HABAKU LAIKA
(HABAKKUK)
Ga Nhpaw
Myihtoi Habaku a mungga ni gaw Babelon masha ni daru magam n-gun rawng ai aten, Hkristu garai n shangai ai Jaw 7 B.C. a jahtum shaning maga de pru wa sai. Shi a aten hta, shi gaw gumshem ai masha ni a kashun kashe du daw sai hkaw amu a majaw dingbai dingna htum hkra hkam sha lai wa nu ai, shi gaw Madu hpe, ?Dai re ai majaw, Shanhte gaw shanhte hta grau ding hpring ai amyu masha ni hpe jahten shaza nga ma yang, nang hpa majaw atsin sha nga nga n ta?,? ngu nna tsun wu ai (1:13). Madu gaw shanhte hpe htuk manu ai aten hta matai htang na nngai, nga nna tsun wu ai; ndai laman ?Ding hpring ai ni gaw hkrung nga na mara ai hpa majaw nga yang, shanhte gaw Karai Kasang hta sadi dung nga ma ai,? (2:4).
Ngam ai myihtoi laika a hpang daw ni hta tara n lang ai hte n ding n man ai ni a ntsa e tara jeyang na lam, Karai Kasang a galu kaba ai hpe masat dingsat galaw ai shakawn kungdawn ga ni hte ga shagawp sara wa a n htum n mat chye ai makam masham ni hpe shaleng da ai lam ni lawm nga ai.
1
1 Ndai mungga gaw dai Madu myihtoi Habaku hpe madun dan sai lam ni rai nga ai.
2 O Madu e, nang garai n madat ya, anhte hpe kashun kashe du daw sai hkaw amu kaw na nang garai n hkye la yang, karum la na matu kade na hkra ngai shaga ra na rai nga a ta?
3 Ndai zawn re ai ru yak tsin-yam nang ngai hpe hpa majaw madun dan nga n ni? Nang gaw ndai zawn shut hpyit ai amu hpe kara hku yu tawn nga n ni? Hten byak ai hte kashun kashe du daw sai hkaw amu gaw ngai hpe wang shinggrup da nna, gasat gala ai hte ga law ga la ai amu mung shara shagu hkan byin nga ai.
4 Tara gaw n-gun kya mat nna akyu n jaw lu nga ai, teng man rap ra ai tara agyi ni kaw nna galoi mung n pru nga ai. N hkru ai masha ni gaw ding hpring ai masha ni hpe dang kau ma ai majaw teng man ai lam n dan dawng lu nga ai.
5 Dai hpang, dai Madu gaw shi a amyu masha ni hpe, ?Nanhte hpe wang gawan da nga ai masha amyu ni hpe yu shati nga mu, nanhte gaw nanhte hpa mu ai lam hpe mau mat na myit dai. Nanhte dai lam na ai shaloi, nanhte n kam lu ai lam lama mi hpe ngai shabyin dat na nngai. Ref 1:5: Kas 13:41.
6 Ngai gaw gumshem nna kadau kadap re ai Babelon masha ni hpe daru magam n-gun jaw ya na nngai. Shanhte gaw kaga mungdan ni madu la lu hkra nga, mungkan ga ting hproi hkawm nga ma ai. Ref 1:6: 2Hk 24:2.
7 Shanhte gaw jahkrit ai hte hkrithpa lam shachyam shabra ma ai, shanhte nan tara hkum ni rai nga ma ai majaw, gumrawng nga ma ai.
8 ?Shanhte a gumra ni gaw rawng teng ni hta grau laram ma ai, kawsi ai chyahkyawn ni hta grau matse ma ai. Hpyen gumra jawn ai ni sumtsan shara ni kaw na jawn sa ma ai; Shanhte gaw lamyin hte htim amya ai galang ni zawn htim yu wa nga ma ai.
9 ?Shanhte a hpyen luksuk ni gaw kashun kashe gasat ka-up la na matu rawt lung wa nga ma ai, masha shagu hte gaw shanhte shani lung wa yang hkrit kajawng nga ma ai. Shanhte rim la lu ai bawng masha ni gaw zaibru tum ni daram law htam nga ai.
10 Shanhte gaw hkawhkam ni hpe jahpoi asawng ma ai, lahta tsang du salang ni hpe mani asan kau ma ai. Shanhte hpe shingdang lu ai hpyen dap nga ai n rai-shanhte gaw ga kaduk sumpum galaw nna dai hpe zing la nga ma ai.
11 Dai hpang, shanhte gaw nbung zawn poi mat wa nna hkoi mat ma ai. Ndai masha ni a daru magam n-gun gaw shanhte a karai rai nga ai,? ngu nna tsun nu ai.
12 Madu e, nang gaw moi chyaloi nhkoi prat kaw nna Karai Kasang rai nga ndai. Nang gaw nye a Karai Kasang rai nna, chyoi pra ai hte htani htana agrin nga ndai. Dai Madu nye a Karai Kasang hte ngai hpe makawp maga ai wa e, nang gaw Babelon masha ni hpe lata la nna shanhte hpe n-gun shaja ya nga ndai, shing rai shanhte gaw anhte hpe ari jaw lu nga ma ai.
13 Rai ti mung, nang gaw ndai gumle gumlau rai nna n hkru ai masha ni hpe gara hku hkam sharang lu na rai nga n ta? Na a myi ni gaw n hkru ai hpe yu na matu naw san pra nga ai majaw shut hpyit amu galaw ai masha ni a man e, nang n hkam sharang lu nga ndai. Dai re ai majaw, shanhte gaw shanhte hta grau nna ding hpring nga ai masha ni hpe jahten shaza nga ma yang, nang hpa majaw atsin sha nga nga n ta?
14 Shinggyim masha ni hpe hka kata na nga, shing n rai lam woi madu n nga ai sha, bra hkawm nga ai shingtai wunawng hpe di ai zawn nang gara hku di kau lu na n ta?
15 Babelon masha ni gaw chyinghkyi ni hte nga myek la ai zawn masha ni hpe mahkai la nga ma ai. Shanhte gaw sumgawn hte dagup gang la nna, shanhte lu rim la ai hpe kabu jahtau nga ma ai!
16 Shanhte gaw shanhte a sumgawn ni hpe pyi nawku ai hte dai ni hpe shagu hkungga nawng ya ma ai, hpa majaw nga yang shanhte a sumgawn ni gaw kaja htum ai arung arai shagu hte shanhte hpe madi shadaw nga ai.
17 Shanhte gaw shanhte a nhtu ni hpe htani htana lang nna matsan dum myit n rawng ai sha, masha amyu baw ni hpe tut nawng jahten shaza nga na ma ni?