10
1 Jinu chyasi ni gaw manam pyaw ai sau palin mi hpe manam hkying shangun lu nga ai zawn, kaji mi angawk ai gaw galu kaba htum ai hpaji byeng-ya hpe jahten kau ya lu nga ai.
2 Hpaji rawng ai wa gaw jaw ai amu galaw nna angawk ai wa shut ai amu chye galaw ai gaw shingra htung tara langai rai nga ai.
3 Shi a angawk angak ai amu gaw lam dingyang e shi hte hkrum ai tsasam masha ni hta pyi, dan dawng nga ai. Shi gaw angawk ai wa rai nngai nga nna masha shagu hpe chye shangun na wu ai.
4 Na a mungdu wa nang hpe masin pawt ai rai yang, bungli kaw na hkum pru mat et; dai hpe nang atsin sha sharang kau ai rai yang, grai sawng ai shut hpyit lam hpe raw dat kau mai nga ai.
5 Ndai mungkan ga hta n teng n man ai lam langai nga nga ai; dai gaw mung up hkang du ni a majaw byin wa ai n teng n man lam rai nga ai.
6 Sut su ai ni n sawn n sang di hkrum nga ma yang, angawk ai masha ni ahkang aya ap ya ai hkrum ma ai.
7 Mayam ni gaw gumra jawn, du magam ni gaw mayam ni zawn lagaw hte hkawm nga ma ai hpe ngai mu nngai.
8 Nang nhkun htu ai rai yang, dai hta nang di hkrat na ndai; bunghku hpe nang run ai rai yang, nang hpe lapu achye na ra ai. Ref 10:8: Shk 7:15; Gsh 26:27.
9 Nang gaw nlung maw hta amu galaw ai rai yang, nlung ni a majaw hkala machyi hkrum nga ai. Hpun chye ai rai yang, shingdi ai majaw hkala hkrum nga ai.
10 Na a nwa tawn mat nna, dai hpe nang n garang ai rai yang, dai hpe lang ai shaloi n-gun grau dat ra nga ndai. Tau nna myit mang ai lam gaw grau nna htuk manu nga ai.
11 Nang gaw lapu hpe shawng achye shangun ai rai yang, lapu hpe kaning rai shalen ai lam chye da ai gaw hpa akyu n rawng nga ai.
12 Hpaji rawng ai wa tsun ai ga gaw shi hpe shagrau sha-a hkam la shangun nga ai; rai ti mung angawk ai wa chyawm gaw shi tsun ai ga ni a majaw hten byak nga ai.
13 Shanhte gaw angawk ai ga ni hte tsun hpang nna mana bu ai ga san hte hpungdim dat nga ai.
14 Angawk ai wa gaw ga tut tut atsun nga ai.
Hpang e hpa byin wa na ra ai hpe kadai mung n chye lu nga ai; anhte si mat ai hpang, hpa byin wa na lam kadai mung anhte hpe n tsun dan lu nga ai.
15 Amu bungli hta hki ba nga ai majaw; shi gaw nta wa lam hpe n chye tam la hkra grai wa angawk nga ai.
16 Hkawhkam wa ma naw rai nga yang, mungdan gaw tsin-yam tsindam hkrum nga ai; shi a mungdan a ningbaw ni shana tup lusha poi galaw ma ai.
17 Rai ti mung, mungdan hta shi myit hte daw dan lu ai hkawhkam langai hte aten hkrak hkrak lu sha nna tinang nang a hkum ni hpe n lu nang hkra hkang lu ai ningbaw ni nga ai rai yang, dai mungdan gaw kaja ai maka kumla pru nga ai.
18 Marai langai mi shi a nta numgaw kapa na matu nau lagawn ai rai yang, dai gaw kayun wa nna nta mung tsam mat na ra ai.
19 Lusha poi galaw ai gaw nang hpe kabu gara shangun nga ai; sabyi ntsin gaw nang hpe myit pyaw shangun nga ai; rai ti mung gumhpraw n lu yang dai hta na langai ngai hpe nang galaw lu ai n rai.
20 Hkawhkam wa hpe kraw kata e pyi hkum dagam et; na a yup gawk kata hta pyi sut su ai ni hpe hkum dagam et. Ntsa malen u gaw nang hpa tsun ai shiga gun mat wa nna shanhte hpe tsun dan chye nga ai.