! Nanhte gaw hpun hkyep hpe, ?Yup hprang u!? shing n rai nlung tawng hpe, ?Rawt u!,? ngu nna tsun myit dai. Hpara sumla gaw nanhte hpe hpa lam rai tim hpaw madun lu nga a ni? Dai gaw aja gumhpraw hte sup da nga tim, dai hta asak n rawng nga ai.
20 Dai Madu gaw shi a chyoi pra ai Nawku Htingnu hta nga nga ai; ginding aga ntsa na masha shagu hte gaw shi a man e a sim sha nga mu ga.