17
(Bhk 20:1-13)
1 Dai Madu hkang da ai hte maren, Israela shawa hpung ting gaw Sin nam mali kaw nna pru wa nhtawm shara mi kaw nna shara mi de htawt hkawm nga ma ai. Shanhte gaw Rehpidim e dabang but ma ai; rai ti mung, dai yang e shanhte lu na hka n nga nga ai. Ref 17:1-7: Bhk 20:2-13.
2 Shanhte gaw Mawshe hpe aput let, ?Anhte hpe lu na ntsin jaw mi,? ngu nna tsun ma ai.
Mawshe gaw, ?Nanhte hpa majaw aput nga myit ta? Nanhte gaw hpa lam a majaw dai Madu hpe chyam mayu nga myit ni?,? ngu nna htan wu ai.
3 Rai ti mung, amyu masha ni mahtang ntsin grai hpang gara nga ma ai rai nna, Mawshe hpe dingyang aput nga ma ai. Shanhte gaw, ?Anhte hpe mung, anhte a kashu kasha ni hpe mung, anhte a yam nga hpung ni hpe mung ntsin hpang gara shangun nna sat kau na matu, anhte hpe Egutu mung kaw na hpa rai woi shapraw wa n ni?,? ngu nna tsun ma ai.
4 Mawshe mung dai Madu hpe akroi anoi hpyi nem nhtawm, ?Ndai amyu masha ni hte ngai kaning di lu na rai nga a ta? Shanhte ngai hpe nlung hte ganoi noi kabai sat hkyen nga masai,? ngu nna tsun wu ai.
5 Dai Madu gaw Mawshe hpe, ?Nang hte rau Israela ningbaw nkau mi hpe woi nna, amyu masha ni a shawng e sa wa mu; Nila hka nu kayat ai na a dawhkrawng hpe mung lang let sa wa su.
6 Ngai gaw Sina Bum ntsa na lunghkrung langai a ntsa, na a man e tsap nga na nngai. Dai hpang lunghkrung hpe kayat dat u; shaloi amyu masha ni lu na ntsin dai kaw na lwi pru wa na ra ai,? ngu nna tsun wu ai. Mawshe gaw Israela ningbaw ni a man e shing di galaw wu ai.
7 Dai shara kaw Israela amyu masha ni mahtang, ?Dai Madu gaw anhte hte rau nga nga ai kun?, n nga nga ai kun?, ngu san let, aput ai hte dai Madu hpe chyam dinglik yu ma ai majaw shara dai hpe Masa hte Meriba ngu nna mung shamying ma ai.
8 Amalek masha ni pru sa nna, Rehpidim e Israela amyu masha ni hpe htim gasat ma ai.
9 Mawshe gaw Yawshu hpe, ?Lasha nkau mi hpe lata shaw la nna Amalek masha ni hpe hpawt de sa htim gasat su; ngai mung Karai Kasang lang shangun ai dawhkrawng lang nna, kawng pungding e tsap nga na nngai,? ngu nna tsun wu ai.
10 Mawshe shi hpe hkang da sai hte maren, Yawshu galaw nna, Amalek masha ni hpe htim gasat nga yang, Mawshe, Arun hte Hura ni gaw kawng pungding de lung wa ma ai.
11 Mawshe gaw shi a lahpum sharawt da nga dingsa Israela amyu masha ni dang nga ma ai; rai ti mung, shi a lahpum jahkrat kau ai shaloi, Amalek masha ni dang wa ma ai.
12 Mawshe a lata lahpum tsu wa ai shaloi, Arun hte Hura yan gaw shi a matu nlung langai mi la nna dung shangun ma ai; shan mung shi a lata lahpum hpe sharawt da ya mu ai rai nna, jan du wa hkra dingyang jum shadaw ya ma ai.
13 Ndai hku nna Yawshu mahtang Amalek masha ni hpe atsai awai dang kau lu ma ai.
14 Shaloi dai Madu gaw Mawshe hpe, ?Ndai awng padang lam hpe ka da u; shaloi dai hpe adum nga na mara ai. Amalek masha ni hpe ngai tsep kawp shamyit kau na lam, Yawshu hpe tsun dan u,? ngu nna tsun wu ai. Ref 17:14: Trj 25:17-19; 1Sa 15:2-9.
15 Mawshe gaw tawn hkungri langai galaw nna dai hpe, ?Dai Madu gaw nye a ninglam rai nga ai,? ngu nna shamying wu ai.
16 Shi gaw, ?Dai Madu a ninglam sharawt mu! Dai Madu gaw Amalek masha ni hpe htani htana prat dingsa gasat nga na ra ai!,? ngu nna tsun wu ai.