4
1 Dai hpang Mawshe gaw dai Madu hpe, ?Rai ti mung Israela amyu masha ni ngai hpe n kam ai sha ngai tsun ai ga hpe mung n madat ya ai hte nang mung ngai kaw n dan pru ndai nga nna shanhte tsun wa ai shaloi, ngai kaning rai na rai ta?,? ngu nna htan wu ai.
2 Dai rai nna dai Madu gaw shi hpe, ?Nang lang da ai gaw hpa rai nga lit ta?,? ngu nna san wu ai.
Shi mung dai gaw, ?Dawhkrawng langai rai nga ai,? ngu nna htan wu ai.
3 Dai Madu gaw, ?Dai hpe ga de kabai dat u,? ngu nna tsun wu ai. Mawshe gaw dai hpe kabai dat wu yang, dai gaw lapu langai tai wa ai rai nna shi mung dai kaw na rawt hprawng mat wa wu ai.
4 Dai hpang Madu gaw Mawshe hpe, ?Na a lata ladawn nna de a nmai hpe hta jum dat u,? ngu nna tsun wu ai. Dai rai nna Mawshe mung lata ladawn nna dai hpe rim la wu ai, dai gaw dawhkrawng bai tai wa nga ai.
5 Dai Madu gaw, ?Shanhte a kaji kawa ni a Karai Kasang, Abraham, Isak hte Yaku ni a Madu Karai Kasang nang kaw dan pru ai gaw Israela amyu masha ni hpe sakse madun dan na matu rai nga ai majaw dai amu hpe galaw u,? ngu nna tsun wu ai.
6 Dai Madu gaw Mawshe hpe kalang mi bai, ?Na a lata hpe palawng galu kata de bang dat u,? ngu nna tsun wu ai. Mawshe mung tsun ai hte maren galaw nna shi a lata hpe bai shaw la wu yang, hkyen zawn ateng apang rai hpraw nna ana kap mat wu ai.
7 Dai hpang Madu gaw, ?Na a lata hpe palawng galu kata de bai bang dat u,? ngu nna tsun wu ai. Dai hte maren shi galaw wu ai. Ndai lang shi dai hpe bai shaw la wu yang, dai gaw akaja sha rai nna kaga ngam ai shi a hkum shan zawn rai nga ai.
8 Dai Madu gaw, ?Shanhte gaw shawng na lamik kumla hku nang hpe n kam ai hte myit n hkawn ai rai yang, ndai langai mi gaw shanhte hpe chye na shangun lu na rai ndai.
9 Ndai lamik kumla lahkawng hta mung nang hpe naw n kam ai hte nang tsun ai ga hpe n madat ai rai yang chyawm gaw Nila hka nu kaw na hka ja la nhtawm dai hpe ga ntsa e ru tawn u. Hka dai gaw asai tai wa na ra ai,? ngu nna tsun wu ai.
10 Rai ti mung Mawshe gaw, ?Madu e, n rai law, ngai hpe hkum shangun e; ngai gaw galoi mung ga namsup rawng ai wa n rai nngai. Nang ngai hpe ga tsun hpang ai aten kaw nna pyi ngai tai la ai wa n rai nngai. Ngai gaw n-gup li nna ga shaga lanyan ai hte shinglet li ai wa rai nga nngai,? ngu nna tsun wu ai.
11 Dai Madu gaw shi hpe, ?Masha a n-gup hpe kadai jaw a ta? Ma-a ai hte na lahpang ai wa hpe kadai galaw a ta? Myi mu hkra shi hpe kadai jaw nna, kadai wa myi kyaw shangun a ta? Dai gaw Ngai Madu nan rai nga nngai.
12 Ya chyawm gaw sa wa su! Nang shaga lu na matu ngai karum na de ai; kaning ngu nna nang tsun shaga na mung ngai tsun dan na de ai,? ngu nna tsun wu ai.
13 Rai ti mung Mawshe mahtang, ?Madu e, n rai na nngai, chyeju hte marai langai ngai hpe mahtang alak mi shangun u,? ngu nna htan wu ai.
14 Dai ga a majaw Madu gaw Mawshe hpe masin pawt ai hte, ?Lewi masha na a nhpu Arun gaw gara hku law? Shi gaw atsawm sha ga lu shaga nga ai hpe ngai chye nngai. Shi mung ya nang hpe sa hkrum na matu pru sa wa ra ai. Shi gaw nang hpe mu jang kabu gara na ra ai.
15 Nang gaw shi hte rau ga shaga lu na rai nna, kaning ngu tsun na ga shi hpe tsun dan u. Ngai gaw nan lahkawng tsun shaga na ga hpe karum ya na nngai; ngai gaw nan hpa galaw na lam hpe mung tsun dan na made ai.
16 Shi gaw na a malai ga shaga ya nna amyu masha ni hpe na a matu mung shiga shana ya na ra ai. Nang mung Karai Kasang zawn tai nna kaning ngu tsun na lam shi hpe tsun dan na ndai.
17 Ndai dawhkrawng hpe mung nang hte rau lang da u; dai hte mahtang mauhpa lamik kumla ni hpe shabyin lu na rai ndai,? ngu nna tsun wu ai.
18 Dai hpang Mawshe gaw shi a katsa Yehtru kaw nhtang wa nna shi hpe, ?Egutu mung na nye a jinghku kahpu kanau ni naw hkrung nga ma ai kun? Dai ni hpe sa yu na nngai majaw chyeju hte ngai hpe nhtang wa shangun e,? ngu nna tsun wu ai. Yehtru mung myit hkrum ya ai hte shi hpe shakram dat wu ai.
19 Mawshe Midian mung e naw nga nga yang, dai Madu gaw shi hpe, ?Nang hpe sat na sharawng ai ni yawng si htum masai, Egutu mung de nhtang wa su,? ngu nna tsun wu ai.
20 Dai rai nna Mawshe gaw shi a madu jan hte shadang sha yan hpe woi nna lawze hta shajawn nhtawm shanhte hte rau Egutu mung de sa wa ma ai. Karai Kasang shi hpe tsun da nu ai hte maren dawhkrawng hpe mung shi lang da wu ai.
21 Dai hpang e mung dai Madu gaw Mawshe hpe, ?Ya chyawm gaw Egutu mung de nang nhtang sa wa nga ndai rai nna mauhpa lamik kumla yawng galaw na matu ngai nang hpe jaw da sai daru magam n-gun hte hkawhkam wa a man e galaw shapraw na amu hpe dum nga u. Rai ti mung hkawhkam wa a myit hpe ngai shaja ya na rai nna amyu masha ni hpe wa shangun na wu ai n rai.
22 Dai hpang, ?Israela gaw nye a shadang sha alat rai nga li ai,
23 nye a shadang sha hpe dat dat ya nna shi ngai hpe nawku lu na lam, ngai nang hpe tsun ni ai; rai ti mung nang ningdang kau ai rai yang chyawm gaw na a shadang sha alat hpe ngai sat kau ya na we ai,?? ngu nna Ngai Madu nan tsun ai ga shi hpe nang tsun lu na rai ndai. Ref 4:23: Pru 12:29.
24 Egutu mung de sa wa ai hkrun lam na dabang but shara langai mi hta Madu gaw Mawshe hte hkrum nna shi hpe sat kau na maw wu ai.
25-26 Dai hpang shi a madu jan Zihpura gaw, dai ai nlung langai la nna shi a shadang sha a ahpyi matu hpe gadoi nhtawm dai hpe Mawshe a lagaw hte hkra hkra, tawn da wu ai. Matu gadoi ai lai a majaw shi gaw Mawshe hpe, ?Nang gaw ngai hte sai kap ai madu wa rai nga ndai,? ngu nna tsun wu ai. Dai rai nna Madu gaw Mawshe a asak hpe dat ya wu ai.
27 Dai aten hta, Madu gaw Arun hpe, ?Mawshe hpe sa tau la na matu, nam mali kata de sa wa su,? ngu nna tsun wu ai. Dai rai nna shi sa nhtawm chyoi pra ai bum e, Mawshe hpe sa hkrum wu ai. Arun gaw shi hte hkrum ai shaloi shi hpe pup wu ai.
28 Dai hpang Mawshe gaw Arun hpe Egutu mung de shi nhtang sa wa na lam hte Madu shi hpe tsun dan nu ai lam shagu hte shi galaw na matu dai Madu hkang da sai mauhpa lamik kumla hte seng ai lam ni hpe tsun dan wu ai.
29 Dai rai nna Mawshe yan Arun gaw Egutu mung de sa nhtawm Israela ningbaw ni yawng hpe jahpawng shinggyin da ma ai.
30 Arun mung dai Madu Mawshe hpe tsun ai ga yawng shanhte hpe tsun dan nhtawm Mawshe mahtang amyu masha ni a man e mauhpa lamik kumla yawng madun dan wu ai.
31 Dai Madu mung shanhte kaw du sa nna shanhte kade mazut ai hku adip arip hkrum sha nga ma ai hpe mu mada ya nu ai lam hpe shanhte na ma ai shaloi, kam sham ai hte gum dagup nna nawku ma ai.